Nkjín koansonni yaniʼyale Jacob

CHÓTSENLALAI chjota xi nroatʼasí ibi. Jéní xtile Jacob kʼoa tejao masonni. Kʼoati kisʼele xtiyánchjín. A ʼyaxkon kʼai jotsakʼin je xtile. Kataʼyala kʼa jótsakʼin.

Xi xtile koan Lea jéní Rubén, Simeón, Leví, kʼoa kao Judá. Kʼianga tsabe Raquel nga tsín tísʼele xti, nʼio ba koanle. Kuinga kitsjoasínile Jacob je chjoón choʼndale xi Bilhá tsakʼin, kʼoa Bilhá jao xti kisʼele xi Dan kʼoa Neftalí tsakʼin. Xijekoan, je Lea kʼoati kitsjoale Jacob je chjoón choʼndale xi Zilpá tsakʼin, kʼoa Zilpá jao xti kisʼele xi Gad kʼoa Aser tsakʼin. Xi to jetʼani, Lea ngijao xti kisʼesale xi Isacar kʼoa Zabulón tsakʼin.

Tochan kʼoati kisʼe jngole ʼndí je Raquel. José kitsole. Skansa jchaa xi tʼatsʼe José, nga jngo chjota xi nʼio ngʼa tsakʼejna. Jebi xi tejngo mani xtile Jacob xi ya kitsin nga yasa tíjnakao Labán je nʼaile Raquel.

Jacob kʼoati kisʼe kʼale xtiyánchjín, tonga tojngo mani xi faʼaitʼa jaʼainle ya Biblia. Dina tsakʼin.

Kichoka nichxin nga Jacob kisikʼéjna je Labán kʼoa kini ya Canaán. Kisikatiojtín ngatsʼi yaniʼyale kʼoa ngatsʼi barréle, kao cho̱ntjele kʼoa ki.

Kʼianga toje ya tjío Jacob kao yaniʼyale ya Canaán, Raquel ijngo ʼndí kisʼele. Kʼia kʼoakoan kʼianga tjín jña ki nga tjenya yandia. Likui nda jaʼato Raquel, kʼia kʼien kʼianga kisʼele ʼndí, tonga nda kitsin je ʼndíle. Benjamín kitsole Jacob.

Mená nga sikjaʼaitsjenjian jaʼainle nga tejao xtile Jacob nga yaa jaʼaini naxinandá Israel. Nga tejao ntje̱le Israel, te ntje̱ xi kui jaʼainle xtile Jacob tsakʼa kʼoa jao ntje̱ xi kui jaʼainle xtile José tsakʼa. Nkjínsa nó tsakʼejna Isaac nga je kitsin ngatsʼi xti jebi, kʼoa nʼiojin tsjoa koanle nga kʼoasikji nkjín xtindai kisʼele. Tonga kataʼyala jmeni xi koanle je tsotindaile xi Dina tsakʼin.