Jósʼin kisicha ʼnde jña tsakatio

CHÓTSENLALAI jme xi kjima. Tíbichosjejin Adán kao Eva ya ʼndenaxóle Edén. A ʼyaní ánni.

Kuinga kui kʼoakisʼin xi nʼio chʼaotjín. Kʼoa kuinga kjoañʼai títsjoásínile Jeobá. A ʼyaní jméni xi kisʼin Adán kao Eva.

Kui kʼoakisʼin jmeni xi tsakʼéchjoale Niná. Kʼoakitsole nga koa̱n skine tole yá xi tjín ya ʼndenaxó. Tonga jngo yá xi kʼoakitsole nga tsín koa̱n skine; nga tsakui skine kuiyání. Nga tsʼee Jeobá yá jebi. Kʼoa ʼyañá nga chʼaotjín nga kui chjoe tsojmile xi kjaʼai xi tsʼe, a tsí jaon. Tonga jméni xi koan.

Ñandia nga toje tíjna Eva ya ʼndenaxó, jngo ye̱ tsakjákao. ¡Tokʼoamaná, tsí jaon! Kʼoakitsole Eva nga katakjine tole yá xi kʼoakitsole Niná nga tsín koa̱n skine. Kʼianga Jeobá kisinda je ye̱ likui kʼoasʼin kisinda nga katanchja. Kuinga jngo chjota tíjnasíni xi kisikinchja ye̱ jebi. A ʼyaní ʼyáni.

A litsa jejin Adán. Jéní jngo chjota xi Jeobá kisinda nga kjesa síndajin Sonʼnde. Ánkjení, kʼoa likui matsen. Nʼio ngʼakon koan ánkje jebi. Kʼoasʼin kisikjaʼaitsjen nga je koatexoma joni tsa Niná kʼoa nga je katabitjosonle tikʼoajinni Jeobá. Kʼoa je xokisʼin nga kinchja je ye̱.

Ánkje jebi tsakʼanachale Eva. Kʼianga kʼoakitsole ngajo Niná koa̱nkjoan tsa skine tole je yá, kʼoa koankjainle Eva. Kuinga kiskinesíni, kʼoa Adán kʼoati kiskine. Adán kao Eva likui kisitjosonle Niná, kuinga kisichasíni ʼndenaxó jña tsakatio.

Tonga kuichóka nichxin nga kʼoanaskánasichon ijngokʼani Jeobá ngayeje Sonʼnde jokoanchon ya ʼndenaxóle Edén. Skan jchaa jósʼiain nga koa̱n ya kuijnai kʼoa naskánasichuin. Chótsenlalee jméni xi koanle Adán kao Eva.