Chjénngilee je profetale Niná: Joel
1. Jósʼin chjénngilee je kjoanangitokon xi kisʼele Joel kʼianga ʼmiyasoán.
1 ʼYáni je profeta xi Joel tsakʼin. Je libro xi kiski xi jaʼaínle yʼa, tokui xi tso nga “ʼndíle Petuel” koan (Joel 1:1). Je profeta jebi nangitokon koan kʼoa kui ngisa kinchja̱ni jme xi kitsole Jeobá, ali tsa yaolejin tsakʼasjengʼa nga profeta koan. Kʼoa ñá kui choa̱le mangíntjenngiaa kʼianga ʼmiyasoán. ʼNdele nga yaoná chʼa̱sjengʼaa, tosa kui xi mená nga je Jeobá katabinyáñole chjota kʼoa nga katanrʼoé jotso Énle (1 Cor. 9:16; 2 Cor. 3:5). Je én xi ʼmiyasoán nʼio tsjoánganʼioná. Si̱kʼaxki̱la kʼaa je én xi kinchja̱ Joel xi tsjoáná kjoachoya kʼoa xi tsjoánganʼioná nga kao kjoatsjoa kʼuínyasoán.
2. Jméni xi tjínnele sʼiaan nga jenʼio machrianle nichxinle Jeobá.
2 “Je nichxinle Jeobá jetíjnachrian.” (Joel 1:15.) Ningalani jeme jan jmi nó tjínle nga kichji én jebi, ndʼai tíbitjosonyeje. Sa tse sa tse kjoa tísʼe ndʼaibi kʼoa je chjota tojtaya síkaoná kʼoa tobesinná kʼianga ʼmiyasoán. Jebi kui xi bakóná nga jetotífikjetʼa nichxin kʼoa nga jenʼio machrianle nga kjoetʼa jme xi chon sonʼnde (2 Tim. 3:1-5; 2 Ped. 3:3, 4). Kuinga nʼio machjénsíni nga ngisa kʼoailee kjoandosin nga kʼuínyasoán (2 Ped. 3:11, 12).
3. Ánni nga tjínnesínile ntsjaintsjai kʼuínyasoán nga jenʼio machrianle je kjoañʼai xi nʼio tse.
3 “Jé Jeobá koasenkao naxinandále nga tsín jme xi katamale.” (Joel 3:16.) Je testo jebi kʼoati tso nga “ñaki koa̱ntinyale je ngʼajmi kao sonʼnde”, kʼoa jebi kui tínchja̱ni kʼianga sikjeson Jeobá je chjotatsʼen kʼianga sʼe̱jna je kjoañʼai xi nʼio tse. A tsí nʼio tsjoa maná nga kʼoasjentjai Jeobá je choʼndale nga kui nichxin (Apoc. 7:9, 14). Kʼianga ntsjaintsjai ʼmiyasoán kʼoa nga ʼyaa nga basenkaoná je Jeobá kʼoa tsjoánganʼioná, ngisa sʼená kjoamakjain kao kjoaka, kʼoa jebi nʼio koa̱nchjénná nga kuitjo̱ntjé kʼianga kjoaʼaí je kjoañʼai xi nʼio tse.
4. Ánni nga kjoáyatsjoasíñá tokoán kʼoa nga tsín kuijkónsínilee jmeni xi koa̱n nichxin xi nroaján.
4 A síkinroajen tokoán je én xi kiski Joel jotso kʼa chjota. Mai. Tosa jngo kjoachoya tsjoáná nga kʼoatso nga kʼoasjentjai Jeobá je naxinandále (Joel 2:32). Kuinga tsín koa̱n kuijkónsínilee jmeni xi koa̱n nichxin xi nroaján. Tosa ñaki kao kjoatsjoa kʼuínyasoán je énnda chjotse xi tʼatsʼe Chjotaxále Niná kʼoa kuenta sʼiaan jotso ya Joel 2:23: “Tjayatsjoao tokon kʼoa tsjoa katamano xi tʼatsʼe je Jeobá Nináno”.