Jeobá tsjoá kjoatéxomale

JELA jao sá jaʼato nga kitjoni Egipto je chjota israelita nga kichó ya nindo Sinaí, xi kʼoati Horeb ʼmi. Ya jñanáni tsakjákao Niná je Moisés ya jinyánaʼyá xi tíbʼajnganá. Kʼoa ya tsakatio choatse je naxinandá ya nindo jebi.

Kʼianga kimi Moisés ya nindo, je chjota ya kiskoyale nangini. Je Jeobá ya kʼoakitsole Moisés kʼianga mele nga katasítjosonle je chjota israelita kʼoa nga ñaki tsʼe naxinandá katama. Kʼianga je kinroajenni Moisés, kʼoakitsole je chjota israelita jmeni xi kitsole Jeobá. Kʼoa naxinandá kʼoakitso nga sitjoson, nga mele nga naxinandále Jeobá koa̱n.

Tokʼoamaná jme xi kisʼin Jeobá. Niʼndi̱ kisikitjo ya jko̱nindo, kʼoa síxkonkoan chʼaon xi kisikjane. Kʼoa kʼoati tsakjákao naxinandá kʼoa i̱ kitsole: “Anña Jeobá Nináli xi tsakʼaonsjeli ya Egipto”. Kʼoa kui kjoatéxoma jebi kitsjoale: “Likui tjínneli nga kjaʼaisa niná kʼoétsʼoalai to anña”.

Ngi ñajan kjoatéxoma kitsjoale Niná je chjota israelita. Je naxinandá nʼio kitsokjon. Kitsole Moisés: “Ji tinókjoakaonaijin, nga nokjonnijin, nga tsa Niná kuinchjakaonajin kuiyájinjin”.

Xijekoan, Jeobá kʼoakitsole Moisés: “Nroami i̱ nindo. Jao lajaote tsjoale jñani kakjitʼa kjoatéxoma xi mena nga katasítjoson naxinandá”. Ijngokʼa kimingáni Moisés ya nindo. Ñachan nichxin kʼoa ñachan nitjen nga ya tsakʼejna.

Je Niná nʼio nkjín kjoatéxoma kitsjoale naxinandále. Kʼoa jé Moisés kiski. Je Niná kʼoati kitsjoale Moisés ngajao lajaote. Ya tsakʼétʼa Niná nga te kjoatéxoma xi kitsole naxinandá. Te Kjoatéxoma ʼmi.

Nga Te Kjoatéxoma jebi nʼio chjíle. Tonga kʼoati nʼio chjíle kjoatéxoma xi ngikʼa xi kitsjoale Niná je chjota israelita. Jngo xi i̱ tso: “Tjínneli nga katamatsjoachai Jeobá Nináli kao ngayeje nimali, kao ngayeje kjoafaʼaitsjenli, kao ngayeje kjoabijnachonli kʼoa kao ngayeje nganʼioli”. Kʼoa xi ijngo i̱ tso: “Tjínneli nga katamatsjoachai je xíngi josʼin tsjoachai yaoli”. Je Jesucristo ʼNdíle Niná, kʼoakitso nga kui ngajao kjoatéxoma jebi xi nʼio ngʼa tjío xi kitsjoale Niná naxinandá Israel. Xi koa̱nskanni nkjínsa koya xi kʼia jchaa xi tʼatsʼe je ʼNdíle Niná kʼoa jme xi tsakakóya.