Je Énle Niná tjínle nganʼio

1. Ánni nga tsín jao sʼeni tokoán nga tjínle nganʼio je Énle Niná (chótsenlai sén xi faʼaitʼa ibi).

XI CHOʼNDALE Jeobá maa, alikui jao tjínná nga “je énle Niná tíjnakon, kʼoa nʼio síxá” (Heb. 4:12). ʼYañá nga je Énle Niná tjínle nganʼio nga basenkaoná kʼianga nindayaa yaoná. Kʼianga kjesa testigole Jeobá majin, tjínkʼa xi kisiché, xi droga kisikao, kʼoa xi kisichajngi. Kʼoa tjínkʼa xi nʼio tsaʼyale i̱ Sonʼnde kʼoa tsa xi nʼio tse tao̱n kisʼele, tonga likuini tsjoa kisatio kon (Ecl. 2:3-11). Nʼio nkjín xi tsín jme kjoachoya tjínle tsakai, tonga nga tsabe je Énle Niná kui xi tsakinyakao nga tsjoa kisationi kon kʼoa nga tjínnile kjoachoya ndʼaibi. Tsjoa satío tokoán nga bʼexkiaa tʼatsʼe josʼin tjíosíndaya yaole je chjota, tojosʼin faʼaitʼa je Xo̱n xi Bájinkonná ya kjoaʼmiya xi “Je Biblia síkʼantjaiyaa chjota” ʼmi. Kʼoa ninga jechjotale Cristo maa, ngatsʼiñá nga machjénná je kjoafaʼaitsjen xi tsjoá je Biblia nga tosi tonda taja sʼe̱jna je kjoamiyo xi tjínná kao Jeobá.

2. Jósʼin tsakinyakao je Énle Niná nga kisindaya yaole je chjotale Cristo xi tsakatio kʼianga siglo 1.

² Alikui tokʼoamaná nga nʼio nkjín chjota síkʼantjaiya yaole kʼianga be je Énle Niná. Kʼoakoan je chjotale Cristo xi tsakatio kʼianga siglo 1, xi ya kisʼele kjoachoya ya ngʼajmi (tʼexkiai 1 Corintios 6:9-11).a Je pastro Pablo kisikʼaxki jokjoan je chjota xi tsín tjoéle kjoanda xi kjoaʼaíkao je Chjotaxále Niná, kʼoa xijekoan i kitsole je chjotale Cristo: “Kʼoakoan kjoaon kʼao”. Tonga jé nganʼiotsjele Niná tsakinyakao nga kisikʼantjaiya yaole. Kʼoa ninga jechjotale Cristo koan, tjínkʼa xi tsakajngijée kʼoa likui tinda tsakationi kao Niná. Tobʼelañá, je Biblia síkʼaxki jngo chjotale Cristo xi ya ngʼajmi kisʼele kjoachoya, xi tsakichonsjejin naxinandále Niná. Tonga nga koanskanni kisindayaa yaole kʼoa tsakʼejnajin ijngokʼa ya naxinandále Niná (1 Cor. 5:1-5; 2 Cor. 2:5-8). Nʼio tsjoa satío tokoán kʼianga nʼio nkjín ndsʼee tjíobinyakao je Énle Niná nga tjíosíndaya yaole.

3. Jméni xi chótʼayajiaan i̱ kjoaʼmiya jebi.

³ Je Jeobá títsjoáná je Énle, kʼoa kui xi mená nga ndasʼin ni̱chjén (2 Tim. 2:15). I̱ kjoaʼmiya jebi, jan koya chótʼaya tʼatsʼe jósʼiaan nga ngisa nda koasenkaoná je Énle Niná. Xi títjon, josʼin tinijchá yaoná. Xi majaoni, kʼianga ʼmiyasoán. Kʼoa xi majanni, nga bakoyaa ya jinjtín. Kʼianga kui chótʼayajiaan, koasenkaoná nga koakolee kjoatsjoacha kʼoa nga kʼoailee kjoanda je Jeobá, xi bakóyaná nga ndasʼin kuiyoaa (Is. 48:17).

JOSʼIN TINIJCHÁ YAONÁ

4. 1) Jméni xi sʼiaan kʼiatsa mená nga koasenkaoná je Énle Niná. 2) Jósʼin chʼasjeʼai nichxin kʼianga bʼexkiai je Biblia.

⁴ Kʼiatsa mená nga koasenkaoná je Énle Niná, machjén nga ntsjaintsjai kʼoéxkiaa, tsa kʼoakoa̱nná koaan nga nyaon nyaon kʼoéxkiaa (Jos. 1:8). Ningalani nʼio tse xá tjínná, alikui koa̱n nga kui kʼoechjoaná nga kʼoéxkiaa je Biblia (tʼexkiai Efesios 5:15, 16).b Koaan kʼia kʼoéxkiaa nga tanjio, kʼianga nichxin kʼoa tsa kʼianga manjio. Kʼoati tjío tokoán jokisʼe kon je xi kiski salmo nga kitso: “¡Nʼio tsjoake̱ je kjoatéxomali! Kui sikjaʼaitsjenjian bʼajnda nichxin” (Sal. 119:97).

5, 6. 1) Ánni nga nʼio chjínile nga si̱kjaʼaitsjenjiaan jmeni xi tso je Biblia. 2) Jósʼiaan nga ngisa koasenkaoná nga si̱kjaʼaitsjenjiaan jmeni xi bʼexkiaa ya Biblia. 3) Jósʼin tíbasenkaoli nga bʼexkiai kʼoa nga nikjaʼaitsjenjin je Énle Niná.

⁵ Ali tsa tokuijin xi machjén nga kʼoéxkiaa je Biblia. Tjínnele nga si̱kjaʼaitsjenjiaan jmeni xi bʼexkiaa (Sal. 1:1-3). Tsa kʼoasʼiaan, kui xi koasenkaoná nga kjuintjenngiaa je kjoachjine xi tsjoá je Énle Niná. Tojosʼin kʼoéxkiaa je Biblia, ninga ya celularná kʼoa tsa kao tabletaná, je xi mená kuinga katabichókajin ni̱ma̱ná jmeni xi kʼoéxkiaa.

⁶ Jósʼiaan nga koasenkaoná kʼianga si̱kjaʼaitsjenjiaan je Énle Niná. Kʼianga bʼéxkia je Biblia, nʼio nkjín xi i̱ tso xi kjonangile yaole: “Jméni xi tsoyana jebi xi tʼatsʼe Jeobá. A jetisichjén je kjoafaʼaitsjen jebi. A tjínsa jñani koa̱n sindaya yaona”. Tsa si̱kjaʼaitsjenjiaan jotso je Énle Niná kʼoa tsa kʼoétsʼoalee Jeobá, kui xi koasenkaoná nga kjuintjenngiaa je kjoafaʼaitsjen xi faʼaitʼa Biblia. Tsa kʼoasʼiaan, ngisaa ndasʼin koasenkaoná je Énle Niná (2 Cor. 10:4, 5).

KʼIANGA ʼMIYASOÁN

7. Jósʼiaan nga ngisa nda si̱chjén je Énle Niná kʼianga ʼmiyasoán.

⁷ Jósʼiaan nga ngisa nda si̱chjén je Énle Niná kʼianga ʼmiyasoán kʼoa kʼianga bakoyalee je chjota. Je xi koasenkaoná kuinga kjitʼa si̱chjén. Jngo ndsʼee xi i̱ kitso: “Tsa jelani Jeobá kitjenkoai nga xki̱ niʼya tiʼmiyasuin, a toji kuinókjoai ʼndeʼndai, axo kʼoaiʼndelai nga kuinchja̱”. Kui xi kitsonile je ndsʼee, nga joxi jeni Jeobá bʼaiʼndelee nga nchja̱ kʼianga Biblia bʼexkialee je chjota. Ngisaa tse nganʼio tjínle jngo testole Biblia tikʼoajinni tojmeni xi kuixoán (1 Tes. 2:13). Kuinga ndatjínni nga chjónangilee yaoná jebi: “Kʼianga xinyasoan, a kui Biblia sichjén nga bʼexkiale je chjota”.

8. Ánni nga tsín tokui xi machjénni nga testole Biblia kʼoéxkialee je chjota.

⁸ Ali tsa tokuijin xi machjén nga kʼoéxkialee jngo testole Biblia je chjota. Tojo koan kʼianga siglo 1, me ngatsʼi je chjota nga tsín majinle jmeni xi tso je Biblia (Rom. 10:2). Kuinga tsín koa̱n to kʼoéjngosíñá tokoán kʼianga jebʼexkialee jngo testole Biblia. Tjínnele nga kʼuínyalee kʼoa si̱kʼaxki̱ ijngokʼalee je én xi mená nga katasʼejinle, kʼoa nda kʼuínyalee. Tsa kʼoasʼiaan, kuichokajin Énle Niná ya kjoafaʼaitsjenle kao ni̱ma̱le je chjota (tʼexkiai Lucas 24:32).c

9. Jngo choa̱ tʼejnai josʼin koa̱n kʼuínyalee je chjota jngo testole Biblia.

⁹ Kʼianga kʼoéxkialee jngo testole Biblia je chjota, tjínnele ñaki nda koakoyalee ánni nga skoe̱xkónsíni je Biblia. Tobʼelañá, koaan i̱ kuixoán: “Kataʼyala jotso Niná xi tʼatsʼe jebi”. Tonga tsa je tichjakaonajmiá jngo chjota xi tsín makjainle tʼatsʼe Cristo, koaan i̱ kuixoán: “Kuitsoñá je xo̱ntsje jebi”. Kʼoa tsa je chjota xi tsín mandosinle xi tʼatsʼe relijión, koaan kui jebi chjónangilee: “A saje kinoʼyai je én jebi, xi jekjoatse kichji”. Nga kjaʼaí kjaʼaísʼin makjainle je chjota, tjínnele kjaʼaí kjaʼaísʼin kʼuínyalee nga jngó jngó (1 Cor. 9:22, 23).

10. 1) Tʼeyanajmí jokoan ñandia kʼianga títsoyason jngo ndsʼee. 2) Tʼeyanajmí jósʼin tiʼyai nga tjínle nganʼio je Énle Niná kʼianga ʼmiyasoán.

¹⁰ Nʼio nkjín ndsʼee xi tjíobe nga ndasʼin bichómani kʼianga nichjén je Énle Niná nga ʼmiyasoán. Tobʼelañá, jngo ndsʼee xi jngo chjota fisíxatʼa xi jekjoatse bʼéxkia rebista. Ñandia kʼianga kikonle, ali tsa tokui je Xo̱n xi Bájinkonná xi sʼa kitjo chjotse kisikáyole, kʼoati tsakʼéxkiale jngo testo xi ya faʼaitʼa je rebista. Kui 2 Corintios 1:3, 4, jñani itso: “Je Nʼai xi tsʼe kjoamatakon, kʼoa Niná xi tsʼe ngayije kjoanijetakon, xi síjekonná ngayije kjoañʼainá”. Je chjota jebi, ñaki kichokajin ni̱ma̱le kʼoa kʼoakitsole je ndsʼee nga katabʼéxkia ijngokʼale je testo jebi. Xijekoan, kʼoakitso nga je kʼoa kao chjoónle machjénle nga ʼya xi sinʼio kon kʼoa nga mesale skoe̱ xi tʼatsʼe Biblia. Tojosʼin tiʼyaa, kʼianga nichjén je Énle Niná nga ʼmiyasoán nʼio binyakao je chjota (Hech. 19:20).

KʼIANGA BAKOYAA YA JINJTÍN

11. Jmé xá xi kjinele je ndsʼee xi faʼa ya plataforma kʼianga tsoya.

¹¹ Ngatsʼiñá nga tsjoachaa mangián je kjoajtín kao kjoajtíntse xi satíoná. Kuinga mangínñá nga̱ jé Jeobá ʼyaxkoán. Tonga kʼoati kuinga mangínñá nga̱ mená koa̱nsaná xi tʼatsʼe Niná. Tse kjoanda bʼaile je ndsʼee xi faʼa ya plataforma kʼianga tsoya, tonga kʼoati tse xá tjenkao (Sant. 3:1). Kuinga kuenta sʼinni ngantsjai nga ñaki ya Biblia kʼoangini jmeni xi kuitsoya. Kʼiatsa bʼakaoli ji nga bitjai ya plataforma, jméni xi sʼiain nga kui je Énle Niná koasenkao je xi kjuinrʼoe.

12. Jósʼin je xi bʼakaole je kjoanokjoaya nga kui je Biblia xi ngisa nʼio sichjén kʼianga kuitsoya.

¹² Je xi nʼio chjíle nga kuenta sʼiain, kuinga ya Biblia chʼa̱ngini jmeni xi kʼuínyai (Juan 7:16). Josí nga kʼuínyai, jmeni xi kʼoéyanajmí kʼoa tsa choa̱ si̱chjáin, kuenta tʼiain nga kui je testole Biblia xi ngisa chjíle nga kʼuínyai. Tikjaʼaitsjain nga tsín mangóson nga bʼexkiaa Biblia kʼoa nga ʼmiyaa jmeni xi tso. Kʼoa tsa nʼio nkjín testo si̱chjain, mejin ngatsʼi je xi kuicho nga tsín sʼe̱jinle. Kuinga nʼio chjínile nga nda chjoéjin jmé testoni xi kʼoéxkiai, kʼoa ali xitso xiskájin bʼexkiai, tʼinyai jme xi tínchja̱ni, tʼejnai choa̱ josʼin koasenkaoná, kʼoa josʼin koa̱n si̱chjén je testo (Neh. 8:8). Kʼiatsa je naxinandále Niná kisikasénli je xo̱n jñani chʼa̱ngini je kjoanokjoayali, nda chótʼayajin je én xi nroatʼa kao je testo xi faʼaitʼa, kʼoa tijinlai yaoli jósʼin mangóson je testo kao je én xi nroatʼa. Xijekoa̱n, chjoéjin je testo xi kʼuínyai (koa̱nsjaitʼasali kjoafaʼaitsjen ya libro Benefíciese de la Escuela del Ministerio Teocrático ya lección 21 saʼnda 23). Tonga je xi ngisa chjíle, kuinga je Jeobá tijélai nganʼio nga katabasenkaoli nga koa̱n kʼuínyai je Énle (tʼexkiai Esdras 7:10;d Proverbios 3:13, 14e).

13. 1) Jósʼin tsakasenkao jngo tichjaa je testo xi kinrʼoé ya kjoajtín. 2) Jósʼin tíbasenkaoli ji je testole Biblia xi maxkia kʼianga satío je kjoajtín.

¹³ Kataʼyala josʼin tsakasenkao jngo tichjaa xi Australia tsʼe je Biblia kʼianga kisʼejna je kjoajtín. Je tichjaa jebi ñʼai tjín kjoa jaʼatojin nga sʼa ʼndí, tonga kisasenle jmeni xi tsoya je Biblia kʼoa kitsjoatʼale yaole je Jeobá. Ninga kʼoalani, tojo kʼoasʼin kisikjaʼaitsjen nga tsín tsjoake je Jeobá. Ñandia kʼianga ya tíjna kjoajtín, jngo testo kinrʼoé xi kichokajin ni̱ma̱le. Kʼianga kisikjaʼaitsjenjin jmeni xi tso testo jebi kʼoa nga tsakʼéxkia xi kjaʼaísa testo, kui xi tsakʼéjngo kon nga tsjoake je Niná.f Kʼoa ji, a saje kinoʼyalai ya kjoajtín kʼoa tsa kʼia nga kisʼejna jngo kjoajtíntse jngo testole Biblia xi kʼoasʼin kichokajin ni̱ma̱li (Neh. 8:12).

14. Jósʼin koakoá nga ʼyachjiá je Énle Niná.

¹⁴ Ngatsʼiñá nga bʼailee kjoanda je Jeobá nga kitsjoaná je Énle, kʼoa nga tísítjoson nga kʼoatso nga tsín jchangi (1 Ped. 1:24, 25). Kuinga kjitʼa kʼoéxkiasíñá, kjuintjenngiaa je kjoafaʼaitsjen xi tsjoá, kʼoa si̱chjén nga kuinyakoaa xi kjaʼaí. Tsa kʼoasʼiaan, kʼoasʼin koakoñá nga tsjoachaa kʼoa nga ʼyachjiá je kjoatjao xi kitsjoaná Niná. Tonga xi ngisa chjíle kuinga kʼoasʼin koakoñá nga tsjoachaa je Jeobá, nga̱ tʼatsʼe kinroani je Biblia.