KJOAʼMIYA 26

Ánni nga kjoatsʼen tjínni kʼoa nga kjoañʼai chjaʼañá

Koaan chʼasjai

Kʼianga tjín xi ma, nkjín chjota xi i̱ tso: “Ánni kʼoakamani”. Yaa Biblia tsoya xi tʼatsʼe jebi.

1. Jméni xi kisʼin je Na̱i nga kjoatsʼen tjínni i̱ Sonʼnde

Je Na̱i kontra kile je Niná. Je Na̱i kui xi koanmele nga je koanentsja ngayeje, kuinga tsakásjainile jokisʼin nga kʼoati tsín kisitjosonle Niná je Adán kao Eva. Kʼoa jé Eva tsakʼanachale (Génesis 3:1-5). Je Na̱i kui xi koanmele nga kʼoasʼin katasíkjaʼaitsjen je Adán kao Eva nga tse xi tísʼechjoale kʼoa nga tsín kixi tíjna jmeni xi kjimatʼain. Kuikjoánni xi kitso nga ngisa nda koatio je chjota kʼiatsa tsín sitjosonle je Niná. Jé Na̱i títjon kinchja̱ énndiso kʼianga kʼoakitsole je Eva nga tsín kuiyá. Je Biblia kʼoatso nga je Na̱i “ndiso nga je, kʼoa nʼaile kjoandiso” (Juan 8:44).

2. Jókisʼin je Adán kao Eva

Je Jeobá nʼio tse jmeni xi kitsjoale je Adán kao Eva. Kʼoakitsole nga koa̱n ski̱ne je tole yá xi tjín ya ʼndenaxó kʼoa tojngoo xi tsakʼéchjoale (Génesis 2:15-17). Ninga nʼio nkjín yá tjín, je Eva “kiskoé je to xi yale yá [xi kisʼechjoale] kʼoa kiskine. Xijekoan, kʼoati kitsjoale je xʼinle” kʼoa kʼoati kiskine (Génesis 3:6). Nga kʼoakisʼin, alikui kisitjosonle Niná. Je Adán kao Eva alikui ngale nga kui kʼoasʼin xi chʼaotjín nga̱ chjotatsje koan. Ñaki toxá kisʼinni nga tsín kisitjosonle Niná. Nga kʼoakisʼin tsakajngijée kʼoa kui tsakakó nga tsín mele nga je Niná koatexomale. Nʼio tse kjoañʼai tsakatiojin nga kʼoakisʼin (Génesis 3:16-19).

3. Jósʼin tíbʼakaotʼaná jmeni xi kisʼin je Adán kao Eva

Kʼianga tsakajngijée je Adán kao Eva kʼoati tsʼakaotʼale jée ngatsʼi xtile. Je Biblia itso xi tʼatsʼe Adán: “Kui je xi jée ʼmi jaʼasʼenjin sonʼnde xi totʼatsʼe jngo chjota. Kʼoasʼin tjín kjoabiya xi totʼatsʼe jéebe. Kʼoa je kjoabiyabe kʼoasʼin kitsaotʼale ngatsʼi chjota” (Romanos 5:12).

Tonga, ánni nga kjoañʼai chjaʼañá. Kuinga sakʼoa tsín nda chosonnilee jmeni xi nʼia. Kʼoati sakʼoa kui kʼoamani nga tsín nda sʼín je chjota. Kʼoa sakʼoaje̱ kuinga tokjoataon xi ma nga yakjoán tijnaa nga tjín xi ma (tʼexkiai Eclesiastés 9:11).

KATAʼYASAI JME XI TÍNCHJA̱NI

Kataʼyala ánni nga tsín ndatjínni tsa je Niná kjoáne nga kjoañʼai tjín kʼoa nga kjoatsʼen tjín i̱ Sonʼnde kʼoa jósʼe kon kʼianga kjoañʼai chjaʼá.

4. Je xi tjínle jée kʼianga kjoañʼai chjaʼá

Nkjín chjota xi kʼoasʼin síkjaʼaitsjen nga je Niná kjinentsja sonʼnde, tonga a kʼoatjín. Chótsenlao VIDEO.

VIDEO: ʼYá xi kjinentsja Sonʼnde (1:24)

Tʼexkiao Santiago 1:13 kao 1 Juan 5:19 kʼoa cho̱bayaño jebi:

A jé Niná tjínle jée nga kjoatsʼen kʼoa nga kjoañʼai tjín.

5. Josʼin tíbichómani nga je Na̱i kjinentsja je sonʼnde

Chótsenlao VIDEO.

VIDEO: Ánni nga títsjoáʼndeni Niná nga kjoañʼai tjín (video xi tochoa tíjna) (3:07)

Tʼexkiao Génesis 3:1-6 kʼoa cho̱bayaño jebi:

Jmé énndiso xi kinchja̱ je Na̱i (chótsenlao versículo 4 kao 5).
Jmé én xi kisichjén je Na̱i nga kʼoakitsole chjota nga kui tíbʼéchjoale Jeobá je xi ndatjín.
Jmé én xi kisichjén je Na̱i nga kʼoakitso nga tsín machjén nga Niná koatexomaná kʼianga tsjoa sa̱tío tokoán.

Tʼexkiao Eclesiastés 8:9 kʼoa cho̱bayaño jebi:

Jósʼin tjío je chjota nga tsín je Jeobá tíbatéxomale.

Sén: Jokjimachon je sonʼnde saʼnda nga sʼa koannda kʼoa saʼnda nga jeʼndenaxó koa̱n. A. Chon sase sasee. B. Jokji tjíobatéxoma je chjotaxá sonʼnde tísʼe religión ndiso, xkoa̱ya tjío chjota, tjín kjoajchán, kʼoa jechitson sonʼnde. Naxinandá xi nʼio tse nganʼio kisʼele, jolani Egipto, China, Grecia, Roma, Alemania, Gran Bretaña kao Estados Unidos. C. Chjota nga jeya tjío ya sonʼndenaxó.

Je Adán kao Eva chjotatsje tsakai kʼoa yaa tsakatio ya ʼndenaxó, tonga jé Na̱i tsakʼaʼénle kʼoa kontra kile je Jeobá
Nga tsín kisitjoson je Adán kao Eva, kisʼe jée, kjoañʼai kʼoa kao kjoabiya
Je Jeobá kjoaʼaxin je jée, kjoañʼai kʼoa kao kjoabiya. Chjotatsje koa̱n ijngokʼá kʼoa yaa kuiyoaa ya ʼndenaxó

6. Je Jeobá aon male nga kjoañʼai chjaʼá

A mandosinle Niná nga kjoañʼai chjaʼá. Kataʼyala jmeni xi kiski je rey David kʼoa kao je pastro Pedro. Tʼexkiao Salmo 31:7 kao 1 Pedro 5:7 kʼoa cho̱bayaño jebi:

Jósʼe tokuin nga ʼyai nga kuenta sʼín je Jeobá je kjoañʼai xi bitjatojiaan kʼoa nga aon male.

7. Je Niná kjoaʼaxin je kjoañʼai xi chjaʼá

Tʼexkiao Isaías 65:17 kao Apocalipsis 21:3, 4 kʼoa cho̱bayaño jebi:

Je Jeobá kʼoatso nga kjoaʼaxin ngayeje kjoañʼai xi tjíojin je chjota. Nga jeʼyai jmeni xi sʼin je Niná, jósʼe tokuin.

A ʼyaní

Je Na̱i énndiso tsakáne je Jeobá. Jebi kui xi tsonile nga kisijndí je jaʼaínle Jeobá nga kʼoakitso nga tsín nda batéxoma kʼoa nga tsín nda chjota. Kʼianga kjoaʼaxin Jeobá je kjoañʼai xi tjíojin je chjota kʼoasjetsjee je jaʼaínle. Xi tsonile, koako nga toje xi nda batéxoma. Nga kʼoasjetsje je jaʼaínle Jeobá kui xi ngisa chjíle (Mateo 6:9, 10).

TJÍNKʼA XI I̱ TSO: “Tokotʼayakaolaná Niná kʼianga kjoañʼai síkjaʼáná”.