“Tikatíoxkónái je naxinandá”

1. Jósʼin mangóson je kjoajtíntse xi satíoná kao nga tsakatioxkó je chjota israelita nga jekitjoni ya Egipto.

¹ Kʼianga tosʼa choatse nga kitjoni ya Egipto je chjota israelita, je Jeobá kʼoakitsole je Moisés nga ya katasíkatíoxkó ya nindo Sinaí ánni nga kjuinrʼoésíni je énle, nga tsokjonke kʼoa nga koakoyale je xtile je ndiaale Jeobá (Deut. 4:10-13). Jmeni xi koan nga kui nichxin kisitajajin kjoamakjainle. Kʼoa je nó jebi kʼoati koa̱nñaa xi naxinandále Jeobá maa kʼianga sa̱tíoná je kjoajtíntse xi jan nichxin kʼoa kao kjoajtíntse jñani nkjín naxinandá kjoaʼaíni xi kuicho, kʼoa jé Jeobá kuitsoyaná. Jméni xi sʼiaan nga ñaki nda koasenkaoná jmeni xi kuinóʼyá.

2. Jméni xi sʼiaan nga ñaki jetiyondaa nga sʼe̱jna je kjoajtíntse.

² Tongini kuiyondaa. Je Jeobá kʼoakitsole je chjota israelita nga katabationda nga koa̱nxkó ya nindo Sinaí (Éx. 19:10, 11). Kʼoatisʼinni, kʼianga kjuian je kjoajtíntse tjínnele nga tongini kuiyondaa, ali tsa tojejin je ndsʼee kao tichjaa xi kʼoakaole kjoaʼa. Tobʼelañá, nʼiojin nkjín xi sijékjoa jñani síxá. Tsakui nichxin kʼoati kui tibitjatojiaan jme xi jaʼatojin Nehemías. Je Nehemías nga ya kisixákao je rey Artajerjes, koanmele nga kisijékjoa nga koaikʼéndaya je xjáo xi kjindai Jerusalén, tsandalani kʼoasʼin kisikjaʼaitsjen nga tsín tsjoáʼndele je rey. Kuinga tsakʼétsʼoasíni, kʼoa ndakjoanla kisikjaʼaitsjen jmeni xi kitsole rey kʼoa kiskoé kjoanʼiojin nga tsakjákao. Je rey kitsjoaʼndele kʼoa saʼnda kitsjoanganʼiole jme xi koanchjénle (Neh. 2:1-9). Tonga kʼoati machjén nga si̱kjaʼaitsjenjiaan jebi: A jetibʼendajiaan josʼin koanngián kʼoa jña kuiyoñá. Je xi chjotajchínga sʼin tjío kuinyakao je xi machjénle nganʼio xi tʼatsʼe jebi. Kʼoati kʼoéndajiaan nga xátí kuichoaa nga sʼe̱jna kjoajtíntse kʼoa tongini kuiyondaa nga ngisa nda kuinyañoaa jmeni xi kjoaʼa (Heb. 2:1).

3. Jméni xi sʼiaan nga tongini si̱kʼéjnandaa je ni̱ma̱ná nga sʼe̱jnaná je kjoajtíntse.

³ Nga ñaki jetiyondaa nga kui nichxin, kʼoati nʼio machjén nga si̱kʼéjnandaa je ni̱ma̱ná nga nda kuinóʼyá kʼoa nga koa̱njinná (Esd. 7:10). Je programa jña faʼaitʼa jme xi kjoaʼa ya kjoajtíntse tongini sʼe̱jna ya dirección xi tíjnaná ya Internet ya jw.org. Yaa sʼe̱tʼa jotjín kjoanokjoaya kjoaʼa kʼoa tsa jngo kʼoa tsa jao testo xi yʼangini. Nʼiojin nda tsa kʼia chótʼayá jebi Nichxin nga chotʼayajtían Énle Niná ya niʼyaná tongini nga kje sʼejnajin je kjoajtíntse jñani bʼakaoná. Kʼoa tjínkʼa xíngiaa xi bʼasje je programa kʼoa yaa bʼétʼaxo̱n choa jmeni xi faʼa ya kjoajtíntse.

4. Jósʼin sichjén je xi xijchá ma jmeni xi kjoaʼa ya kjoajtíntse nga kuitsoyale je ʼndíxtile.

⁴ Takoyalao je ʼndíxtino. Jngo koya jme xá kinikatíoxkóni je chjota israelita kʼianga kisʼejnale je kjoajtíntse ya nindo Sinaí kuinga “kuitsoya[le] je xtile” je énle Jeobá (Deut. 4:10). Kʼoa kʼianga satíoná je kjoajtíntse kʼoati koa̱n kʼoasʼin je xi xijchá ma. Tongisa nda nga ya koatiotʼale ʼndíxtile, ánni nga je sikuindasíni nga nda katabinyáño. Nga jngó jngó familia koaan kjaoyani jmeni xi kjuinrʼoé ya kjoajtíntse kʼianga jekjoetʼa nga jngó jngó nichxin kʼoa tsa kʼiaje̱ nga skótʼayajtín Énle Niná ya niʼyale.

5. Jósʼin koasenkaoná nga kjuian je kjoajtíntse.

⁵ Kʼianga tsakatioxkó je chjota israelita ya nindo Sinaí kui xi tsakinyakao nga tsabechjí nga naxinandále Niná tjíojin (Deut. 4:7, 8). Je kjoajtíntse xi sʼe̱jnaná nó jebi kʼoatisʼin koasenkaoná. Nʼio tsjoánganʼioná jmeni xi kjoaʼa kʼoa jtsaojinñá je xíngiaa xi ñaki ndsʼe sʼin chobá, xi koa̱n si̱miyoaa. Jan nichxin nga tʼaxinla kuiyolee je sonʼndele Na̱i xi kʼoasikji chʼao chon (Is. 35:7-9). Mani nga je nichxinle Jeobá jechrian tíjna, likui si̱chaa je kjoanda xi sʼená nga xki̱ nó kʼianga kʼoasʼin mañaa nga bʼainganʼiongañálee xíngiaa (Heb. 10:24, 25).