Nga kinikʼien Jesucristo

KʼIANGA je jan nó basen títsoyason Jesús i̱ Sonʼnde be nga tongichoasa nichxin kʼoéjna. Je xi nyatítjonle relijión je kʼoasʼin tjíondajinle nga sikʼien, tonga kitsokjonle je naxinandá, nga je naxinandá koankjainle nga tʼatsʼe Niná kinchjaya Jesús. Tonga je Na̱i jaʼasʼenjin ni̱ma̱le Judas Iscariote nga katabaténa Jesús. Je xi nyatítjonle relijión kante taonchxoa tsakʼéchjíle.

Kʼianga njio nga sʼejna sʼuí Paxko, je Jesús kisikatíoxkó pastrole nga tsakʼéjna sʼuí jebi. Xi je kʼoakitsole nga katabitjo je Judas Iscariote kʼiaa tsakʼéjnabasen je kjoanikjaʼaitsjenya xi Cenale Nainá ʼmi. Kiskoé nioxtila, kitsjoa kjoanda kʼoa kitsjoale nga tejngo je pastrole, kitsole: “Jebi yaonaní xi tsjoa xi tʼatsaon, kʼoatʼiaon kuibi jméni nga nda kʼoéjintakonsínináo”. Xijekoan, jngo cho̱tsín bino kitsjoale kʼoa kitsole: “Je cho̱tsínbi jéní xi kjoachjotse xi bʼendakoa kao njínna xi xíjten tʼatsaon” (Lucas 22:19, 20).

Nga kui nitje̱n, nʼio tse xi kitsoyasale pastrole. Saʼnda jngo kjoatéxoma chjotse kitsjoale josʼin koakole kjoatsjoacha xínkjín. Kitsole: “Kʼuisʼin skoe̱ ngatsʼi nga jonnío chjotana, tsa kʼoasʼin matsjoachao xíngio” (Juan 13:34, 35). Kʼoakitsole chjotale nga tsín katasíkinroajen kon tʼatsʼe jme xi koa̱ntʼain, kʼoa xijekoan nʼio tsakʼétsʼoantjai. Nga je koan, kisele Niná kʼoa kʼia ki ya ʼnde jña Getsemaní ʼmi.

Ya ʼnde jebi, je Jesús tsakasén xkóle kʼoa tsakʼétsʼoale Jeobá. Tonga toʼikoan kicho sondado, kao chjota xi yʼa yá kao ki̱cha̱ kʼoa kao naʼmi kʼianga tsoa̱ Jesús. Kʼianga jchale ʼyani Jesús, je Judas tsakʼéndsoʼa Jesús josʼin je tsakʼéndajin kao chjota. Je sondado kʼiaa tsakánʼio Jesús kʼoa kikao, tonga je pastrole tsakanga.

Kʼoa nga je ya tíjna ngixko̱n chjotaxále chjota judío kʼoakitso nga ʼNdíle Niná ma. Je chjota xokjoan kʼoakitso nga Niná tínchjaʼaonle kʼoa nga kjoabiya bakinle. Kʼoa kʼiaa kisikaséntʼale je chjotaxá Poncio Pilato. Je Pilato tsabení nga tokjoatjao jme xi kjimatʼain Jesús, tonga je naxinandá tsakʼéjta nga katanikʼien Jesús kʼoa kuinga chan kisijyosíni je Pilato.

Je chjota ya kikao je Cristo ya ʼnde jña Gólgota ʼmi, kʼoa ya tsakátʼa yá je sondado romano. Kʼoa nyisenla nga toʼikoan koannjio sonʼnde. Nga je koanxon, kʼianga je kʼien Jesús jngo cháon jaʼa. Je Jesús ya kisʼeñe ya jngo tsjó jña kitjoʼaikjá jngo na̱xi̱. Kʼoa xi je koannyaonni, je naʼmi tsakʼéxá nga katasʼechjoanda je tsjó kʼoa nga katamakuinda. A je toya kichajin Jesús. Majain. Xijekoan, jngo kjoaxkón tsakʼéjna Niná xi nisañandiajin kʼoama.

(Yaa yʼangini Mateo kapítulo 26 kao 27, Marcos kapítulo 14 kao 15, Lucas kapítulo 22 kao 23 kao Juan kapítulo 12 saʼnda 19.)