Jngo chjota xi nʼiojin koan

KʼIANGA je koannkjínya chjota i̱ Sonʼnde, me ngatsʼi nga kui kʼoakisʼin xi chʼaotjín joni tsa Caín. Tonga jngo chjota xi tsín kʼoakisʼin. Enoc tsakʼin. Nʼiojin koan. Je chjota xi tjío nga kʼia tsʼen koan, tonga Enoc Niná kisixále.

A ʼyaní ánni nga kʼoasʼin nʼio chʼaokisʼinsíni chjota. Tikjaʼaitsjenlai jebi: ʼYáni xokisikao Adán kao Eva nga tsínti Niná kisitjosonnile kʼoa nga kiskine je tole yá xi tsakʼéchjoale Niná. Jngo ánkje xi tsʼen koan. Satanás tsole ya Biblia. Kʼoa básjaile josʼin sitsʼenná ngatsʼia.

Jngo nichxin Niná Jeobá kisikasén je Enoc nga kʼoakitsole chjota jngo én xi tsín mele kjuinrʼoé. Kitsole: “Kjoaʼai jngo nichxin nga Niná sikjeson ngatsʼi chjota tsʼen”. Tsakui nichxin nʼio koanjtile chjota nga kʼoatsakʼinle. Tsakui nichxin koanmele nga kisikʼien Enoc. Kʼoa kuinga kjoanʼiojin koanchjénsínile je Enoc kʼianga kʼoakitsole chjota jmeni xi sʼin Niná.

Niná likui kitsjoaʼnde nga nkjín nó tsakʼejnajinle chjota tsʼen je Enoc. Tojan siento kao jankan kaoni aon nó tsakʼejna. Ánni nga to kʼoatjín nó bixónsíñá. Kuinga nʼio taja koan chjota xi tsakatio nga kui nichxin kʼoa ngisa nkjín nó tsakatio. ¡Matusalén je tile Enoc ñajan siento kao jankan kaoni ñajan nó koanle!

Kʼianga je kʼien Enoc, ngisa tsʼen tikoanngáni chjota. Ya Biblia kʼoatso kʼianga “ngayeje jmeni xi kisikjaʼaitsjen ngantsjai tokui xi chʼaotjín”, kʼoa “i̱ Sonʼnde kisʼejna kitse kjoatsʼen”.

A ʼyaní ánni nga kʼoasikji kjoa kisʼesíni nga kui nichxin. Kuinga je Satanás je Na̱i tsakásjaile jokisikao chjota nga kui kʼoakisʼin jmeni xi chʼaotjín. Chótsenlalee jméni.