KJOAʼMIYA 47
A jetijnandai nga kʼuínsʼenngindái
Jojekji tse nga tichotʼayai je Biblia, ngisaa kjimajinli xi tʼatsʼe Jeobá. Kʼoa nga tinitjosuin jmeni xi kjimajinli, tsakui nichxin jetinikʼantjaiyai yaoli. Ningalani jekʼoatinʼiai, tsakui nichxin tjín xi tíbʼéchjoali nga tsín tibʼaitʼanilai yaoli je Jeobá kʼoa nga tsín tiʼmisʼenngindáni. I̱ kjoaʼmiya jebi kui chótʼayajiaan jotjíosʼín kʼa je xi tjíokotʼaya Biblia nga tjíofisʼenngindá kʼoa jméni xi koa̱n sʼiain ji nga kʼuínsʼenngindái.
1. Jókji tjínnele jchai jmeni xi tso je Biblia nga kjesa ʼmisʼenngindájin
Nga koa̱n kʼuínsʼenngindái tjínnele koa̱njinli jotjínni xi kjoakixi (1 Timoteo 2:4). Ali tsakuijin xi tsonile nga tjínnele jchai ngayeje jmeni xi tsoya je Biblia. Ninga je xi jekjoatse kisʼenngindá, tojo machjénle nga tosi tonda skótʼaya jmeni xi tso je Biblia (Colosenses 1:9, 10). Tonga je xi machjén nga koa̱njinli kui je xi ngisa chjíle xi faʼaitʼa ya Biblia. Jé xi chjotajchínga sʼin tjío ya jinjtín kʼoakuitsoli tsa jemajinli jmeni xi tso je Biblia.
2. Jméni xi machjén nga sʼiain nga kjesa ʼmisʼenngindájin
Je Biblia itso: “Tikʼantjaiyao tsokʼoa kjoafaʼaitsjenno, katabʼantjaiyanio” (tʼexkiai Hechos 3:19). Kui jebi xi tjínnele sʼiain nga kjesa ʼmisʼenngindájin. Kui xi tsonile nga kʼoakatamanili je jée xi tsakijnyi kʼoa nga kʼoakʼuínlai je Jeobá nga katasíchatʼali. Kʼoati kui xi tsonile nga tsín tikui kʼoasʼianni xi chʼaotjín kʼoa nga meli kʼoasʼin kʼuínkoai yaoli josʼin sasénle Niná. Xi ijngosani, kʼoati kui xi tsonile nga ntsjaintsjai kʼuín je kjoajtín xi satío kʼoa nga kʼuínyasuin kao je ndsʼee ninga kje ʼmisʼenngindájin.
3. Ánni nga tsín ndatjínni nga tokui tsín kʼuínsʼenngindáni nga nokjuin
Tjínkʼa xi tsokjón, nga̱ kʼoasʼin síkjaʼaitsjen nga tsín kuitjosonle jmeni xi kuitso nga sʼin. Sakʼoajin kui kʼoasʼiain xi tsín sasénle je Niná, kʼoati koan sakʼoa je choʼndale Niná xi bʼaxki̱ ya Biblia. Tonga kuenta tʼiain nga je Jeobá ali tsakuijin koyale nga chjotatsje koa̱n je choʼndale (tʼexkiai Salmo 103:13, 14). Je Jeobá tsjoa sʼe̱ kon tsa kʼoénelai yaoli jokji tjen kʼoakoa̱nli. Xi ijngosani, jé Jeobá koasenkaoli. Je Jeobá kʼoatsoná nga nijmejin “xi koa̱n kjoaʼaxinná je kjoatjaochale Niná” (tʼexkiai Romanos 8:38, 39).
KATAʼYASAI JME XI TÍNCHJA̱NI
Tsa ñʼai kjimali nga kʼuínsʼenngindái, jaola koya kataʼyaa xi koasenkaoli. Xi títjon, nga ngisa nda jchaxkuin je Jeobá. Xi majaoni, nga kʼoakʼoaí tokuin nga je koasenkaoli.
4. Ngisa nda kataʼyaxkuin je Jeobá
Jókji tjínnele jchai xi tʼatsʼe Jeobá nga kjesa ʼmisʼenngindájin. Kui xi kuitsoni tsa jetsjoachai kʼoa tsa jetinitjosonlai. Chótsenlao VIDEO ánni nga jchasíni jmé xi tjíosʼín kʼa je xi tjíokotʼaya Biblia. Xijekoa̱n, cho̱bayaño jebi:
Tojo sʼin kaʼyaa ya video, jméni xi tsakinyakao kʼa je xi sʼa tjíokotʼaya je Biblia nga kisʼenngindá.
Tʼexkiao Romanos 12:2 kʼoa cho̱bayaño jebi:
A tjín jmeni xi to jao bʼé tokuin jmeni xi tsoya je Biblia. Jósingái ji, a ñaki kʼoatjín jmeni xi tsoya je testigole Jeobá.
Tsa jmeni xi jao bʼé tokuin, jméni xi koa̱n sʼiain.
5. Katachókjoajinli tojme kjoa xi kuitjátojin
Toxá kjoa bitjatojinñá kʼianga bʼaitʼalee yaoná je Jeobá kʼoa kʼianga mangínsʼenngindá. Jngola choa̱ kataʼyaa. Chótsenlao VIDEO kʼoa cho̱bayaño jebi:
Jmé kjoa xi jaʼatojin Narangerel nga je Jeobá kisixále.
Nga tsjoake koan je Jeobá, jósʼin tsakasenkao nga kichokjoajinle je kjoa xi jaʼatojin.
Tʼexkiao Proverbios 29:25 kao 2 Timoteo 1:7 kʼoa cho̱bayaño jebi:
Jméni xi basenkaoná nga nʼiojin maa kʼianga kjoa bitjatojiaan.
6. Kʼoatʼai tokuin nga je Jeobá koasenkaoli
Jé Jeobá koasenkaoli nga kuitjosonli jmeni xi mele. Chótsenlao VIDEO kʼoa cho̱bayaño jebi
Ánni nga tsín kitsoni kon nga kisʼenngindá je chjota xi faʼa ya video.
Jméni xi tsakasenkao nga je Jeobá kisinʼiotʼa.
Tʼexkiao Isaías 41:10, 13 kʼoa cho̱bayaño jebi:
Ánni nga tsín koa̱n jao kʼoéni tokuin nga kuitjosonli jmeni xi kʼuínlai je Jeobá kʼianga kʼoaitʼalai yaoli.
7. Tʼailai kjoanda je Jeobá nga tsjoakeli
Kʼiatsa kuenta sʼiain jokji tsjoakeli je Jeobá, koa̱nmeli kʼoailai kjoanda kʼoa koa̱nmeli nga je si̱xálai tokʼia saʼndani. Tʼexkiao Salmo 40:5 kʼoa cho̱bayaño jebi:
Jñánile kjoatjao xi títsjoáli je Jeobá xi ngisa chjí ʼyai.
Je profeta Jeremías nʼio tsjoake koan je Jeobá kʼoa kao je énle Jeobá, kʼoa kʼoati chjí tsabe nga choʼndale Jeobá koan. I kitso: “Je énli [...] kui xi tsjoa tsakáya tokoan kʼoa tsjoa tsakʼé ni̱ma̱na, nga̱ jaʼaínli yʼa, Jeobá” (Jeremías 15:16). Cho̱bayaño jebi:
Ánni nga jngoni kjoanda nga testigole Jeobá maa.
A meli kʼuínsʼenngindái ánni nga testigole Jeobá koa̱nni.
A tjín tsa jmeni xi bʼéchjoali nga kʼuínsʼenngindái.
Jmé xi koa̱n sʼiain nga koa̱n kʼuínsʼenngindái.
TJÍNKʼA XI I̱ TSO: “Tsa tsínni kʼoasʼin kuitjosonna jmeni xi tso je Biblia kʼianga jekjuísʼe̱nngindá”.
A kʼoatisʼin nikjaʼaitsjain.
XI KACHOTʼAYÁ
Je Jeobá koasenkaoli nga tsín jme xi kʼoechjoali nga koa̱n kʼuínsʼenngindái.
Jmé xi kamajinli
Jókji tjínnele koa̱njinli jmeni xi tso je Biblia nga koa̱n kʼuínsʼenngindái.
Jméni xi tjínnele sʼiain nga koa̱n kʼuínsʼenngindái.
Ánni nga tsín koa̱n nga tokui kjoajkon kʼoechjoanili kʼiatsa meli kʼuínsʼenngindái.
XI KOASENKAOSALI
Chótʼayajin jméni xi tjínnele sʼiain nga kjesa ʼmisʼenngindájin.
“A jetijnandai nga kʼuínsʼenngindái” (Xo̱n xi Bájinkonná, marzo 2020)
Kataʼyai jméni xi koa̱n sʼiain nga tsín jme xi kʼoechjoali nga kʼuínsʼenngindái.
“Jmé xi bʼéchjoana nga koa̱n kjuísʼe̱nngindá” (Xo̱n xi Bájinkonná, marzo 2019)
Chótsenlai jmé xi kisʼin jngo chjota nga kisikʼéjna jmeni xi bʼéchjoale tsakai nga fisʼenngindá.
Nga títjon, to jao kisʼe kon je Ataa tsa koaisʼenngindá kʼoa tsa mai. Chótsenlai video jméni xi tsakasenkao nga chan kisʼenngindáni.