Jósʼin bʼasjentjainá je kjoabiyale Jesús

Je Adán kao Eva alikui kisitjosonle je Niná, kuinga chjotajée mañá, nga kjoañʼai chjaʼañá kʼoa nga mʼeñá.a Tonga alikui tongantsjai nga kʼoasʼin kuiyoaa. Je Jeobá jé Jesús kisikasén nga koa̱n ndái kuiyolee je jée kʼoa kao kjoabiya. Je Biblia kʼoatso nga tsakʼéchjíntjainá je Jesús kʼianga kʼien. Kʼianga ʼya xi machjíntjai ndái bʼejna, kʼoa je Jesús kui kjoabijnachonle kitsjoa nga tsakʼéchjíntjainá (tʼexkiai Mateo 20:​28, TNM). Tsa jelani Jesús xi kʼoasʼin koanmele koanjin nga i̱ tsakʼejna i̱ Sonʼnde ngantsjai, tonga kitsjoa kjoabijnachonle xi totʼatsaan. Nga kʼoakisʼin koaan sʼe̱ ijngokʼaná je kjoanda xi kisicha je Adán kao Eva. Je Jesús tsakakó jokji tsjoakená kʼoa jokji tsjoakená je Jeobá. Je kjoaʼmiya jebi koasenkaoná nga ngisa chjí jchaa nga kʼoasʼin kʼienntjainá je Jesús.

1. Jósʼin basenkaoná ndʼaibi nga kʼienntjainá je Jesús

Nga chjotajée maa nkjín koya tjínni jmeni xi nʼia xi tsín sasénle je Jeobá. Tonga koaan nga miyole Niná koaan tsa kʼoakoa̱nniná je jéená kʼoa tsa kʼoétsʼoalee je Jeobá nga katasíchatʼaná xi kao jaʼaínle Jesús. Kʼoa nga kʼoénelee yaoná nga tsín tikui jée kuijnyíñá (1 Juan 2:1). Je Biblia itso: “Tojngo kʼa, ndiaa tsakjaʼánʼio kjoañʼai Cristo xi totʼatsʼe kjoatsʼen. Je xi tjínle kjoakixi tsakjaʼá kjoañʼai xi tʼatsʼe xi tsínle kjoakixi” (1 Pedro 3:​18).

2. Jósʼin koasenkaoná nichxin xi sʼa nroa nga kʼoasʼin kʼienntjainá je Jesús

Je Jeobá kui xá kisikasénni je ʼNdíle “jméni nga ngatsʼisíni xi makjainle tʼatsʼe [Jesús], likui cha̱, tonga tjínle kjoabijnachon ngantsjai” (Juan 3:​16). Nga kʼoasʼin kʼienntjainá je Jesús, je Jeobá jeme kjoaʼaxin ngayeje je kjoa xi tjín xi totʼatsʼe nga tsín kisitjoson je Adán. Jebi kui xi tsonile, nga koa̱n kuiyoaa ngantsjai nichxin tsa koakoá nga makjainná xi tʼatsʼe kjoabʼechjíntjaile Jesús (Isaías 65:​21-​23).

KATAʼYASAI JME XI TÍNCHJA̱NI

3. Nga kʼoasʼin kʼienntjainá je Jesús ndái sʼin síkatíoná xi tʼatsʼe jée kao kjoabiya

VIDEO: Ánni nga kʼiensíni Jesús (xi títjon) (2:​01)

• Jmé kjoanda xi kisicha je Adán nga tsín kisitjosonle je Niná.

Tʼexkiao Romanos 5:​12 kʼoa cho̱bayaño jebi:

• Jósʼin bʼakaotʼali je jée xi tsakajngi je Adán.

Tʼexkiao Juan 3:​16 kʼoa cho̱bayaño jebi:

• Jmé xá kisikasénni Jeobá je ʼNdíle i̱ Sonʼnde.

1. Chjotatsje tsakai je Adán, tonga nga tsín kisitjosonle je Niná, kui kisikakinná je jée kao kjoabiya

2. Je Jesús chjotatsje koan, kʼoa nga kisitjosonle je Niná, koaan kʼoati chjotatsje koaan tsanda ñá kʼoa koaan kuiyoaa ngantsjai nichxin

4. Nga kʼienntjainá je Jesús binyakaoná ngatsʼiaa

VIDEO: Ánni nga kʼiensíni Jesús (xi majaoni) (2:​00)

• Jókoanni nga tojngo chjota tsakʼéchjíntjaini ngatsʼi chjota.

Tʼexkiao 1 Timoteo 2:​5, 6 kʼoa cho̱bayaño jebi:

• Je Adán chjotatsje koan tsakai, tonga kʼianga tsakajngijée, kui jée kao kjoabiya kisikakinle ngatsʼi chjota. Je Jesús kʼoati chjotatsje koan. Jmé xi kisʼin nga tsakʼéchjíntjainá ngatsʼiaa.

5. Nga tsakʼéchjíntjainá je Jesús, jngoo kjoatjao xi je Jeobá kitsjoaná

Je xi miyole Jeobá ma, be nga jngo kjoatjao tsakʼaile nga kʼoasʼin tsakʼéchjíntjainá je Jesús. Jngola choa̱ kataʼyaa. Tʼexkiao Gálatas 2:​20 kʼoa cho̱bayaño jebi:

• Jókitso je pastro Pablo nga chjí tsabe nga tsakʼéchjíntjai je Jesús.

Nga tsakajngijée je Adán kjoabiya tsakʼaile kʼoa kʼoati tsʼakaotʼale je ntje̱le. Tonga je Jeobá kisikasén je ʼNdíle i̱ Sonʼnde nga kʼienntjainá ánni nga koa̱n kuiyosíñá ngantsjai nichxin.

Kʼianga kʼoéxkiai texto jebi, cha̱niyai jkui jokisʼe kon je Jeobá kʼianga kjoañʼai tsakjaʼá je ʼNdíle. Tʼexkiao Juan 19:​1-7 kao 16-​18 kʼoa cho̱bayaño jebi:

• Jósʼe tokuin tʼatsʼe jmeni xi kisʼin Jeobá kao Jesús xi totʼatsi.

XI KACHOTʼAYÁ

Nga kʼoasʼin kʼienntjainá je Jesús, je Jeobá síchatʼaa je jéená kʼoa koaan kuiyoaa ngantsjai nichxin.

Jmé xi kamajinli

• Ánni kʼiensíni je Jesús.

• Jósʼin tsakʼéchjíntjaini Jesús ngatsʼi chjota.

• Jósʼin basenkaoli je kjoabiyale Jesús.

XI KOASENKAOSALI

Kataʼyai ánni nga koan tsakʼéchjíntjaininá je Jesús.

“Jósʼin nga nkjín chjota tsakʼéchjíntjaini je Jesús nga kitsjoa kjoabijnachonle” (Yaa faʼaitʼa ya Internet ya jw.org)

Kataʼyai jme xi koa̱n sʼiaan nga kuitjo̱ntjé.

“Jósʼin bʼasjentjainá je Jesús” (Yaa faʼaitʼa ya Internet ya jw.org)

A síchatʼaná je Jeobá ninga tse jée kabijnyaa.

“Jmeni xi chjonangiaa xi tʼatsʼe Biblia” (Xo̱n xi Bájinkonná, 1 sá mayo nó 2013)

Kʼianga koanjinle josʼin tsoyanile je kjoabʼechjíntjaile Cristo, tsakasenkao nga kisikʼantjaiya yaole.

“Alikui titsjoake̱ña kjoatsʼen” (Yaa faʼaitʼa ya Internet ya jw.org)