Ya tjío jngo cuarto xi sonngʼa tíjna

NGA je koanjngini nga xipe koanjnjio, Jesús kʼoa kao nga tejao pastrole kui xá jaʼaini i̱ cuartoje xokjibi kʼianga kʼoasʼin tsakjen nga tsakʼéjna Paxko. Kʼoa je xi tíbitjosí jéní Judas Iscariote. Ya tífinrʼoe naʼmi nga kʼoakuitsole jósʼin tsoa Jesús.

Jngo nichxin tongini, je Judas tsakjákao je naʼmi kʼoa kitsole: “Jméni xi kʼoainao tsa koasenkaono nga kuindoao Jesús”. Kitsole: “Kante taonchxoa”. Xijekoan, Judas kikonle naʼmi kʼoa ya kikao jñani tíjna Jesús. ¡Jmési chʼao kisʼinni! A tsí jaon.

Kʼianga je tsakjen xi tʼatsʼe Paxko, jngo kjoabichi xi kjaʼainile tsakʼéjna Jesús. Jngo nioxtila kitsjoale pastrole kʼoa kitsole: “Ticho, nga yaona tsoyanile jebi xi kʼoasʼin tsjoa xi totʼatsaon”. Xijekoan, kʼoati kitsjoale jngo chotsín vino, kitsole: “Tʼio, nga jnjínna tsoyanile jebi, xi kʼoasʼin xíjten xi totʼatsaon”. Ya Biblia “cenale Nainá” tsole jebi.

Je chjota israelita kui xá tsakʼéjnani je Paxko nga sikjaʼaitsjenya kʼianga jngo ánkjele Niná “jaʼa” ya ndʼiale nga tsakatio Egipto, kʼoa kisikʼien je ʼndítjonle chjota egipcio. Kʼoa Jesús kʼoasʼin koanmele nga sikjaʼaitsjenya je chjota tjenngile, nga je kʼienntjai. Kui xá tsakʼéjnani kjoabichi jebi xi xki̱nó sʼejna.

Kʼianga je tsakʼéjna je Kjoabichile Nainá, je Jesús kʼoakitsole pastrole nga nʼiojin katama kʼoa nga taja katama kjoamakjainle. Xijekoan, kisele Niná kʼoa ki. Tsakui nichxin je tsʼato basen nitjen nga kʼia. Tonga, jñáni ki.