Moisés kao Aarón fichókonle Faraón

KʼIANGA kichó ijngokʼani Moisés ya Egipto tsakʼéyanajmíle Aarón je ndsʼe tʼatsʼe choa̱ xi kisakole. Kʼianga Moisés kao Aarón tsakakóle choa̱ jebi je chjota israelita, koankjainle ngatsʼi nga Jeobá tjíokao.

Xijekoan, je Moisés kao Aarón kinrʼoe Faraón. Kitsole: “Jeobá je Ninále Israel kʼoatítso: «Jan nichxin tʼaiʼndelai nga katafi naxinandána, nga katabʼétsʼoana ya ʼndekixí»”. Tonga Faraón kitso: “Likui makjainna xi tʼatsʼe Jeobá. Likui tsjoaʼndele Israel nga koai”.

Koanjtile Faraón, nga je naxinandá koanmele kʼoasjeʼa nichxin nga kʼoetsʼoale Jeobá. Kuinga, ngisa ti nʼio tsakʼénengánile nga kisixá. Jé Moisés tsakánele chjota israelita nga totaon tsaʼya, kʼoa Moisés ba koanle. Tonga Jeobá kʼoakitsole nga tsín katasíkjaojin. Jeobá kitsole: “Kʼoasʼian kʼianga Faraón katatsjoáʼndele naxinandána nga katafi”.

Moisés kao Aarón ti kinrʼoe ijngokʼangáni je Faraón. Jngo choa̱ tsakʼéjnale nga kʼia. Je yá xi yʼa Aarón kisikʼatjenjinʼnde, kʼoa jngo ye̱ xije kji tsakʼóya. Je chjota chjinele Faraón kʼoati kisikʼatsaojinʼnde je yá xi yʼa, kʼoa kʼoati ye̱ tsakʼóya. Tonga ¡koeñá! je ye̱ xi tsʼe Aarón tíkjine je ye̱le chjota chjine. Tojo likui kitsjoaʼnde Faraón nga kitjo je chjota israelita.

Kuinga kichokasíni nichxin nga Jeobá kitsjoale kjoañʼai Faraón. A ʼyaní jókisikao. Te kjoañʼai kisikasénne ya Egipto.

Nga jngó jngó kjoañʼai bichóne, je Faraón nchjale Moisés kʼoa tsole: “Chjaʼaxín kjoañʼai jebi kʼoa tsjoaʼndele nga katafi Israel”. Kʼianga je maxan je kjoañʼai xi bichóne, ti síkʼantjaiyangáni kjoafaʼaitsjenle Faraón. Likuini tsjoáʼndele nga fi je chjota israelita. Tonga xi kichone kjoañʼai xi mani te kʼoakitsole nga katafi.

A ʼyaní nga jngó jngó kjoañʼai jebi. Titjakoai xingoani kʼoa kataʼya jñánile.