A faʼaitsjenli

A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2022.

Jósʼin basenkaoná nga nikʼayaa nichxin nga bʼetsʼoalee Jeobá, nga noʼyalee kʼoa nga nikjaʼaitsjenjiaan xi tʼatsʼe.

Nda chjoéjiaan jme xi sʼiaan, nda koa̱nná koakoyaa, nʼio sʼe̱jna kjoamakjainná kʼoa ngisaa tsjoacha koaan je Jeobá (w22.01, página 30, 31).

Ánni machjénni nga koa̱nkjainná jme xi tsoná Jeobá kao xi tsakinyánda nga bándiaaná.

Kʼoéjngoaa tokoán nga kui xi kixi tjín kʼoasʼín je Jeobá. Ninʼiotʼañá je Jeobá kʼianga nitjosoán jme xi bʼéndajin xi chjotajchínga sʼin tjío kʼoa nga mangíntjenngiaa kjoafaʼaitsjen xi tsjoá. Tsa nitjosoán ndʼaibi, kʼoati sʼiaan kʼianga kjoaʼaí kjoañʼai xi nʼio tse, ninga tsín ndi̱to̱n koa̱njinná jme xi kʼuínná (w22.02, página 4-6).

Jmé xi kinchja̱ni je ánkje kʼianga kʼoakitsole Zacarías nga skoe̱ je plomo xi yʼa je chjotaxá Zorobabel (Zac. 4:8-10).

Je sén jebi tsakasenkao naxinandále Niná nga koanjinle nga koa̱njngole je yo̱ngo̱ kʼoa nga kʼoakoa̱n josʼin mele Jeobá (w22.03, página 16, 17).

Jósʼiaan nga nda choa̱ kʼoéjnaa nga kui én xi nda tso kuinókjoaa (1 Tim. 4:12).

Ndʼé katamaa kʼoa koakoá kjoaxkóntokon kʼianga ʼmiyasoán, kao kjoatsjoa kuijndá nga sʼejnaná kjoajtín, kʼoee comentarioná, énkixi kuinókjoaa ngantsjai, kui én kuinókjoaa xi kuinyakao xi ngikʼa kʼoa tsínkui én xi síkiʼaonná kuinókjoaa (w22.04, página 6-9).

Ánni mangósonni jokji cho̱ xi bʼaxki̱ ya Apocalipsis 13:1, 2 kao nga ño cho̱ (chjotaxá) xi bʼaxki̱ ya capítulo 7 xi tsʼe Daniel.

Je cho̱ xi bʼaxki̱ ya capítulo 13 xi tsʼe Apocalipsis ali tsa tojngojin gobierno tínchja̱ni, jolani Roma. Cho̱ jebi jé tsoyanile ngatsʼi gobierno xi tjíobánentsja chjota (w22.05, página 9).

Jósʼin bakoñá nga je Jeobá xi ngisa nda be josʼin bʼéndajin kjoa.

Tsa ʼya xi josikaoná tsín bʼengijtiaa tokoán kʼoa tsín jtichaa maa, tjínjngo tokoán nga je Jeobá kʼoendajin kjoa xi bijnyaa nga chjotajée maa (w22.06, página 10, 11).

Jmé xi kuenta sʼin jngo ndsʼee tsa je kʼoakaole kʼoetsʼoa nga satíoná kjoajtín.

Alikui koa̱n nga kʼia tsjoá kjoafaʼaitsjen kʼoa tsa jme én xi koajinkon je ndsʼee. Ngisaa nga tosʼa fitsʼia kjoajtín tsín koa̱n nʼio tse kuinchja̱ nga kʼoetsʼoa (Mat. 6:7) (w22.07, página 24, 25).

Jósʼin tsoyanile nga “sʼe̱ndajinle kjoa” kʼianga kjoaʼáyanile je xi “chjotatsʼen” ʼmile (Juan 5:29).

Chjota jebi alikui kjoañʼai koaile tʼatsʼe jme xi kisʼin nga kjesa mʼejin. Kui kuenta koa̱n josʼin kʼianga jekjoaʼáyanile (w22.09, página 18).

Jmé xi kitso je ndsʼee Joseph Rutherford kʼianga kisʼejna kjoajtíntse nga sá septiembre nó 1922.

Kʼianga kisʼejna kjoajtíntse ya Cedar Point (Ohio, Estados Unidos), i kitso: “Koeni, je Rey jetíbatéxoma. Kʼoa jonño xi koanngínkaoson én. Kuinga tixónyaño, tixónyao, tixónyao xi tʼatsʼe Rey kao tʼatsʼe Chjotaxále” (w22.10, página 3-5).

Tojo tso ya capítulo 30 xi tsʼe Isaías, jñánile nga jan koya josʼin basenkaoná Jeobá nga chókjoajinná je kjoa xi bitjatojiaan.

Xi títjon, nrʼoéná kʼianga bʼetsʼoalee. Xi majaoni, bándiaaná. Kʼoa xi majanni, síchikontʼainná ndʼaibi kʼoa sichikontʼainná nichxin xi sʼa nroa (w22.11, página 9).

Ánni kʼoabixónsíñá nga kitjoson nichxin kjoatse jmeni xi tso Salmo 37:10, 11, 29 kʼoa nga kʼoati kuitjoson nichxin xi sʼa nroa.

Jmeni xi kitso David kui tsoya nga nda tsakatio chjota ya naxinandá Israel, jolani nga tsakatéxoma Salomón. Kui versículo 11 kisikʼaxki̱ je Jesús kʼianga kui kinchja̱ni jokoa̱nchon nga jeʼndenaxó koa̱n nichxin xi sʼa nroa (Mat. 5:5; Luc. 23:43) (w22.12, página 8-10, 14).