XI NGISA TÍNCHJA̱NI REBISTA JEBI: A MACHJÉN NGA KIXI KOAAN
Nga tsín kixi jme xi sʼín je chjota bʼétʼaná ngatsʼiaa
“Kʼianga tsín tiʼyañá jokuixoán, sakʼoaa basenkaoná nga bʼendisoaa” (Samantha, xi Sudáfrica tsʼe).
A kʼoatjín jotso Samantha. Ngatsʼiñá nga sakʼoa tsín tiʼyañá jokuixoán kʼoa josʼiaan. Tonga josʼiaan kui koako jokjoaan. Tobʼelañá, kʼiatsa kui xi ngisa kjuinñá nga ndasʼin kuiyoaa ngixko̱n xi ngikʼa kʼoa tsín mená nga kjoasoa kuiyojiaan, tochale tokʼoéndisoaa. Tonga nga jchale jokjoantjínni, kʼiaani kuiyojiaan kjoa. Kataʼyala kʼaa jmeni xi ma.
JE XI BʼÉNDISO ALIʼYA XI TISÍNʼIOTʼANI
Machjén nga koa̱nkjainná jmeni xi tso jngo chjota kʼianga nda kuiyoaa kao je. Tonga nichxin machjén nga nda ʼyaa jngo chjota. Machjén nga si̱kʼayalee nichxinná, nga chja̱kaonajmiá kʼoa nga tsín to yaoná kjuinñá. Tonga tsa ñandia kʼoendisoná likuijin tikoa̱nkjainniná jme xi kuitsoná. Nʼio ñʼai tjínle nga si̱nʼiotʼaa ijngokʼá chjota jebi.
A jesa tsakʼéndisoli kʼoa tsa tsakʼanachali jngo miyoli. Tsa jaon, jókisʼe tokuin. Nʼiojin aon koanli. Tojosʼin tiʼyaa, nga tsín kixi jme xi nʼia alikui tinda biyokaoñá xíngiaa.
BAKINNÁ JOSʼÍN CHJOTA
Nga kiskotʼayason je xi Robert Innes ʼmi, xi maestro ma ya Universidad xi tíjna ya California, tsabe nga bakinle chjota nga kʼoasʼin bʼéndiso. Kʼianga nʼio nisinlee jngo chjota xi bʼéndiso kʼoati chan kʼoanʼia tsanda ñá.
Jméni xi koasenkaoná nga tsín kʼoasʼiaan. Je Biblia tsjoáná kjoafaʼaitsjen xi basenkaoná. Kataʼyala kʼaa kjoafaʼaitsjen xi faʼaitʼa ya kjoaʼmiya xi ijngo.