Kʼoénelee yaoná nga chjotale Cristo si̱koaa je chjota

1. Jósʼin kuinyakoaa je chjota kʼianga koa̱n kuitjontjai.

¹ Josʼin koanxá tjen septiembre nó 2013 saʼnda agosto nó 2014, kui bakó nga je naxinandále Niná nʼio tjíobʼénele yaole kʼoa nga ñaki kao kjoatsjoa tjíobakóyason je énnda chjotse xi tʼatsʼe Chjotaxále Niná (Mat. 24:14). Nga kʼoasʼin ʼmiyasoán xki̱ ndʼia xki̱ ndʼia, nga jngo xo̱n kʼoa tsa jngo tratado chjotse nikʼabísoán kʼoa kao nga ʼmiyasoán ya jña nʼio tjín chjota, kui xi koasenkaoná nga ngisasa nkjín chjota kʼuínyalee je Biblia. Tonga, kʼianga koa̱n kuitjontjai je chjota, machjénní nga kuinyakoaa nga chjotale Jesús katama nga kʼuínyalee jotjínni je Énle Niná (1 Tim. 2:4).

2. Jmé xi koa̱n chjónangilee yaoná nga tsín si̱chajiaan nga kʼoakʼuínlee je chjota josʼin ʼmiyaa je Biblia.

² Kʼuínyalee je chjota josʼin ʼmiyaa Biblia. Kʼiatsa jngo chjota xi mandosinle je Énle Niná, a chjonangilee joʼmi, jña tíjnani kʼoa kao númerole teléfonole. A kjoan nokjoalee nga kʼoaʼmilee nga mená kʼuínyalee je Biblia. Kʼiáni nga sa kʼoatsakʼinlee jngo chjota josʼin ʼmiyaa je Biblia kʼianga tosʼa títjon kichochonlee. Kʼiáni nga sa kʼoatsakʼinlee jngo chjota xi mangínkaolee je rebista josʼin ʼmiyaa je Biblia. Je chjota xi ñatjen nixá, xi ñatjen mangián skuela, chjota ndainiʼyaná, xi xíngiaa mani kʼoa tsa kao je chjota xi ʼyaxkoaan, a bakolee je video xi Ánni nga machjénsíni nga chótʼayai Biblia kʼoa kao Jósʼin ʼmiyalaijin Biblia je chjota ʼmi. Kʼianga ya biyoʼndá je xi ma xinyáya xo̱n, a bʼenelee yaoná nga kʼoaʼmilee je chjota xi bʼa je xo̱n xi nichjén nga ʼmiyaa Biblia nga kʼoati koa̱n kʼuínyakjoatjaole je Biblia.

3. Jméni xi koasenkaoná nga nʼio nda koa̱nná kʼuínyasoán je Énle Niná.

³ Je Jeobá kao Jesús kuinyakaoná. Kʼianga kʼoakitso je Jesús nga chjotale si̱koaa je chjota, kui én kisichjén xi “tangíon” tso. Kʼoa kui xi kitsonile nga kʼoénelee yaoná kʼoa nga tiyondaa nga kʼoasʼiaan. Tonga alikui toñá kisikatíoná. Kʼoakitso nga ya tjen kʼoéjnakaoná (Mat. 28:19, 20). Xi ijngosani, je Jeobá ali tsa tokuijin je nganʼiotsjele tsjoáná, kʼoati nʼio nkjín xo̱n xi nichjén nga ʼmiyasoán títsjoáná kʼoa kʼoati síchjinená nga koa̱nná kʼuínyalee chjota jotjínni je Énle (Zac. 4:6; 2 Cor. 4:7). Koaan kʼoétsʼoalee je Niná nga katatsjoáná je nganʼio kʼoa nga ñaki kao kjoatsjoa kʼuínyasoán (Filip. 2:13).

4. Ánni nga kʼoénesínilee yaoná nga chjotale Cristo si̱koaa je chjota.

⁴ Kʼianga ʼmiyasoán je énnda chjotse nʼio tsjoa sʼená. Tonga kʼiatsa so̱koná jngo chjota xi kʼuínyalee je Énle Niná kʼoa kuisenkoaa nga katafiya “je ndiaa xi fini kjoabijnachon”, ngisasa nʼio tsjoá sʼe̱ tokoán (Mat. 7:14; 1 Tes. 2:19, 20). Tonga je xi ngisa chjíle, kʼiatsa kʼoénelee yaoná nga chjotale Cristo si̱koaa je chjota, kuinga nʼio nda kʼoé kon je Jeobá, nga̱ je “kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9).