ʼYáni je Jesús

Je Jeobá kisikasén i̱ Sonʼnde je Jesús (1 Juan 4:9)

Nʼio tongini nga kjesa mandajin Adán, jngo ánkje kisinda Jeobá xi tse nganʼio tjínle kʼoa xi ngʼa xále. Tsa mená nga tsjoa sʼe̱le Jeobá xi tʼatsaan, tjínnená nga kuinóʼyalee ánkje jebi.

Xi jeki nichxin, je Jeobá kisikasén ánkje jebi i̱ Sonʼnde, yaa Belén kitsin kʼoa Jesús tsakʼin. Kʼoa jé kisʼele ʼndí jebi jngo chjoónxongó xi María tsakʼin (Juan 6:38).

Kʼianga tsakʼejna Jesús i̱ Sonʼnde nda chjota koan, tsjoake koan chjota kʼoa kiskoéyanda toʼyani, ñaki kʼoakoankjoan jokjoan je Nʼaile. Kʼoa kitsoya jokjoantjínni xi tʼatsʼe Jeobá, alikui kitsokjon.

Ninga nda kisʼin je Jesús nʼio nkjín chjota xi jtike koan (1 Pedro 2:21-24)

Je Jesús kisindaya chjota xi chʼin tjínle kʼoa kisikjaʼáyale kʼien.

Je chjotatítjonle relijión jtike koan Jesús, nga̱ je Jesús tsakʼéjnatsen nga to kjoandiso tjíotsoya kʼoa nga tsín kixi jme xi tjíosʼín.

Jé chjota xi nyatítjonle relijión xokisʼin nga kʼoasʼin tsakále Jesús je chjota romano kʼoa nga kisikʼien.