Je kjoafaʼáyale Jesús kjoabijnachon tsoyanile

KʼIANGA kʼoasʼin jaʼáyale Jesús nʼio chjíle xi kao ñá. Je pastro Pablo kitso: “Cristo jekinikjaʼáyajinnile je xi kʼen. Je xi koan tjonle je xi jekʼen. Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota jaʼai kjoafaʼáyale xi kʼen. Josʼin xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni” (1 Corintios 15:20-22).

Je Jesús kʼiaa jaʼáyale nga 16 sá nisán nga nó 33. Kʼianga kui nichxin jebi, je chjota judío kʼiaa tsjoátʼale Jeobá ya yo̱ngo̱ Jerusalén je tsojmi xi títjon majchále. Kʼianga kʼoakitso Pablo nga “koan tjonle je xi jekʼen” kui xi kitsonile nga tjíosa chjota xi kjoaʼáyale.

Je én xi kitsosa je Pablo ya bakóyaná jmeni kjoanda xi tje̱nkao je kjoafaʼáyale Jesús, kitso: “Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota jaʼai kjoafaʼáyale xi kʼen”. Xi totʼatsʼe jée xi tsakajngi Adán biyañá ngatsʼiaa. Kʼianga kʼoasʼin kitsjoa je yaole Cristo nga tsakʼéchjíntjainá kʼoa nga jaʼáyanile, ndaí kisikatíoná xi tʼatsʼe jée kao kjoabiya. Ya Romanos 6:23 nʼio nda bakóyaná jokitso Pablo xi tʼatsʼe jebi, kitso: “Je chjíle jée kjoabiya ní, tonga je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá”.

Je Jesús kʼoakitso jokji chjíle xi kao ñá je kjoabiyale kao kjoafaʼáyale. Nga kinchja̱ni xi tʼatsʼe kʼoakitso nga kjoaʼáyanile “jméni nga ngatsʼisíni xi makjainle tʼatsʼe Jesús, likui cha̱, tonga tjínle kjoabijnachon ngantsjai. Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:14-16).

Chaniyalai jkui kʼianga jesʼe̱ kjoabijnachon xi tsínkʼia fetʼa kʼoa nga tsín tisʼeni kjoaʼaon kʼoa kao kjoañʼai (Apocalipsis 21:3, 4). Nʼio tse kjoanda tje̱nkao jebi. Jngo chjotachjine xi i̱ kitso: “Je tsjó kui síkjaʼaitsjenná nga tochoa nichxin biyoaa, kʼoa je kjoafaʼáya kui síkjaʼaitsjenná nga tochoa nichxin kʼoéjna je kjoabiya”. Likui jao tjínná: je kjoafaʼáyale Jesús kjoabijnachon tsoyanile.