Xo̱n xi síkasénná Cuerpo Gobernante
Jon ʼndíndsʼe kao ʼndítichja:
Je Nʼainá xi tíjna ngʼajmi ñaki kjoatsjoachaní. Kuinga kʼoatsosíni Biblia nga “jé Niná xi kjoatjaocha” (1 Juan 4:8). Ningalani toje Jeobá xi ngisasa tse nganʼio tjínle, ali jña i̱ ʼmile ya Biblia “nganʼioní”. Je Jeobá ñaki kao kjoatsjoacha batéxoma, kʼoa kui jebi xi ngisasa tsjoachaa xi tʼatsʼe.
Tonga je Jeobá alikui kjoanʼio bʼénená nga nixálee, alikui kjoanʼio sʼínná. Kui xi mele nga tsjoacha katamaa ánni nga ñaki ni̱ma̱ná kjuinroajinni nga si̱xálee. Kʼiatsa kʼoasʼin si̱xálee, kʼoasʼin koakoá nga mená nga je katabatéxomaná, nga̱ tjínjngo tokoán nga kao kjoatsjoacha kʼoa kao kjoakixi tíbatéxoma josaʼnda nga kisinda chjota i̱ Sonʼnde.
Je Jeobá alikui kjoanʼio tsakʼénele je Adán kao Eva nga kisitjosonle. Tosa kitsjoaʼndele nga je kiskoejin jmeni xi kisʼin. Kʼiatsa tsabechjílani jmeni xi kisʼin Jeobá xi tʼatsʼe kʼoa tsa nʼiolani tsjoake koan, tajajin tsakatiole je Na̱i kʼianga kʼoakitsole nga katafaʼatone kjoatéxomale Jeobá.
Kʼoa je Moisés i kitsole naxinandá Israel kʼianga tokʼoatjínsa tsakjákao: “Kataʼyai nga kui jebi xi tisikatíobasenle ndʼaibi, kjoabijnachon kao xi ndatjín kʼoa kao kjoabiya kao xi chʼaotjín” (Deut. 30:15). Jebi kui xi tsonile nga je naxinandá Israel kʼoati kitjoʼndele nga je kiskoejin jmeni xi koanmele kisʼin. Kʼoa je Josué i̱ kitsole chjota israelita: “Tsa tsín kjenndiaano nga Jeobá si̱xálao, chjoéjion ndʼaibi ʼyáni xi meno si̱xálao”. Kʼoa je chjota israelita i kitso: “Nitséjinla kuitso tokuinjin tsa si̱kʼéjnaijin je Jeobá” (Jos. 24:15, 16). Kʼoa ñá kʼoati tjío tokoán ndʼaibi. Nʼio tsjoachaa je Jeobá kʼoa “nitséjinla kuitso tok[oán]” tsa si̱kʼéjnaa.
Nichxin xi tiyoaa ndʼaibi, ñá kʼoati koa̱n chjoéjiaan jmeni xi sʼiaan kʼoa ʼyañá jme xi kitjenkao jebi. Kuilakjoan je ndsʼee xi chjotajchínga sʼin tjío, ninga tjínle ʼnde nga koa̱n tsjoále kjoafaʼaitsjen kʼoa koatekjáyale je xíngiaa, alikui tsa ñaki je tjíosíkuinda ʼndeʼnde jmeni xi sʼín je xíngiaa kʼoa alikui je fánentsja josʼin makjainle. Je pastro Pablo i kitso: “Likui nga jinjin batexomalaijin je xi makjainno, tonga jin xi binyakaolaijin xi tʼatsʼe kjoatsjoano, nga̱ xi tʼatsʼe xi makjainno nʼio tiyonio” (2 Cor. 1:24).
A tsí kjoaixi nga ngisa nda sʼe tokoán kʼianga kao kjoatsjoa kʼoanʼia tsa jmeni ʼndele nga tosʼe̱nená. Je Jeobá mele nga ni̱ma̱ná katanroajinni nga kʼoasʼiaan xi ndatjín. Kʼoa nʼio chjíle nga kʼoasʼiaan, nga̱ je pastro Pablo i kitso: “Nda tsa sikʼabía ngayije xi tjínna, jméni nga sikjensínia je xi yo̱ma̱, kʼoa nda tsa tsjoatʼa yaona [...], tsa tsínna kjoatjaocha, lijme chjína” (1 Cor. 13:3).
Nʼio tíbitjongʼa je Jeobá nga kʼoasʼin jetsʼato ñato miyón mani ndsʼee kao tichjaa xi tjíosíxále. Kʼoa nʼio tsjoa tísʼele Jeobá, nga je xíngiaa kui kʼoatjíosʼínni nga tsjoake.
Kʼoa je Jeobá nʼio tsjoake ngatsʼi choʼndale. Kʼoati nʼio tsjoakeno jon xi sʼa xtiʼndío kʼoa kao xi jetjíotsaoson nóno. Nga̱ tibakoñó nga tsjoachao je Jeobá kʼoa nga tichʼasjengio jmeni xi chon sonʼnde kao kjoatsjoa xi i̱ tjín. Kʼoa tʼejngo tokon nga kʼoati nʼio tsjoachalaijin (Luc. 12:42, 43).
Kʼoa jósʼin tibakó nga tsjoachao je Jeobá jon ʼndíndsʼe, ʼndítichja kao ngatsʼio xi sʼa xtio. Je nó xi jaʼato i tjín ora tsakʼinyason je énnda chjotse: 1,748,697,447. Kʼoa 7,782,346 koanño xi kʼoasʼin tsakʼinyason jngo tjíjtsa Sonʼnde. Kʼoati nʼio tsjoa manajin nga 268,777 koanni xíngiaa xi kʼoasʼin kisʼenngindá xi tsakakó nga jekitsjoatʼale yaole je Jeobá, kʼoa nʼio nkjín mani xi sʼa xti. Jebi kui xi tsonile nga 5,168 kisʼenngindá nga xki̱ xomana. ¡Jmé sikji kjoatsjoa tje̱nkaoni jebi!
Nichxin xi tiyoaa ndʼaibi xi toje tífikjetʼa, nʼio tse kjoa tibitjatojiaan ngatsʼiaa xi choʼndale Jeobá maa, jolani je xi bʼéchjoaná nga nixálee Niná. Kʼoati fitjenngikená chjota, sokóchʼinná kʼoa nʼio nkjín mani xíngiaa xi jenʼio jchínga. Tonga ñaki kʼoatjío tokoán nga nijmejinla xi sikinroajen kjoamakjainná kʼoa xi sikinyátʼaxinná ngixko̱n Niná. Kʼoasʼin nikasénlaijin kjoatiʼndanajin ngatsʼio (Heb. 10:39; 2 Cor. 4:16).
Xi síkasénno xo̱n jebi jéní,
Cuerpo Gobernante xi tsʼe Testigole Jeobá