KJOAʼMIYA 42
Jótso je Biblia tʼatsʼe xi sʼa tjíotoje kʼoa kao xi jechixan
Tjínkʼa ʼnde jñani kʼoasʼin síkjaʼaitsjen je chjota nga tokʼia tsjoa satío tokoán kʼianga jebixaan. Tonga alikui kʼoatjín, nga̱ tsín tsa tongatsʼi chjota xi jechixan xi tsjoa tjío kon, kʼoa tsín tsa tongatsʼi xi sʼa tjíotoje xi ba tjío kon. Je Biblia kʼoatso nga jngo kjoatjaole Niná ni sʼa toñá tiyoaa kʼoa ni jechixán.
1. Jmé kjoanda xi tjenkao nga tsín bixaan
Je Biblia kʼoatso nga je xi bixan nda sʼín kʼoa je xi tsín bixan, ngisa nda sʼín (tʼexkiai 1 Corintios 7:32, 33, 38). Ánni kʼoatsosíni Biblia nga “ngisa nda sʼín” je xi tsín bixan. Kuinga je xi tjíotoje tsínkui síkjáojin jméni xi koa̱nchjénle je xʼinle kʼoa tsa chjoónle. Ngisaa tiʼndele jmeni xi sʼín. Tjínkʼa xi ngisa choa ñʼai male nga síxále je Niná. Tobʼelañá, tjínkʼa xi xin ʼnde fitsoyason. Xi ijngosani, ngisaa tsjoále nichxin nga kotʼaya je Énle Niná.
2. Jmé kjoanda xi tjenkao nga bixaan
Kʼianga bixaan kʼoati tse kjoanda tjenkao joni kʼianga toñá tiyoaa. Je Biblia itso: “Tongisa nda nga jao mani chjota tikʼoajinni nga tojngo mani” (Eclesiastés 4:9). Nda batio xi jechixan kʼianga fitjenngi je kjoafaʼaitsjen xi faʼaitʼa Biblia. Je xi bixan kʼoatsole xínkjín nga tsjoake koa̱n, nga skoe̱xkón kʼoa nga sikuinda xínkjín, kuinga ngisa nda bationi tikʼoajinni je xi tobatiokao xínkjín, xi tsín bixan. Xi ijngosani, kʼianga kabixankao xínkjín je chjota ngisaa nda síjchá je ʼndíxtile.
3. Jósʼin síkjaʼaitsjen je Jeobá xi tʼatsʼe kjoabixan
Kʼianga kisikixan Jeobá je chjota xi títjon tsakatio i kitso: Je xʼin sikʼéjnaa “je nʼaile kʼoa kao na̱le kʼoa jé chjoónle kʼoéjnakao” (Génesis 2:24). Je Jeobá kui xi mele nga tsjoake katama xínkjín je xi xʼin kao xi chjoón jokjitse koatio. Tokʼiaa tiʼndele nga tsjión xínkjín tsa sichajngitʼale xínkjín. Je Niná kʼoatso nga je xi kuitsoni je xi kanichajngitʼale, tsa tsjión xínkjín kʼoa tsa mai (Mateo 19:9).a Je Jeobá alikui tsjoáʼnde nga nkjín yánchjín kuixankao je xi chjotale Cristo ma (1 Timoteo 3:2).
KATAʼYASAI JME XI TÍNCHJA̱NI
Kataʼyala jméni xi koa̱n sʼiain nga tsjoa sʼe̱ tokuin kʼoa nga tsjoa sʼe̱ kon je Jeobá ninga tijnatoji kʼoa ninga jechixain.
4. Nda tixálai Niná nga sʼasa tijnatoji
Je Jesús kʼoakitso nga tse kjoanda tjenkao kʼianga toñá biyoaa (Mateo 19:11, 12). Tʼexkiao Mateo 4:23 kʼoa cho̱bayaño jebi:
Nga tsín chixan je Jesús, jméni xi kisʼin nga tsakasenkao xi kjaʼaí kʼoa nga nda kisixále je Nʼaile.
Je chjotale Cristo xi tjíotoje koaan tsjoa sa̱tío kon nga sixále je Niná tojo kisʼin je Jesús. Chótsenlao VIDEO kʼoa cho̱bayaño jebi:
Jmé xi koa̱n sʼin je xi sʼa tjíotoje.
A ʼyaní
Je Biblia alikui kʼoatso jotjín nóná nga jekoa̱n kuixaan. Tonga kʼoatso nga chóyala josaʼnda nga kjoaʼato kjoaxtiná, kui kʼoatsoni nga̱ je xi sʼa xti kui xi mele nga tjín xi kjoáyokao kʼoa kje nda síkjaʼaitsjenjin (1 Corintios 7:36).
5. Nda chjoéjin ʼya xi kuixankoai
Nʼio chjíle nga nda chjoéjiaan ʼyani xi kuixankoaa. Tʼexkiao Mateo 19:4-6, 9 kʼoa cho̱bayaño jebi:
Ánni nga nʼio chjínile nga ndakjoanla skósonnile ʼyáni xi kuixankao jngo chjotale Cristo.
Je Biblia kʼoatso jótjínnele sʼin jngo xʼin kʼoa tsa jngo chjoón xi jekabixan. Tonga je xi ngisa nda, kuinga je kuixankoai je xi tsjoake je Jeobá.b Tʼexkiao 1 Corintios 7:39 kao 2 Corintios 6:14 kʼoa cho̱bayaño jebi:
Tsa jngo chjotale Cristo xi mele kuixan, ánni nga tjínnesínile je skoéjin xi tongóson sʼin makjainle.
Tsa jngo chjotale Cristo xi je kuixankao jngo chjota xi tsín tsjoake Jeobá, jósʼe̱ kon je Jeobá, jósingái ji.
Kʼiatsa jao cho̱ xi tsín mangóson si̱kʼényi skuiʼaon nga jao. Kʼoakjoánti koa̱n je chjotale Cristo tsa je kuixankao je xi tsín tsjoake Jeobá, tse kjoa sʼe̱le
6. Chjí jchai je kjoabixan jokji chjí be je Jeobá
Nichxin kjoatse tjínkʼa je chjota israelita xi totjín totjen kjoa kitsjionni je yánchjínle. Tʼexkiao Malaquías 2:13, 14, 16 kʼoa cho̱bayaño jebi:
Ánni jtikeni Jeobá nga totjín totjen kjoa tsjionni xínkjín chjota, tsa tsín ʼya xi kjoachajngi kasʼín.
Kʼianga síchajngitʼale xínkjín xi jechixan kʼoa nga tsjion xínkjín miʼaon je xi tsín jme jée kasʼele kʼoa kao ʼndíxtile
Chótsenlao VIDEO kʼoa cho̱bayaño jebi:
Tsa tsín Jeobá tísíxále je xi chixankoai, jméni xi sʼiain nga nda kuiyokao xíngio.
7. Titjosuin je kjoatéxoma xi tsjoá je Jeobá xi tʼatsʼe kjoabixan
Tjínjinkʼa xi ñʼai koa̱nle nga sitjoson je kjoatéxoma xi tsjoá je Jeobá xi tʼatsʼe kjoabixan.c Tonga je Jeobá síchikontʼain je xi bʼénele yaole. Chótsenlao VIDEO.
Tʼexkiao Hebreos 13:4 kʼoa cho̱bayaño jebi:
A kʼoakoa̱nná nga si̱tjosoán jotso kjoatéxomale Jeobá xi tʼatsʼe kjoabixan, jósingái ji. Ánni.
Je Jeobá kui xi mele nga je xi chjotale Cristo ma, katasʼeyole xo̱n kjoabixanle kʼoa tsakuije̱ xo̱n xi sʼenda kʼianga tsjion xínkjín, nga̱ kʼoatso kjoatéxoma xi tjínle je chjotaxá kʼoa me ngakjijnda Sonʼnde nga kui kjoatéxoma tjín. Tʼexkiao Tito 3:1 kʼoa cho̱bayaño jebi:
Tsa jechixain a kijnali je xo̱n kjoabixanli, kʼoa a chjíle xo̱n jebi ngixko̱n chjotaxá.
TJÍNKʼA XI I̱ TSO: “A kjoanʼio machjén nga kuixan xi tsʼe chjotaxá”.
Jósingái ji.
XI KACHOTʼAYÁ
Kʼianga toñá biyoaa kʼoa kʼianga bixaan jngoo kjoatjao xi tʼatsʼe Jeobá tínroani. Tsa toñá tiyoaa kʼoa tsa jechixán koaan tsjoa sa̱tío tokoán tsa kʼoasʼiaan josʼin mele Niná.
Jmé xi kamajinli
Jméni xi ngisa tiʼndele nga sʼin je xi sʼa tjíotoje.
Ánni kʼoatsoni je Biblia nga je chjotale Cristo toje tjínnele kuixankao je xi tongóson sʼin makjainle.
Jótso je Biblia, kʼiáni nga koa̱n tsjión xínkjín je chjota.
XI KOASENKAOSALI
Jmé xi tsoyanile nga toje kuixankoaa je xi “tjíokao Nainá”.
Jaola koya kataʼyaa xi koasenkaoná nga nda chjoéjiaan ʼyáni xi kuixankoaa.
Kataʼyai ánni nga ñaki kʼoatjínni kon jngo ndsʼee nga ngisa tse kjoanda kitsjoale Jeobá tikʼoajinni jmeni xi kisikʼéjna.
Jméni xi tjínnele kuenta sʼin jngo chjotale Cristo nga kjesa tsjionjin kʼoa nga kjesa síkatíojin xínkjín.
“Jchaxkoán je xi Niná tsakʼékjao” (Xo̱n xi Bájinkonná, diciembre 2018)
a Yaa nota 4 koa̱nsjaitʼali tʼatsʼe nga binyatʼaxinle xínkjín je chjota, kʼianga tsín kasíchajngitʼale xínkjín.
b Tjínkʼa ʼnde jñani nga je xi xijchá ma bajngile xtile ʼyani xi kuixankao. Ya jñani kʼoama, je xi xijchá ma tjínnele kuenta sʼin tsa tsjoake Jeobá je xi kuixankao je tile kʼoa tsa tsotile, nga̱ kui jebi xi ngisa chjíle, tikʼoajinni tsa tao̱n tjínle kʼoa tsa nkjín tsojmi tjínle.
c Kʼiatsa kje bixankaojin je xi tijnakoai, ji xi síni tsa kuixankoai kʼoa tsa si̱katío xíngio.