Yá bále Moisés jngo naxi

CHAN jaʼa... ¡te nó, kan nó, kante nó, kanxjaʼaonño nó! Tojoyasa tjío je chjota israelita ya ʼndekixí. Tonga nó xotjín Jeobá kisikuinda naxinandále. Maná kitsjoale xi kiskine. Nga nichxin jngo yojbi tsakájnale xi tsakándiale, kʼoa nga jnjio jngo lʼí tsakándiale. Kʼoa likui kixijnda najñole ni kitjoyajínla ndsoko.

Je sá xi títjon nga je kichó ñachan nó nga kitjoni ya Egipto, tojoya kichóngáni ya Qadés. Tojoya jñanáni tjío kʼianga tejaoná chjota kisikasén Moisés nga kikotsenché ya ʼnde Canaán kʼoa nga kʼia jeme ñachan nó jaʼato. Je Míriam ndichja Moisés ya kʼien Qadés. Kʼoa tojo kjoa kisʼengáni ya ʼnde je.

Tsín nandá xi tsakʼi chjota. Tsakjayojéetʼale Moisés, kitsole: “Tosalanda tsa je kʼainjin. Ánni nga tsakichosjesíninaijin Egipto nga to i̱ ni jaʼaikaonaijin ʼnde xochʼaochon jña tsín jme xi majchá. Ni trigo, ni lenteja, ni higo, ni totseejin ngó tjín ibi. Saʼnda tsín nandá xi ma ʼyoa”.

Kʼianga kikʼétsʼoa Moisés kao Aarón ya jña tíjna ndʼianajño, Jeobá kitsole Moisés: “Tikatíoxkui naxinandá. Kʼoa xijekoan, nga tjíobasen ngatsʼi tinókjoalai naxi xokji. Kʼoa nʼio tse nandá kuitjole xi koa̱n skʼuí naxinandá kʼoa kao ngatsʼi cho̱le”.

Kʼoa Moisés kisikatíoxkó je chjota, kitsole: “¡Tinóʼyao, chjota xi tsín ninʼiotʼao Niná! A je naxi xokji chʼasjenilaijin nandá Aarón kao an”. Xijekoan, Moisés jao kʼa tsakále yá je naxi, kʼoa toxkia tse nandá kitjo. Kisʼe nandá xi tsakʼi ngatsʼi chjota xi ya tjío kʼoa kao ngatsʼi cho̱le.

Tonga koanjtile Jeobá xi tʼatsʼe Moisés kao Aarón. A ʼyaní ánni. Kui kʼianga jé tsakáne yaole Moisés kao Aarón nga kʼoakitso nga je tsakʼasje nandá ya naxi. Tonga jéní Jeobá xokisʼin. Kʼoa nga tsín kʼoakitso Moisés kao Aarón ʼyani xokisʼin, Jeobá kʼoakitsole nga kjoañʼai tsjoále. Kitsole: “Likui jon sikjaʼasʼaon naxinandána ya Canaán”.

Me tiʼakʼia kitjoni je chjota israelita ya Qadés. Xijekoan jngo jao nichxinni ya kichó ya nindo xi Hor ʼmi kʼoa ya kʼien Aarón ya jko̱nindo jebi. Jngo siento kao kanjan nóle nga kʼien. Nʼio ba koanle je chjota israelita, kante nichxin kiskiʼndíantjai Aarón. Xijekoanni jé Eleazar tile Aarón xi naʼmi títjon tsakʼejnale naxinandá Israel.