“Títjonkjoanla timiyo ngijngokʼai ndsʼai”

Tikjaʼaitsjenlai tsa yalani tsi ya Galilea nichxin nga tsakʼejna Jesús. Tsa ya jekichui ya Jerusalén nga tísʼejna sʼuí Xkójnda kʼoa nʼio nkjín chjota tjín, xi kichoni ngakjijnda ʼnde. Meli nga jngo cho̱ kʼoaitʼalai Niná, kʼoa ʼmijinlai chjota ninga tomachon kʼoa jngo tindso kichʼai nga tiʼmi ya yo̱ngo̱. Kʼoa nga jebichui, ñaki kijnakitse chjota xi kʼoati mele tsjoátʼa cho̱ xi yʼa. Chan bʼakaoli nga bʼailai tindso xi kichʼai je naʼmi. Tonga nga jetibʼailai, kʼiaa faʼaitsjenli nga jngo kjoa tjínle ndsʼai xi kao ji. Tsakui nichxin je ndsʼai ya tíjnajinle chjota xosichon kʼoa tsakui nichxin ya tíjna ya naxinandá. Je Jesús kʼoakitso jme xi tjínneli sʼiain (tʼexkiai Mateo 5:24). Jmé xi tjínneli sʼiain ji kʼoa kao je ndsʼai nga koanngíntjenngio kjoafaʼaitsjen xi kitsjoa Jesús kʼoa nga nyʼán kuiyokao xíngio. Tʼechoai je én xi kixi tíjna.

JMÉNI XI TJÍNNELI SʼIAIN

• Tokʼiaa chja̱koai je ndsʼee kʼiatsa tjín xi kinikoai kʼoa kuinga jtinile.

• Kʼoatʼinlai nga likui kʼoatjín jmeni xi títso kʼiatsa ʼyai nga sasa majtinile kʼoa tsa kʼoati tjínle jée.

• Tsejta katamai kʼoa tinóʼyalai jokuitsoli ninga tsín koa̱njinli kʼoa tijélai kjoanichatʼa ninga tsín toxá kinʼiani tsa jme xi kinikoai.

JMÉNI XI TJÍNNELE SʼIN JE NDSʼEE

• Kʼoakatatsole ngatsʼi ndsʼee jmeni xi kinikoai, ánni nga je koaijtakaoni.

• Kʼoakatatso nga̱ʼali jmeni xi kinikoai, ánni nga kʼoasísíni nga ji tjínli jée.

• Katasíkjaʼaitsjen nga kjoanangitokon kʼoa kjoanʼiojin koanchjénli nga kichjakoai kʼoa katasíchatʼali.

Ningalani likui ti cho̱ bʼaitʼanilee je Niná kʼianga bʼetsʼoalee, tojo kitso Jesús jósʼin tíjna nga nyʼán biyoaa kao ndsʼee kʼoa nga katasasénle Niná josʼin ʼyaxkoán.