Kuisenkoaa je xi ʼmiyalee nga katabichókajin ni̱ma̱le jotso je Énle Niná

1. Jókisatio kon chjotale Jesús tʼatsʼe jmeni xi kitsoyale.

¹ Jmeni xi kitsoya je Jesús ñaki kitsaojin ni̱ma̱le je chjota xi kinrʼoéle. Ñandia kʼianga ñaki “tsjoaya koanle” ni̱ma̱le je chjotale kʼianga kitsoyale jmeni xi tso je Énle Niná (Luc. 24:32). Ni̱ma̱ná nroajinni kʼianga nitjosonlee je Niná kʼoa kuinga kuinyakaosíñá je xi ʼmiyalee nga katasíkʼantjaiya yaole. Tonga jósʼin kuinyakoaa (Rom. 6:17).

2. Ánni nga bichótsaojinsíni ni̱ma̱le chjota je Énle Niná kʼianga ngasin nganda chjakoaa kʼoa majinná josʼin síkjaʼaitsjen.

² Ngasin nganda chja̱koaa kʼoa katamajinná josʼin síkjaʼaitsjen. Me ngatsʼi je chjota nga tsín síkʼantjaiya yaole kʼiatsa tokui kʼoakʼuínlee jmeni xi ndatjín kʼoa jmeni xi chʼaotjín. Kʼiatsa nʼio nkjín testo kʼoéxkialee xi kui tínchja̱ni nga tsín kixi tíjna jmeni xi makjainle, tochale likui tikjuinrʼoéniná nga chja̱koaa. Kʼianga kuisenkoaa je chjota, títjon kjoanla katamajinná ánni nga kʼoasʼin makjainnile kʼoa ánni nga nʼio bʼejnani xi tʼatsʼe kjoamakjainle. Kʼiatsa ngasin nganda chja̱koaa kʼoa nda si̱kjaʼaitsjeen jmeni xi chjónangilee kui xi koasenkao nga kʼoakuitsoná josʼin síkjaʼaitsjen (Prov. 20:5). Tsa kʼoasʼiaan koaanná chjoéjiaan je testo xi kʼoéxkialee xi kuichokajin ni̱ma̱le. Kʼoa kuinga nʼio chjísínile nga katamandosinná xi tʼatsʼe chjota kʼoa nga tsejta katamaa (Prov. 25:15). Kuenta sʼiaan nga tsín tongóson sʼin mataja kjoamakjainle je chjota. Tse bichómani kʼianga je nganʼiotsjele Jeobá basenkao nga síkʼantjaiya kjoafaʼaitsjenle kʼoa kao jonga sʼín je chjota (Mar. 4:26-29).

3. Jósʼin kuisenkoaa je xi tibʼailee estudio nga kʼoakatamakjoan josʼin mele Niná.

³ Kuisenkoaa nga kʼoakatamakjoan josʼin mele Niná. Kʼianga chótʼayajiaan je testo xi kui nchja̱ni je kjoanda xi tjínle kʼoa kao kjoatsjoacha xi tjínle je Jeobá, kui xi koasenkao je chjota xi ʼmiyalee nga kʼoakatamakjoan josʼin mele Niná. Kʼianga katamajinle nga nʼio mandosinle Niná xi tʼatsaan koaan kui kʼoéxkialee Salmo 139:1-4 kʼoa kao Lucas 12:6, 7. Kʼianga jngo chjota xi nʼio bechjí jokji kjoanda tíbakóná je Jeobá, je kjoamakjainle kʼoa kao kjoatsjoachale xi kao Jeobá ngisasa nʼio sʼejna (Rom. 5:6-8; 1 Juan 4:19). Xi ijngosani, kʼianga koa̱njinle jomale je Jeobá kʼianga jme xi nʼia, kui xi koasenkao nga kui kʼoasʼin jmeni kʼoasjengʼa kʼoa xi tsjoa kʼoe kon je Niná (Sal. 78:40, 41; Prov. 23:15).

4. Jósʼin chjénngilee je Jeobá kʼianga ʼmiyalee je chjota.

⁴ Je Jeobá alikui kjoanʼio bʼénená nga si̱tjosoán je kjoatéxomale, tosa kui kʼoatsoná jokji tse kjoanda tjenkao kʼiatsa kʼoasʼiaan (Is. 48:17, 18). Kʼianga bisenkoaa je chjota nga tije katasíchoyanile yaole, jé Jeobá tichjenngilee. Kʼoa je chjota kʼoasʼinntsjai josʼin mele je Niná (Rom. 12:2). Kʼoa sa nʼio sa nʼio koa̱nchriantʼale je Jeobá, “xi male kotʼajin jotjío ni̱ma̱le chjota” (Prov. 17:3).