Chjénngilee je profetale Niná: Amós
1. Jósʼin basenkaoná je choa̱le Amós.
1 A sakʼoa ñʼai mali nga ʼmiyasuin, tsakui nga ma̱ tinijchái yaoli kʼoa tsakuije̱ nga me choa xo̱n mali. Kʼiatsa jaon, je choa̱le Amós nʼio koasenkaoli. Je Amós ma̱a kisijchá yaole, barré kiskoʼnda kʼoa tokui xá kisʼin xá xi tosakʼoa sʼe nga jngo nó. Tonga je Jeobá kui xá kitsjoale nga kuinchja̱ya je énle, jngo xá xi nʼio chjíle (Amós 1:1; 7:14, 15). Kʼoa nichxin xi tiyoaa ndʼai, je Jeobá kʼoati je síchjén je xi toxkia chjota (1 Cor. 1:27-29). Jósasʼin koasenkaoná je choa̱le Amós kʼianga ʼmiyasoán.
2. Ánni nga koa̱n kʼoéjngosíñá tokoán nga kixi kjuintʼalee Niná ninga chjota koaitjenngikená kʼianga ʼmiyasoán.
2 Kixi kitʼale Niná ninga chjota tsakatiochjoale. Je Amós yaa kinchja̱ya je énle Niná ya jña tjío je xi te ntje̱le naxinandá Israel. Tonga je Amasías, xi naʼmi koan, kʼoakitsole nga xin katafi kʼoa nga tsín tsa tiya katabichóni, nga je chjota xi ya tsʼe jetjínle relijiónle (Amós 7:12, 13). Kʼoa tojoni nga koatechjoa je rey Jeroboán nga tosi tonda kuinchja̱ya énle Niná je Amós, je Amasías jngokʼa kisikʼantjaiya jme én xi kinchja̱ Amós (Amós 7:7-11). Tonga je Amós alikui kui kini. Kʼoa nichxin xi tiyoaa ndʼai, je xi nyatítjonle relijión tjínkʼa xi ya básjai nganʼio kao chjota polítiko tojoni nga koaitjenngike je naxinandále Niná. Tonga je Jeobá kʼoatsoná nga lijme xi sikaoná ninga tojmeni xi kjuinroanená (Is. 54:17).
3. Jmé xi jao koya nchja̱ni je én xi ʼmiyasonlee chjota.
3 Kinchja̱ni nga kuenta ni̱jéle je chjota kʼoa kao kjoanichikontʼain xi kjoaʼaíkao Niná. Ningalani kui kinchja̱ni Amós nga kuenta ni̱jéle je xi te ntje̱le naxinandá Israel, tonga je libro xi kiski kʼoati kui nchja̱ni nga Niná nda sikatío ijngokʼani naxinandále kʼoa nga sichikontʼain (Amós 9:13-15). Kʼoa ñá kʼoati nokjoañá ndʼaibi nga kjoaʼaí je nichxin nga sijé kuenta Niná. Kʼoa én jebi yaa maxki̱kao “je énnda xi tʼatsʼe je kjoatéxomale ngʼajmi” xi tjínnele kʼuínyasoán (2 Ped. 3:7; Mat. 24:14). Je Jeobá kʼiaa sikjeson je chjotatsʼen nga kjoaʼaíkao je kjoajchánle xi Armagedón ʼmi. Kʼoa xijekoa̱n, ʼndenaxó sikao jngo tjíjtsa Sonʼnde (Sal. 37:34).
4. Ánni kʼoabixónsíñá nga koa̱n kuitjosonná josʼin mele Jeobá.
4 Kʼianga tosi tonda ʼmiyasoán ninga chjota batiochjoaná kʼoasʼin bakoñá nga tinitjosoán jmeni xi tsakʼinlee je Jeobá kʼianga tsakʼaitʼalee yaoná kʼoa nga mená kʼoasʼiaan josʼin mele (Juan 15:19). Ninga chjota koaitjenngikená, tjínjngo tokoán nga je Jeobá koasenkaoná, josʼin tsakasenkao je Amós (2 Cor. 3:5).