Je pornografía, a síkiʼaonná axo tsín josíkaoná

Je nichxin xi tiyoaa ndʼaibi nʼio tjín pornografía.a Faʼa ya telebisión, tjín pelíkula xi kui bakó, faʼaitʼa tsa rebista, tsa ya jña tjín xi saténa, ya Internet kʼoa kao videojuego. Tjín canción xi kui nchja̱ni kʼoa tjínje̱ teléfono jñani ma básjai chjota kʼoa jokjoansa ki̱cha̱ xi tjín. Kʼoati kui kaníya jko̱ je chjota nga tokjoan tomani najño xi bʼakjá. Kʼoati tjín pájina tsʼe Internet jñani ma síkasénle xínkjín chjota je foto xi tsʼe pornografía. Je chjota alikui tichʼaosʼin beni kjoa jebi. Sa nkjín sa nkjín chjota xi pornografía tsjoake kʼoa sa mame sa mamele. Ngisa totjíosʼín ndʼaibi tikʼoajinni nichxin xi jaʼato (chótsenlai rekuadro xi tso: “Jotjín chjota xi pornografía kotsenle”).

Josʼin síkjaʼaitsjen ndʼai chjota xi tʼatsʼe pornografía kʼoati nʼio tíbʼantjaiya. Jngo maestra xi Gail Dines ʼmi i kitso: “Je sén xi tjín ndʼaibi xi tsʼe pornografía ñaki matsenyeje jmeni xi sʼín chjota, kʼoa kuinga tsín tichʼaotjín manile chjota je pornografía xi chʼaotjín koanle ngasʼa”.

Jósʼin nikjaʼaitsjenngái ji. A tobʼétsaojinná axo síkiʼaonná. Je Jesús i kitso: “Ngayije yá xi nda, bale to xi nda, tonga je yá xi tsín nda, bale to xi chʼao kjoan” (Mateo 7:17). Jmé kjoa síkʼéjnajinná je pornografía. Nga jchaa, janla koya tjínni xi chótʼayajiaan.

Jósíkao chjota je pornografía

JOTSO XI KUI KOTʼAYASON: Je chjota ñaki mangakaole pornografía, saʼnda kʼoatso je chjota xi kui kotʼayason kʼoa kao chjinexki nga yaxó mangóson je droga xi crack ʼmi.

Je Brian,b ñaki tokui xá kisʼin nga pornografía kiskotsenle ya Internet kʼoa itso: “Alikui tikoan kisikʼéjnaña. Joxi droga nyajinna koanna. Ñaki likui tinda kisʼeni kjoafaʼaitsjenna, ñaki bʼatséña kʼoa makjine jkoa. Tsakasjele josʼin nga koa̱n sikʼéjna tsakai tonga alikui koan, nkjín nó kichomani nga chan kisikʼéjna”.

Je xi nʼio matsjoake je pornografía bʼéʼmatʼain yaole. Tojé bʼa yaole kʼoa nʼio bʼanacha. Kuinga tokjin sʼín kʼasíni kʼoa soa male, nʼio síkjaojin, nʼio ba male kʼoa nʼio síjtile yaole. Kʼoa saʼnda tjínkʼa xi kʼoasʼin síkjaʼaitsjen nga sikʼien yaole. Je Sergio me to nyaon nyaon kisʼin descargar pornografía ya teléfonole, kʼoa i kitso: “To an tsakʼa yaona kʼoa ñaki koanjen koankjána. Lijme chjína koanna, ʼbeña nga jée tibajngia, toʼan tijna koanna. Li tomala kji soa koanna kʼoa kitsokjonña, kuinga tsín kisijésíña nganʼio”.

Ninga tokjoaʼatoya xkoaan kʼoa ninga tokjoataon xi koa̱n nga pornografía jchaa kʼoati chʼaosʼin bichómani. Je chjoón chjinexki xi Judith Reisman ʼmi jngo én kitsjoa ya ngixko̱n kjoatéxoma xi tíjna ya Estados Unidos, chjoón jebi kui nʼio básjaiya jotjínni xi tʼatsʼe pornografía, i kitso: “Je sén xi tsʼe pornografía síkitsón xokoajkoaa, ngotjo sʼeyani jkoaa kʼoa alikui tichajinniná, kʼoa nʼio ñʼai tjínle nga jngokʼa cha̱jinná”. Je Susan, xi sʼa xjaʼaonño nóle, totsabeská je pornografía ya Internet kʼoa likui tikoan kisikʼéjnani nga koanskanni, kʼoa itso: “Je sén xi tsaʼbe ñaki jeya kisʼeya jkoa. Toʼima faʼaitsjenna ninga tsín mena. Tochale likui tikʼia cha̱jinnina”.

XI TOFETʼANI: Je pornografía jngoyale choʼnda sʼin síkatío chjota kʼoa nʼio síkiʼaon xi kui kjoa tsaojin (2 Pedro 2:19).

Jósikao familia je pornografía

JOTSO XI KUI KOTʼAYASON: “Je pornografía síkixoya je kjoabixan kʼoa kao familia.” (The Porn Trap [Je che̱n xi tsʼe pornografía], xi tsʼe Wendy kao Larry Maltz.)

Je pornografía síkixoya je kjoabixan kʼoa kao familia...

• ... nga̱ likui tisínʼiotʼani xínkjín, likui titsjoa sʼenile nga tjíokao xínkjín, likui titsjoake mani xínkjín xi jechixan (Proverbios 2:12-17).

• ... nga̱ to kjoangʼakon bʼetʼale chjota, alikui tinda satíoni kon kʼoa likui tinda sʼenile josʼin tíjnakao tsa chjoónle kʼoa tsa xʼinle (Efesios 5:28, 29).

• ... nga̱ kui binyá kjoafaʼaitsjenle xi chʼaotjín kʼoa kui símekon (2 Pedro 2:14).

• ... nga̱ kʼoatsole je chjota nga katabʼénele tsa chjoónle kʼoa tsa xʼinle nga kʼoakatasʼín josʼín je chjota xi xá pornografía sʼín (Efesios 5:3, 4).

• ... nga̱ bʼanachale xínkjín xi jekabixan, ni to kjoafaʼaitsjenle koaiya kʼoa ninga ñaki kʼoasʼin (Mateo 5:28).

Je Biblia kʼoatso nga tsín koa̱n kʼoanachale xínkjín xi jechixan (Malaquías 2:16). Kʼianga bʼanachale xínkjín bixoya kjoabixanle kʼoa binyatʼaxinle xínkjín kʼoa tsamaije̱ bʼéjnda xo̱n kjoabixanle, kʼoa nga kʼoama kʼoati miʼaon tsanda je ʼndíxtile.

Je pornografía kʼoati nʼio bʼetʼale tsanda je ʼndíxti. Je Brian itso: “Kʼianga sʼa te nóna, je rebista xi tsʼe pornografía xi kjiole je pana kʼia koansjaina nga tísiská kʼianga tibatejnaʼma. Kiskotsenʼmale, kʼoa saʼnda tsín tsaʼbe ánni nga kui koantsjoakeña sén xokjoan. Kʼoa ñaki kui koanngakaona saʼnda nga koanjchínga”. Je chjota xi kui kotʼayason xi tsʼe pornografía kʼoatso josíkao je xti je pornografía, kjoachajngi símekon ninga sʼa choa nóle, xáchajngi sʼín, ñaki kao kjoatsʼen josíkao je xi síchajngikao kʼoa sakʼoa likui tinda satíoni kjoafaʼaitsjenle.

XI TOFETʼANI: Je pornografía jngoyale veneno nga̱ kjoaʼaon kʼoa kjoañʼai síkatíojin chjota kʼoa likui timatsjoakeni xínkjín (Proverbios 6:27).

Jótso Biblia xi tʼatsʼe pornografía

JE BIBLIA ITSO: “Tinyachʼaolao yaono, joni tsa tinikʼaon yaono, tʼatsʼe je kjoa xi tjín sonʼnde: kjoachajngi, kjoajndí, kjoachi̱nga̱, kjoa xi mele xi chʼao tjío, kjoaxintakon, xi joni tsa xi bexkón xkóson” (Colosenses 3:5).

Xi tochoa én, je Jeobác nʼio jtike je pornografía. Tonga ali tsakuijin xi tsonile tsa tsín sasénle Niná nga fayokao xínkjín chjota xi jechixan. Je Niná kʼoasʼin kisinda je chjota nga koa̱n kjoáyokao xínkjín nga jekabixan kʼoa nga siñakon yaole xínkjín, nga jtín sʼin koatio kʼoa nga tsjoa sa̱tío kon nga sʼe̱le xti (Santiago 1:17).

Kʼoa ánni kʼoabixónsíñá nga jtike Jeobá je pornografía. Kataʼyala kʼaa anni.

• Je Jeobá bení nga tsín tinda bationi je chjota xi pornografía tsjoake (Efesios 4:17-19).

• Je Niná tsjoakená kʼoa likui mele nga yaoná si̱kiʼoaan (Isaías 48:17, 18).

• Likui mele nga kjoa katabatiojin xi jechixan kʼoa kao je familia (Mateo 19:4-6).

• Mele nga tsje kjuinkoaa yaoná kʼoa nga koakolee kjoaxkóntokon je xi ngikʼa (1 Tesalonicenses 4:3-6).

• Mele nga jchaxkoán yaoná jokisikjoanná xi chjotaa, xi xʼin kao xi yánchjín, likui mele nga tosi̱skákoaa yaoná (Hebreos 13:4).

• Je Niná bení nga je pornografía tsín kixi tíjna josʼin fayokao xínkjín chjota, to yaole fini kʼoa josʼín tʼatsʼe Na̱i nroani (Génesis 6:2; Judas 6, 7).

XI TOFETʼANI: Je pornografía likui tindasʼin síkatíoni chjota ngixko̱n Niná (Romanos 1:24).

Je Jeobá bakóle kjoamatokon ʼyani xi mele nga ndaí koatiole kjoa jebi. Je Biblia itso: “Je Jeobá tjínle kjoamatokon kʼoa nda chjota, likui tokjoan síjtile yaole kʼoa nʼio tse kjoanda kao kjoatsjoacha tjínle. Kʼoa nda be josʼin koanndaa, kʼoa faʼaitsjenle nga to chaoñá” (Salmo 103:8, 14). Je Niná kʼoatsole je chjota xi nangi tjío kon nga katasíjéle nganʼio ánni nga koakosínile kjoamatokon kʼoa koasenkaosíni kʼianga koa̱nchjénle (Hebreos 4:16; chótsenlai je rekuadro xi tso: “Jósʼiain nga koa̱n si̱kʼéjnai je pornografía”).

Nkjín mani chjota xi tjíotsjoáʼnde nga tjíotsjoánganʼiole je Niná. A tjíobasenkao. Kataʼyala jmeni xi tso je Biblia josʼin tsakasenkao chjota jme kjoa xi tsakatiojin ngasʼa, itso: “Tonga jetsakaneyao yaono, jekoantsjeyao, jejetʼa jéeno, kao je jaʼaínle je Nainá Jesucristo, kʼoa xi totʼatsʼe je Espíritu Santo xi tsʼe Nináná” (1 Corintios 6:11). Ngatsʼi chjota jebi kʼoati tso jokitso pastro Pablo: “Ngayeje tojmeni nʼio tjínna nganʼio nga kʼoasʼin tíjna je xi títsjoána nganʼio” (Filipenses 4:13, TNM).

Je Susan, koanle kisikʼéjna je pornografía kʼoa itso: “Tojékjoán Jeobá xi male basenkaoná nga nikʼéjnaa kjoa jebi. Kʼiatsa si̱jélee nganʼiole kʼoa si̱jélee nga katabándiaaná, tsje koanngínkoaa yaoná kʼoa nda kuiyoaa ngixko̱n. Je Niná nikʼiajinla tsjiónkonná”.