ÉN XI NʼIO CHJÍLE XI NYA BIBLIA | SALMOS 11-18

ʼYáni xi koa̱n ya kʼoéjna ya ndʼianajñole Jeobá

Kʼianga ʼya xi ya bʼejna ya ndʼianajñole Jeobá kui xi tsonile nga miyole mani, nga je sínʼiotʼa kʼoa nga sítjosonle. Ya Salmo 15 yaa kʼoatso josʼin mele Jeobá nga katamakjoan je miyole.

JE XI YA KOATIO NDʼIANAJÑOLE JEOBÁ TJÍNNELE...

... nga kixi koa̱n.
... nga énkixi kuinchja̱ ngantsjai kʼoa nga ñaki ni̱ma̱le katanroajinni.
... nga skoe̱xkón je xi ngikʼa choʼndale Jeobá.
... nga sitjoson je énle, ninga ñʼai koa̱nle.
... nga koasenkao xi ñʼai chonle ninga tsín jme xi kʼoaingajaonile.

JE XI YA KOATIO NDʼIANAJÑOLE JEOBÁ ALIKUI TJÍNNELE...

... nga énndiso koane xínkjín kʼoa nga én ska̱nibason.
... nga totaon skoe̱ je xínkjín.
... nga totjín xi sʼinnile.
... nga je simiyo je xi tsín Jeobá síxále kʼoa xi tsín sítjosonle.
... nga koa̱nchjíʼmale.