Jngo ʼndí xi nda chjota koan, kʼoa jngo xi tsʼen koan

CHÓTSENLA ijngokʼalai Caín kao Abel. Je koanjchínga nga jao. Tsojmi tsakʼéntje Caín. Kui tsakʼéntje tsojmi xi ma chine.

Abel barré tsakʼéntje. Nʼio tsjoake koan nga kisikuinda barréʼndí. Xijekoan, koanyʼai je barré, kʼoa chan jngo nyʼoá koan barré xi kisísinle.

Ñandia kʼianga je Caín kao Abel jngo kjoatjao kitsjoatʼale Niná. Caín kui kitsjoatʼa tsojmi xi tsakʼéntje. Kʼoa Abel kui kitsjoatʼa je barré xi ngisasa ndakji tíjnale. Je Jeobá nda kisasenle Abel kʼoa kao kjoatjao xi kitsjoatʼale. Tonga likui nda kisasenle xi tʼatsʼe Caín kao kjoatjao xi kitsjoatʼale. A ʼyaní ánni.

A litsa tokuijin nga ngisa nda je kjoatjao xi kitsjoatʼa Abel tikʼoajinni tsʼe Caín. Kuinga nda chjota koan Abel. Tsjoake koan Jeobá kao ndsʼe. Tonga tsʼen koan Caín, likui tsjoake koan ndsʼe.

Niná kʼoakitsole Caín nga katasíkʼantjaiya yaole. Tonga Caín likui kisitjosonle. Nʼio jti koanle Caín nga je Niná ngisa nda kisasenle tʼatsʼe Abel. Caín kitsole Abel: “Tjían jinjñáján”. Kʼianga toje tjío, Caín tsakále ndsʼe. Nʼio tsakále saʼnda nga kisikʼien. Jósi ngai ji, a tsí nʼio chʼaotjín jmeni xi kisʼin je Caín.

Ninga kʼienlani Abel, tojo faʼaitsjenle Niná xi tʼatsʼe. Nda chjota koan Abel, kʼoa Jeobá nikʼiajinla síchajin chjota xi kʼoakjoan. Kuinga je Jeobá tsjoá ijngokʼasínile kjoabijnachon je Abel nga kuichoka nichxin. Kʼianga kjoaʼai nichxin je, nikʼiajin ti kuiyáni Abel. Koan kʼoéjna ngantsjai nichxin i̱ Sonʼnde. A tsí naskánatjín nga jchaxkoan chjota xi kʼoakjoan jokoankjoan Abel.

Tonga likui sasénle Niná chjota xi kʼoakjoan jokoankjoan Caín. Kuinga, xi je kisikʼien ndsʼe Caín, kjoañʼai xi kitsjoale Niná kuinga kjin kisikasén, likui tiya tsakʼejnani jña tjío xínkjín. Kʼianga xín ʼnde je kikʼiejna Caín, jngo ndichja kikao xi chjoónle koan.

Caín kao chjoónle kisʼele xti nga je ki nichxin. Kʼoa xtixʼin kao xtiyánchjín xi kisʼesale Adán kao Eva chixán kʼoa kisʼele xti. Sasa koannkjínyani chjota i̱ Sonʼnde. Chótsenla kʼalee.