KJOAʼMIYA 54
Jmé xá xi sʼín “je choʼnda xi nʼiotʼakon, xi nda be xá”
Je Jesús jéní xi ngʼajko̱ tíjnale je jtín (Efesios 5:23). Nichxin xi tiyoaa ndʼaibi, yaa tjen ngʼajmi tíbándiaanile je chjotatjenngile kʼoa jé tísíchjén “je choʼnda xi nʼiotʼakon, xi nda be xá” (tʼexkiai Mateo 24:45). Jesoaa Jesús kiskoejin choʼnda jebi, kuinga tjínnile ʼnde nga je koandiaaná kʼoa nga si̱tjosonlee. Ninga kʼoalani, je choʼnda jebi jé Jesús sítjosonle kʼoa binyakao je ndsʼe̱ Cristo. ʼYáni choʼnda jebi kʼoa jósʼin síkuindaná.
1. ʼYáni “je choʼnda xi nʼiotʼakon, xi nda be xá”
Je Jeobá sakʼoa jngo kʼoa sakʼoa nkjín chjota síchjén nga bándiaale je naxinandále (Malaquías 2:7; Hebreos 1:1). Tobʼelañá, kʼianga jekʼien Jesús, jé pastro kʼoa kao xi chjotajchínga sʼin tsakatio ya Jerusalén tsakándiaale je jtín (Hechos 15:2). Tojo koan nichxin kjoatse, nichxin xi tiyoaa ndʼaibi, kʼoati jngo jtín mani je chjota xi bándiaale je naxinandále Niná kʼoa Cuerpo Gobernante ʼmile. Je choʼnda jebi jé tsjoáná jmeni xi machjénná xi tʼatsʼe Niná tínroani kʼoa jé bándiaa josʼin tíʼmiyason. Je Cuerpo Gobernante jéní “je choʼnda xi nʼiotʼakon, xi nda be xá” (Mateo 24:45a). Ngatsʼi xi ya tjíojinle Cuerpo Gobernante kao nganʼiotsjele Niná kitjoejinni kʼoa kui koyale nga ya koatexomakao Jesús ya ngʼajmi.
2. Jmé xá xi kjinele je choʼnda xi nʼiotʼakon
Je Jesús kʼoakitso nga kui xá kjinele je choʼnda xi nʼiotʼakon nga tsjoále je chjotale Cristo “xi koakje̱nni nga fichó choa̱le” (Mateo 24:45b). Tojo ma je tsojmi xi chinee nga tsjoánganʼioná, kʼoatisʼin basenkaoná ngayeje xi ya yʼangini je Énle Niná, tsjoáná nganʼio nga kixi mangíntʼalee je Jeobá kʼoa nga nitjosoán je xá xi tsakánená je Jesús (1 Timoteo 4:6). Je xo̱n kao video xi Énle Niná yʼangini, kao kjoajtín kʼoa kao kjoajtíntse xi satíoná kui xi basenkaoná nga ngisa mamiyoaa je Jeobá kʼoa nga majinná jmeni xi mele. Ngayeje jebi kui xi tsjoáná je choʼnda xi nʼiotʼakon.
KATAʼYASAI JME XI TÍNCHJA̱NI
Kataʼyala ánni machjénsíni nga je koandiaaná “je choʼnda xi nʼiotʼakon, xi nda be xá”, xi tsonile, je Cuerpo Gobernante.
Je Cuerpo Gobernante jé bándiaale je testigole Jeobá xi tjío jngo tjíjtsa Sonʼnde, tsjoále jme xi machjénle xi tʼatsʼe Niná kʼoa binyakao
3. Je naxinandále Jeobá tjínnele jtín sixá
Jé Jesús bándiaale je Cuerpo Gobernante nga bʼéndajin jme xá xi sʼín je testigole Jeobá. Kʼianga siglo 1, kʼoati je Jesús tsakándiaale je jtín xi kisatio nga kʼia. Chótsenlao VIDEO.
Tʼexkiao 1 Corintios 14:33, 40 kʼoa cho̱bayaño jebi:
Tojo tso texto jebi, a kui xi mele je Jeobá nga jtín sʼin katasíxá choʼndale. Ánni.
4. Je choʼnda xi nʼiotʼakon jé bʼéndajin josʼin ʼmiyasoán
Je chjotale Cristo xi títjon tsakatio kui ngisa kitsjoale kjoandosin nga kitsoyason. Tʼexkiao Hechos 8:14, 25 kʼoa cho̱bayaño jebi:
ʼYáni xi tsakándiaale josʼin kitsoyason je chjotale Cristo xi títjon tsakatio.
Jméni xi kisʼin je Pedro kao Juan kʼianga kʼoakitsole je pastro xi ngikʼa jmeni xi tjínnele sʼin.
Je xá xi ngisa chjíle xi bʼéndajin je Cuerpo Gobernante kui josʼin ʼmiyasoán. Chótsenlao VIDEO.
Je Jesús kʼoakitso jokji chjíle nga ʼmiyasoán. Tʼexkiao Marcos 13:10 kʼoa cho̱bayaño jebi:
Ánni nga kui xi nʼio tsjoánile kjoandosin je Cuerpo Gobernante josʼin tíʼmiyason.
Ánni nga machjénsíni nga “je choʼnda xi nʼiotʼakon, xi nda be xá” kʼoendajin josʼin tíʼmiyason jngo tjíjtsa Sonʼnde.
5. Je choʼnda xi nʼiotʼakon jé bándiaaná
Jé Cuerpo Gobernante bándiaale je ndsʼee xi tjío jngo tjíjtsa Sonʼnde. Jósʼin kosonnile jmeni xi bʼéndajin. Kataʼyala jokisʼin je cuerpo gobernante xi tsakʼejna nichxin kjoatse. Tʼexkiao Hechos 15:1, 2 kʼoa cho̱bayaño jebi:
Jmé kjoa xi kisoko nga siglo 1 xi tsín kisasen kʼale chjotale Cristo.
ʼYáni xi kikonle je Pablo, Bernabé kʼoa kao chjotajchínga xi ngikʼa nga tsakʼéndajin kjoa jebi.
Tʼexkiao Hechos 15:12-18 kao 23-29 kʼoa cho̱bayaño jebi:
Nichxin kjoatse, jméni xi kisʼin je cuerpo gobernante nga je Niná katabándiaale josʼin kʼoendajin kjoa jebi (chótsenlao versículo 12, 15 kao 28).
Tʼexkiao Hechos 15:30, 31 kao 16:4, 5 kʼoa cho̱bayaño jebi:
Jókisʼin je chjotale Cristo xi tsakatio nichxin kjoatse kʼianga kʼoakitsole je cuerpo gobernante jmeni xi tjínnele sʼin.
Jósʼin kisichikontʼain je Jeobá kʼianga kisitjoson.
Tʼexkiao 2 Timoteo 3:16 kao Santiago 1:5 kʼoa cho̱bayaño jebi:
Kʼianga jme xi bʼéndajin je Cuerpo Gobernante ʼyáni xi síjéle kjoafaʼaitsjen.
TJÍNKʼA XI I̱ TSO: “Tsa je Cuerpo Gobernante si̱tjosonlee, to chjotajinni tinitjosonlee”.
Ánni nga makjainnili nga je Jesús tíbándiaale je Cuerpo Gobernante.
XI KACHOTʼAYÁ
Je Cuerpo Gobernante jéní “je choʼnda xi nʼiotʼakon, xi nda be xá” je xi kiskoejin Jesús. Choʼnda jebi jé bándiaale kʼoa jé tsjoále xi tʼatsʼe Niná tínroani je chjotale Cristo xi tjío jngo tjíjtsa Sonʼnde.
Jmé xi kamajinli
ʼYáni xi kiskoejin “je choʼnda xi nʼiotʼakon, xi nda be xá”.
Jósʼin síkuindaná je Cuerpo Gobernante.
Jósingái ji, je Cuerpo Gobernante a jéní “je choʼnda xi nʼiotʼakon, xi nda be xá”.
XI KOASENKAOSALI
Kataʼyai jósʼin síxá je Cuerpo Gobernante nga bitjosonle je xá xi kjinele.
“Jméni xi Cuerpo Gobernante tsole je testigole Jeobá” (Yaa faʼaitʼa ya Internet ya jw.org)
Kataʼyai jmeni xi sʼín je Cuerpo Gobernante nga ñaki kʼoatjín jmeni xi tsoyaná xi tʼatsʼe Niná.
Ñaki kʼoatjín jmeni xi tso je xo̱n xi bʼasje naxinandále Niná (17:18)
Jósʼin síkjaʼaitsjen je xi ya tjíojinle Cuerpo Gobernante tʼatsʼe je xá xi tsakánele je Jesús.
Jé Jeobá bándiaale je Cuerpo Gobernante nga batíonda jme xi faʼa ya kjoajtín xi satíoná kʼoa kao je kjoajtíntse.