XI NGISA TÍNCHJA̱NI REBISTA JEBI: A MELI JCHAI JMENI XI BAKÓYA JE BIBLIA

Koaan kʼuínyale Biblia toʼyani

Jin xi testigole Jeobá maijin nʼio ʼyanajin nga ʼmiyasuinjin. Tonga, a ʼyaní nga ngakjijnda Sonʼnde kʼoati ʼmiyalaijin Biblia toʼyani xi mele skótʼaya.

Jngo chjota xi Biblia tíkotʼaya ya tʼaxále

Kʼianga nó 2014, tsʼato jin miyón testigole Jeobá xi tsʼato 9,500,000 estudio xi tsʼe Biblia kitsjoa nga xki̱ sá xi 240 naxinandáyʼai kao ʼnde.a Jngo siento kao ñachanla mani je naxinandáyʼai xi tsín kʼoatjín chjota tjínle jotjín mani je chjota xi ʼmiyale Biblia.

Kʼianga ʼmiyalaijin chjota, me jngo jmi basen miyón xo̱n chʼasjaijin nga xki̱ nó, jolani tsa Biblia, libro, rebista kao foyeto, kʼoa ñatola siento én tíbitjo. Kʼianga kʼoasikji xo̱n tíbitjo tsaʼya xi mele skótʼaya koaan skótʼaya jme én xi mele kʼuínyale.

“Nikʼiajin koantsjoake nga kiskotʼaya, tonga nga tsakʼinyana [Biblia] ñaki tsjoa kisʼena. Jmeni xi koanjinna nʼio tsakasenkaona.” (Katlego, Sudáfrica)

“Nga tsakʼinyana tsaʼbeña ngayeje jmeni xi kiskonangile yaona, kʼoa nʼiosa tse jmeni xi koanjinna.” (Berta, México)

“Yaa kichotʼayaijin ya niʼyana kʼoa kʼiaa kichotʼayaijin jochon nga koanmena. Jméngása xi sijé.” (Eziquiel, Brasil)

“Tsa xjaʼaon minuto kʼoa tsa basen ora kiskotʼaya, kʼoa tjín nichxin nga sakʼoa tse kiskotʼaya. An xi kixinña jokji tsakʼinyana.” (Viniana, Australia)

“Je xi tokʼoakoanna kuinga tokjoatjao tsakʼinyana.” (Aimé, Benín)

“Je xi kitsoyana nʼio tsejta kʼoa nda chjota... Nʼio miyo koannajin xíngijin.” (Karen, Irlanda del Norte)

“Nʼio nkjín chjota xi kotʼaya Biblia tonga tsín testigole Jeobá ma.” (Denton, Inglaterra)

XI NʼIO KJONANGI CHJOTA XI TʼATSʼE JOSʼIN ʼMIYA BIBLIA

Jósʼin ʼmiya Biblia

Nkjín koya jmeni xi tínchja̱ni je Biblia kʼoa kui tjoéjin jmeni xi mená jchaa. Tobʼelañá, je Biblia kʼoatso ʼyani Niná, jokjoan, joʼmi, jñani tíjna kʼoa a koaan miyole koaan. Kʼianga jetíkotʼaya je chjota kʼoaʼmile jñani faʼaitʼa Biblia xi tʼatsʼe jebi kʼoa kao xi kjaʼaísanile.

Nga ʼmiyalaijin chjota nkjín xo̱n nichjainjin, jolani je libro xi Jmé kjoanni xi bakóya je Biblia ʼmi.b Libro jebi kui xá kitjoni nga kuinyakao je chjota nga koa̱njinle jokjoantjínni xi bakóya je Biblia. Faʼaitʼa kjoaʼmiya xi kui nchja̱ni tʼatsʼe Niná, tʼatsʼe Jesucristo, tʼatsʼe kjoachjaʼatokon, tʼatsʼe kjoabiya, tʼatsʼe kjoabʼetsʼoa kʼoa nkjínsa koya faʼaitʼa.

Jñáni kʼoa kʼiáni ma ʼmiyale Biblia je chjota

Ji xi síni jñani kʼoa kʼiani chótʼayai.

Jókji tse ʼmiyale chjota nga ñandia ñandia

Nʼio nkjín chjota xi jngo ora kotʼaya nga xki̱ xomana. Tonga tsa tsín kʼoakoa̱nli nga kʼoakji tse kʼuínyali, ji xi síni jokji tse kʼuínyali. Tjínkʼa xi to te kʼoa tsa xjaʼaon minuto kotʼaya.

A bʼechjíñá nga ʼmiyaná

Mai. Tokjoatjaoní kʼoa kʼoati tokjoatjao je xo̱n xi chotʼaya. Je Jesús i kitsole je chjotale: “Tokjoatjao kitsʼaino, tokjoatjao tʼainio” (Mateo 10:8).

Jókji tse fetʼaniná nga ʼmiyaná

Koaan chótʼayai jokji tse meli. Je libro Jmé kjoanni xi bakóya je Biblia xjaʼaonño kjoaʼmiya tjínle. Koaan chótʼayai tojñanile kjoaʼmiya xi koa̱nmeli.

A tjínnele nga ñaki testigole Jeobá koa̱n chjota xi kotʼaya Biblia

Mai. Nga jngó jngó chjota jé xi kuitsoni jmeni xi mele koa̱nkjainle. Tonga nga jchai jotso je Biblia koasenkaoli nga kui xi ndatjín chjoéjin.

Jñáni koa̱nsjaisali tsa mesali jchai

Ya Internet ya jw.org koa̱nsjaisali tʼatsʼe jmeni xi makjainnajin kʼoa jmeni xi nʼiaijin.

Jmé xi sʼian tsa mena kʼuínyana Biblia

Josʼin koa̱n si̱jái nga kataʼmiyali Biblia: koaan si̱jái ya Internet, koaan karta chjí kʼoa koaan kuinókjoai teléfono

Koaan ya tjen si̱jéni ya Internet ya jw.org.
Koaan chjí ya dirección xi faʼaitʼa ya pájina 2.
Kʼoati koa̱n kjoásjai je teléfonole testigole Jeobá xi ya tsʼe jñani tsi kʼoa tinókjoalai.

a Tjín xi jao jan mani nga tjíojtín nga ʼmiyale.

b Libro jebi jé testigole Jeobá bʼasje kʼoa 224 pájina tjínle. Tsʼato jao siento kao kante miyón jekitjo libro jebi kʼoa tsʼato jao siento kao jankan én jekitjo.

JÓSʼIN TJÍOBINYAKAO JE FAMILIA

“Kʼianga kiskotʼaya Biblia je chjoónna nʼio kisindaya yaole. Nda tsakiyuijin ya ndʼianajin. Kʼoa kʼiaa kʼoati koanmena nga kiskotʼaya. Jmeni xi koanjinna tsakasenkaona nga nda chjota koan. Nga Biblia kichotʼayaijin ngisa jtín tsakatio je familianajin.” (Eziquiel)

“Kʼianga jekiskotʼaya je Biblia, kisikʼéjnaña je droga, je xán kʼoa koanna nga kiskoexkoa yaona. Ndʼaibi ya niʼyana tsje chon kʼoa nda chon. Ngisa tsjoake̱ je familiana kʼoa nʼio nda sʼena nga basenkoa. Ngisa tsjoa tjínna ndʼai.” (Karen)

“Nʼio nkjín xi tsín kisasenle nga Biblia kiskotʼaya. Tonga je xʼinna kitsjoanganʼiona. I kitsona: Alikui fiña tojmeni xi kuitso je chjota. Je xi ngisa mandosinna kuinga nda tijnai ndʼaibi. Tosi tonda chótʼayai. Nʼio tsjoa tjínle je familianajin.” (Viniana)