Jngo xi ché koan ya Israel

¡CHÓTSENLALAI je tsojmi xi tíbinyáñesí ya ndʼianajñole chjota xokji! Jngo najño xi naskánakji, taonsiné kʼoa kao taonchxoa. Yaa Jericó kisiché. Tonga jméni xi tjínnele kinikao tsakai tsojmi xokjoan. A faʼaitsjenli.

Tjínnele nga kinikje tsakai, kʼoa je taonsiné kao taonchxoa ya tjínnele kisatio tsakai ya ndʼianajñole Jeobá. Je chjota xokjoan likui kisitjosonle Niná. Kui kisiché tsojmi xi Niná bʼakaole. Acán ʼmi chjota xokji, kʼoa yaniʼyale je xi tjíokaosí. Kataʼyala jméni xi koan.

Kʼianga je kisiché tsojmi xokjoan je Acán, je Josué kisikasén kʼa chjota xi kikjan kao naxinandá Hai. Tonga kisicha chjota israelita. Kinikʼien kʼa, kʼoa xi ngikʼa kitoka. Je Josué nʼio ba koanle. Tsakjéntʼa nangi nkjaín nga tsakʼétsʼoale Jeobá, kitsole: “Ánni nga tibʼaiʼndesíni nga i̱ kjima”.

Kʼoa je Jeobá kitsole: “¡Tisótjain! Tsakajngijée je naxinandá Israel. Kui kiskoe je tsojmi xi sikjeson tsakai kʼoa kao xi ya satío ya ndʼianajñole Niná. Jngo najño xi naskánakji kiskoe kʼoa lijo tjíotso. Likui sichikontʼainno saʼnda nga koakao je najño xokji kʼoa sikʼaon je xi kiskoe tsojmi jebi”. Je Jeobá kʼoakitso nga je koakóle Josué ʼyáni xokisʼin.

Je Josué kʼoasʼin kisikatíoxkó ngatsʼi je chjota israelita, kʼoa Jeobá tsakʼaonsjejin je chjota xokisʼin, je Acán. Acán kitso: “Tsakajngijéeña. Kʼianga tsaʼbe jngo najño xi naskánakji, kʼoa je taonsiné kʼoa kao taonchxoa. Nʼio koanmena tsojmi xokjoan kʼoa kikaoña. Ya koa̱nsjaino ngayeje ya ndʼianajñona, ya tjíoñe”.

Kʼianga je koansjai tsojmi jebi kʼoa kichole Josué, kitsole Acán: “Ánni nga kjoa jaʼaikaonésíninaijin. ¡Kʼoati sikaonili Jeobá! Kʼoa xijekoan, ngatsʼi chjota tsakasénle lajao je Acán kao yaniʼyale saʼnda nga kʼien. A tsí kui xi bakóyaná jebi nga tsín koa̱n kui chjoe tsojmi xi tsín tsaan.

Xijekoan, je naxinandá Israel ti kikjan ijngokʼangáni kao je naxinandá Hai. Jeobá tsakasenkao ijngokʼangáni naxinandále, kʼoa je kinjele.