KJOAʼMIYA 17

Jósʼin binyakaoná je superintendente xi tsʼe circuito

Jngo superintendente xi jtín síxatʼa kʼoa kao chjoónle — Malaui

Jngo superintendente xi jtín síxatʼa kui tíbándiaa je kjoajtín xi sʼejna nga mangínkʼinyasoán — Tsoyale je xíngiaa josʼin kuitsoyason

Jngo superintendente xi jtín síxatʼa xi tíbakóyason — Fikao je xíngiaa nga fitsoyason

Jngo superintendente xi jtín síxatʼa jngo kjoajtín tíjna kao je xi chjotajchínga sʼin tjío — Batiojtín kao je xi chjotajchínga sʼin tjío

Ya Escrituras Griegas Cristianas síkʼaxki̱ kjitʼa je Bernabé kʼoa kao pastro Pablo. Nga jao chjota jebi superintendente koan kʼoa kisíxatʼa je jtín xi tjío nga kʼia. Ánni kʼoakisʼinsíni. Kuinga nʼio koanndosinle je xi tongóson sʼin koankjainle. Je pastro Pablo nʼio koanmele nga koaisíxatʼa ijngokʼa je ndsʼe̱ kʼianga skoe̱ josʼin tjíoni. Ki ninga nʼio kjin nga kitsjoánganʼiole je ndsʼe̱ (Hechos 15:36). Kʼoakjoánti tjío kon ndʼaibi je superintendente xi tsʼe circuito.

Sínʼiojinná. Je superintendente xi tsʼe circuito kanla jtín kjinentsja kʼoa jngó jngó fisíxatʼa nga xki̱ xomana. Yaa batiokao jtín jebi kʼoa jao kʼa síxatʼa nga xki̱ nó. Koaan chja̱kaonajmiá ndsʼee xi kʼoasʼin tjíosíxá, kʼoa tsa jechixan kʼoati koa̱n chja̱kaonajmiá je yánchjínle. Tsa kʼoasʼiaan nʼio koasenkaoná jokji kjoafaʼaitsjen jetjínle. Bʼénele yaole nga bexkon ngatsʼi je ndsʼee, ninga xi jejchínga kʼoa ninga xi sʼa xti. Kʼoati nʼio tsjoa male nga fikaoná nga mangínkʼinyasoán kʼoa nga mangínkakoyalee je chjota xi jetiʼmiyalee Biblia. Ndsʼee jebi kʼoati fikao je xi chjotajchínga sʼin tjío nga fisíxatʼa je ndsʼee. Kʼoati tsjoá kjoanokjoaya ya jinjtín kʼoa ya kjoajtíntse xi satío, kʼoa je kjoanokjoaya xi tsjoá nʼio sínʼiojinná (Hechos 15:35, NM).

Mandosinle xi tʼatsaan. Je superintendente xi tsʼe circuito kui xi ngisa fini josʼin tjío ngixko̱n Niná je jtín. Batiojtín kao je xi chjotajchínga sʼin tjío ya jinjtín kʼoa kao xi siervo ministerial ma nga fáoyani josʼin kjimaxá ya jinjtín kʼoa tsjoále kjoafaʼaitsjen tsa jñani tsín kʼoasʼin tjíobitjosonle xále. Kʼoati binyakao je xi precursor sʼin tjíosíxá nga ndasa sʼin katatsoyason. Nʼio tsjoa male kʼianga bexkon je chjota xi tosʼa tjíobichó ya kjoajtínná kʼoa nga tjíobʼénele yaole nga tjíosítjosonle Niná. Nga jngó jngó ndsʼee jebi, ñaki kao kjoatsjoa tjíosíxá xi totʼatsaan (2 Corintios 8:23). Chjénngia kjoamakjainle kʼoa kao josʼin tjíobexkón je Niná (Hebreos 13:7).

Jmé xá bichósíxatʼani je jtín je superintendente xi tsʼe circuito.
Jméni xi koa̱n sʼiain nga ngisasa tse kjoanda so̱koli kʼianga bichósíxatʼa je jtín je superintendente.