Tjínkʼa xi kjonangi

Ánni nga nʼio kitsjoanile kjoandosin je chjotakontrale Jesús nga tsakanéjon ntsja

Je chjotakontrale Jesús likui nda kisikʼaxki̱ Jesús kʼoa kao chjotale nga tsín tsakanéjon ntsja. Je kjoatéxoma xi tsakʼaile Moisés jaʼaitʼa jmeni xi jndí sʼin kisikatío chjota ngixko̱n Niná. Jolani tsa kjiʼndojon yaole, tsa kʼien kisikao kʼoa tsa cho̱ kʼien kisikao. Jméni xi tjínnele kisʼin je chjota kʼianga koantsje ijngokʼa. Je kjoatéxoma kʼoatso nga tjínnele tjín xi kitsjoatʼa, tjínnele tsakangoya kʼoa tsa nandá kitjojndijon (Levítico, kapítulo 11 saʼnda 15; Números, kapítulo 19).

Je naʼmitítjonle chjota judío tsakʼétʼasonsa kjoatéxoma xi kjaʼaínile. Jngo libro xi kʼoatso nga tsakʼétʼason josʼin majndí jngo chjota kʼoa josʼin síjndí xi ngikʼa. Kʼoati kitso jokjoan tsojmi xi jndí sʼin tsaʼyatokon kʼoa jokjoan xi mai. Kʼoa kʼoati tsakʼétʼasonsa jme xi tjínnele kisʼin je chjota nga koantsje ijngokʼa.

Je chjotakontrale Jesús i kitsole: “Ánni nga tsín síkjitjosonsíni chjotali je kostumbrele nʼaijchákjinná, tonga kjen nioxtila kao ntsja xi likui tsje” (Marcos 7:5). Ali tsa tokuijin xi kitsole nga tokoanejon ntsja je chjotale Jesús. Nʼio tse jmeni xi tsakʼéne nga sʼin je chjota kʼianga koakje̱n, kjaʼaí xi tsakʼéjtenjon nandá ntsja. Je libro xi sa kanikʼaxkiaa kʼoatso nga je naʼmitítjonle chjota judío tokui kjányani jokjoan xjoa̱ xi tjínnele sʼe̱ya nandá xi koa̱nchjén, jñanile nandá xi koa̱nchjén, ʼyani xi kʼoejtenjon nandá ntsja chjota kʼoa jñani tjen koanejon ntsja je chjota.

Jmé xi kitso je Jesús tʼatsʼe kjoatéxoma xi to chjota kisikʼatsen. I kitsole je naʼmitítjonle chjota judío: “Nda kinchjaya Isaías xi tʼatsaon xi chjota jaonkjaín ʼmino. Kʼoasʼin tjítʼa: Je chjotabi bexkónna kao énle, tonga ni̱ma̱le xin tjíona. Lijme xi chjíle nga bexkónna, nga̱ bakóya joni kjoafaʼaitsjen xi tsʼan, kjoa xi toxkia kjoatéxomale chjota. Kinjio kjoatéxomale Niná, nitjosonlao kostumbrele chjota” (Marcos 7:6-8).