Xtingʼion xi tsín tongoson koankjoan

NGA jao xti xi faʼaitʼasí ibi likui tongoson kjoan, a tsí mai. A ʼyaní jóʼmi. Je xi cho̱jñá tsoa Esaú ʼmi. Kʼoa je ti xi barrésí tísíkuinda Jacob ʼmi.

Nga jao xtingʼion jebi, Esaú kao Jacob, xtile koan je Isaac kao Rebeca. Je Isaac nʼio tsjoake koan Esaú, nga nʼio koanle kitsoa cho̱jñá kʼoa bichokaole yaniʼyale nga katakjine. Tonga Rebeca ngisa nʼio tsjoake koan Jacob, nga nʼio ndʼé koan.

Je Abraham xi pajchále koanni tojo tíjnakonsa, kʼoa nʼiojin tsjoa koanle Jacob nga kinrʼoéle Abraham nga bʼéyanajmí xi tʼatsʼe Jeobá. Jngo siento kao jankan kao xjaʼaon nóle Abraham nga tochan kʼien. Kʼia xjaʼaonle nó nga jao xti jebi.

Kʼianga je kichole ñachan nó Esaú jao yánchjín xi ya tsʼe Canaán chixankao. Nʼio ba kisʼele Isaac kao Rebeca tʼatsʼe jebi, nga likui Jeobá tsakʼétsʼoale yánchjín jebi.

Tonga, jngo nichxin kʼianga tjín xi koan, kʼoa je Esaú nʼio koanjtile xi kao Jacob je ndsʼe. Kichoka nichxin kʼianga je Isaac tsjoále kjoanichikontʼain je ʼndíle xi títjon kitsin. Nga je títjon Esaú kitsin, kiskoyale nga je kʼoaile kjoanichikontʼain jebi. Tonga Esaú tokʼoa je tsakaténale Jacob kjoanichikontʼain xi bʼakaole tsakai. Kʼianga kitsin nga jao xti jebi, Niná kʼoakitso nga je Jacob kʼoaile kjoanichikontʼain. Kʼoa kʼoakoan. Je Isaac je kitsjoale kjoanichikontʼain jebi je Jacob.

Xijekoan, kʼianga je kisʼejinle Esaú, nʼio koanjtile xi kao Jacob. Kʼoa nga kʼoasikji jti koanle saʼnda kʼoakitso nga sikʼien Jacob. Kʼianga kisʼejinle kjoa jebi Rebeca, nʼio kisikjaojin. Kuinga kʼoakitsosínile Isaac je xʼinle: “Likuijin ska̱ná kʼiatsa Jacob kʼoati je kuixankao yánchjín xokjoan xi i̱ tsʼe Canaán”.

Kuinga Isaac kinchjasínile Jacob je ʼndíle kʼoa kitsole: “Litsa chjoón Canaánjin bixankoai. ʼNdele nga kʼoasʼiain, tʼin ya ndʼiale Betuel pajcháli ya Harán. Je tixankao jngui xtiyánchjínle tile”.

Jacob kisitjosonle nʼaile, kʼoa kjitʼanangi ki jñani tjío xínkjín ya Harán.