Kjoaʼmiya 2

Xi nʼió sa nda miyo xi koan sʼe li jé Niná

Xi nʼió sa nda tjín xi koantʼain kui nga miyo le Niná koain. Niná kuitsoya li nga tsjoa sʼe tokuin kʼoa nga tsín jme kjoajkon sʼe li; kjoaʼaxín li kjoamakjain xi tsín kixi kʼoa jña ni le xi mangaʼa xi sikiʼaon ná. Kjuinrʼue li nga kʼoetsʼoa lai. Koasenkao li nga nyʼan sʼe tokuin kʼoa nga tsín jme xi sikjaojin (Salmo 71:5; 73:28). Kʼoa koasenkao li tsa kjoa sʼe li (Salmo 18:18). Xi ijngo sa ni, Niná me le nga tsjoá li jngo kjoatjao: kjoabijnachon xi tsín kʼia fetʼa (Romanos 6:23).

Tsa sichriantʼa lai Niná, koanchriantʼa lai je miyo le Niná. Je miyo le Niná kʼoati miyo li koan. Li tsa tokuijin, ñaki jo ndsʼai sʼin koan. Tsjoa sʼe le nga kuitsoya li xi tʼatsʼe Niná, kʼoa koasenkao li kʼoa sinʼió tokuin.

Likui mangosoan xi kao Niná. Kʼianga kʼoene lai yao li nga miyo le Niná koain, nʼió tjín le kjoandosin nga katamajin li kʼia nga miyo le koain, likui xi tso ni le tsa kʼoasʼin jchatokuin jonikoa xíngía. Jé nʼió, nʼió nkjín nó tjín le, kʼoa ñá sʼa tochoa tjín ná, nʼió ngisa tse xi ma le kʼoa ngisa tse nganʼió tjín le tikʼoa jin ni ñá. Bakin le nga jé Chjotaxá ná koan. Kui nga, tsa me ná nga miyo le koan, tjínne ná nga kuinóʼya le kʼoa kʼoasʼian jotsó ná; tsa kʼoasʼian kjoanda tsáan ñá ngantsjai (Isaías 48:18).