Kjoatjao xi kitsjoa Niná: Ánni nga nʼio chjínile

ʼYÁNI XI KITSJOA JE KJOATJAO

Kuinga ʼyachjíñá je kjoatjao xi bʼainá tsa je kitsjoaná jngo chjota xi xá tjínle kʼoa tsa jeje̱ xi nʼio ʼyaxkoán. Kʼoa tsa kuije̱ nga je kitsjoaná jngo xi xíngiaa mani kʼoa tsa jngo xi nʼio miyoná mani, kuinga nʼio ʼyachjíñá ninga tochoa tao̱n kisʼengile. Kʼoakoan je Russell kao Jordan, xi jenása kanikʼaxkiaa ya kjoaʼmiya xi títjon. Tonga jósʼin basenkaoná jebi nga majinná jokji chjíle je kjoabʼechjíntjai.

Xi títjon, je Biblia kʼoatso nga Niná “kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe” (1 Juan 4:9). Kuinga nʼio ʼyachjíñá je kjoabʼechjíntjai xi kitsjoaná Niná nga̱ tsínsa ʼya xi ngisa ngʼa tíjna tikʼoajinni je. Jngo xi kiski Salmo i kitso: “Ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde” (Salmo 83:18). Tsínsa ʼya xi tjín xi nʼio ngʼa tíjna joni tsa Niná xi tjín xi tsjoákjoatjaoná.

Xi majaoni, jé Niná xi Nʼainá mani (Isaías 63:16). Ánni kʼoabixónsíñá. Kuinga je kitsjoaná kjoabijnachon, síkuindaná kʼoa mandosinle xi tʼatsaan, tojo sʼín jngo nʼai xi mandosinle xtile. Nga kui kinchja̱ni Niná tʼatsʼe naxinandále xi Efraín tsakʼin, i kitso: “A tsí je Efraín je ʼndína xi tsjoake̱, je xi ngisa nʼio tsjoake̱. [...] Kʼoa koakole kjoamatokon” (Jeremías 31:20). Nichxin xi tiyoaa ndʼaibi, je Niná tojo kʼoatjín kon tʼatsʼe chjota xi je bexkón. Ali tsa tokuijin nga je kisindaná Niná, kʼoati Nʼainá mani kʼoa miyoná mani. Kuinga nʼio chjínile ngayeje je kjoatjao xi tsjoáná.

ÁNNI JNGO KJOATJAO KITSJOANINÁ JE NINÁ

Nʼio chjí ʼyaa tsa jmeni xi bʼaikjoatjaoná, ngisaa tsa ñaki kao kjoatsjoacha kabʼainá. Je xi nda chjota alikui koyale nga kʼoaingajaonile nga tjín xi tsjoákjoatjao.

Je Niná kitsjoa je ʼNdíle nga̱ nʼio tsjoakená. Je Biblia itso: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe” (1 Juan 4:9). Je Niná alikui tjínnele kʼoakisʼin. Tonga tsakakóná “kjoandale” nga kʼoasʼin tsakʼéchjíntjainá Cristo (Romanos 3:24).

Ánni kʼoabixónsíñá nga totʼatsʼe “kjoandale Niná” nga tsakʼéchjíntjaininá je Cristo. Je Biblia itso: “Niná bakókixi kjoatjaochale xi tʼatsaan nga Cristo kʼen xi tʼatsaan, kʼia nga tojo chjotajée nía” (Romanos 5:8). Kui kjoatsjoachale xokisikao je Niná nga tsakasenkaoná nga̱ chjotajéeñá kʼoa tsín koa̱nná toñá chʼa̱sjentjé yaoná. Jebi alikui bakinná tsakai kʼoa likui koa̱nná josʼin si̱jndanilee je Niná. Kʼoa nga kʼoakisʼin Niná kʼoasʼin nga nʼiosa tsakakóná kjoatsjoachale.

JÓKJI KJOAMA̱ KISʼENGI

Tjínkʼa kjoatjao xi nʼio chjí ʼyaa nga̱ nʼio tse kjoama̱ bʼéngi je xi tsjoáná. Kʼianga kui tsjoáná jngo chjota jmeni xi nʼio chjí be, ngisaa tinʼio chjí ʼyangáñá.

Je Niná “kitsjoa je xi tojngo ʼndíle” (Juan 3:16). Jé kitsjoa xi ngisasa nʼio tsjoake. Jotjín jmi miyón nó tsakʼéndani Niná je Sonʼnde kao ngʼajmi, je Jesús yaa kisixákao. Kʼoa Nʼaile jé Jesús “xi nʼio tsjoake” koan (Proverbios 8:30). Jé Jesús je ʼNdíle xi nʼio tsjoake kʼoa “jéní je sénle Niná xi tsín matsen” (Colosenses 1:13-15, TNM). Alikui ʼya xi kʼoasikji tjaole xínkjín joni tsa je.

Tonga je Jeobá kitsjoa je ʼNdíle (Romanos 8:32). Jé kitsjoaná je xi ngisasa nʼio tsjoake. Kʼoa kui xi ngisasa tse kjoama̱ tsakʼéngi nga kʼoakisʼin.

NʼIO BASENKAONÁ JMENI XI KISʼIN NINÁ

Tjín je kjoatjao xi nʼio chjí ʼyaa nga̱ kʼiakjoán bʼainá nga nʼio machjénná. Tobʼelañá, tsa xkilani machjénli nga koa̱n kuijnachuin, tonga tsa tsínli tao̱n xi kuindáni je xki, jósʼe̱ tokuin tsa ʼya xi kʼoakuitsoli nga je kʼoechjí. Nʼiojin kʼoailai kjoanda.

“Xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni” (1 Corintios 15:22). Nga ntje̱le maa je Adán mʼeñá, alikui ndái tiyolee je chʼin kao kjoabiya, kʼoati likui nda tiyoaa xi kao Niná kʼoa chjotajée maa. Kʼoa alikui koa̱nná nga kʼoailee kjoabijnachon jngo chjota. Je Biblia itso: “Nijngojinla xi koa̱nle kʼoasjentjai jngo ndsʼe̱, kʼoa ni koa̱njinla jngo kjoabʼechjíntjai tsjoále Niná xi tʼatsʼe ndsʼe̱, [...] kʼoa nikʼiajinla kuichole chjíle” (Salmo 49:7, 8). Machjénná ngatsʼiaa nga tjín xi koasenkaoná nga̱ tsín koa̱nná nga toñá kʼoéchjíntjé yaoná.

Kui kjoatsjoachale Jeobá xokisikao nga tíjnandani nga kitsjoa jmeni xi machjénná nga koa̱n kuitjo̱ntjé, kʼoa je Jesús kisichjén. Jósʼin basenkaoná je kjoabʼechjíntjaile Jesús. Je Biblia kʼoatso nga je “njínle Jesucristo ʼndíle Niná sítsje[...] ngayije jéená”. Jebi kui xi tsonile tsa koa̱nkjainná nga tsakʼéchjíntjainá je Jesús, koaan jchatʼa je jéená kʼoa koaan sʼe̱ná kjoabijnachon xi tsínkʼia fetʼa (1 Juan 1:7; 5:13). Je kjoabʼechjíntjai kʼoati kuinyakao je xíngiaa xi jekʼien, nga̱ je Biblia itso: “Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota [Jesús] jaʼai kjoafaʼáyale xi kʼen” (1 Corintios 15:21).a

Je kjoabʼechjíntjaile Jesús kui xi ngisasa nʼio chjíle, nga̱ jé kitsjoaná je Niná xi ngisa ngʼa tíjnale ngʼajmi kao Sonʼnde. Kʼoa kui kjoatsjoachale xokisikao nga kʼoakisʼinni. Alikui ʼya xi kʼoasikji kjoama̱ tíbʼéngi xi tʼatsaan joni tsa Jeobá, je Niná. Kʼoa tokui kjoatjao jebi xi koasenkaoná nga ndái kuiyolee je jée kao kjoabiya. Alikui jme xi mangóson jokji chjíle je kjoabʼechjíntjai.