Nga kinikatíonʼio saʼnda nga kisʼendaya je xjáo xi kjindai Jerusalén

Kʼianga kinikatíonʼio je chjota israelita ya Babilonia, kichotʼayakao je kjoamakjainle. Sadrac, Mesac kao Abednego jngo ngajá xi ñaki tíbʼajnga kichanisʼen, tonga Niná tsakʼasjentjai nga tsín jme xi koanle. Xijekoanni, nga je kitjoele Babilonia je chjota medo kao persa, je Daniel ya kinikʼatjenya nga̱jao̱ jña tjíoʼya xa, tonga kʼoati tsakasenkao Niná nga tsakʼéchjoa je tsʼoa xa.

Xi jetʼani, Ciro je reyle Persia kisikatíondai je chjota israelita. Tochoa̱ jankan kao te nó kichó ijngokʼani naxinandále nga kʼoasʼin kinikatíonʼio ya Babilonia. Nga kichó Jerusalén kʼoati kui xi títjon kisʼin nga tsakʼéndaya je yo̱ngo̱le Jeobá. Tonga je chjota kontrale tsakʼéchjoale je xá xi tjíosʼín. Kʼia Saʼnda nga je kanjao nó nga kichó Jerusalén nga chan koanjngole yo̱ngo̱.

Kʼoati ʼya xi tʼatsʼe Esdras nga ki ijngokʼani Jerusalén nga tsakʼéndaya je yo̱ngo̱. Kʼia kʼoakoan jebi nga je ñachan ñato nó jaʼato nga koanjngo je yo̱ngo̱. Xijekoanni tejan nó nga kʼoasʼin ki Esdras, je Nehemías kitsjoá nganʼio nga kisʼendaya je xjáo xi kjindai Jerusalén, nga kʼoasʼin kinikixojen. Jé XI MAʼAONNI jebi, kʼoa jngo siento kao ñachantejao nó bichóni saʼnda nga kui nichxin.