“Jñáni tíjna je Niná”
“TOKUI CHJONANGIʼNDEE JEBI: JÑÁNI TÍJNA JE NINÁ” (Je papa Benedicto XVI, nga kichosíxatʼa ya ʼnde jñani nga kjoañʼai kinikjaʼá chjota ya Auschwitz [Polonia]).
KʼOA JI, A SAKʼOAA KʼOATI KUI JEBI CHJONANGILAI YAOLI KʼIANGA JME KJOAXKÓN SʼE. A JESA KITJATOJIN JNGUI KJOA XI KʼOATSAKʼÉ TOKUIN NGA TSÍN MANDOSINLE NINÁ XI TʼATSI.
Je Sheila xi Estados Unidos tsʼe, kʼianga sʼa koanjchínga, je familiale nʼio sísin tʼatsʼe relijión, itso: “Kʼianga sʼa ʼndí kjiʼe̱, makjainna xi tʼatsʼe Niná nga̱ ʼbeña nga je kisindaná, tonga tsínkʼia kisichriantʼale. Ningalani ʼbe nga tíkotsenna, kʼoasʼin kisikjaʼaitsjen nga tsín nrʼoéna. Alikuijin tsa jtikena tonga kʼoajin titsín mandosinle xi tʼatsan”. Ánni nga kʼoasʼin kisikjaʼaitsjensíni je Sheila. Itsosa: “Je familiana nkjín koya kjoaxkón jaʼatojin, kʼoa je Niná likui tsakasenkaonajin”.
Tojosʼin kisikjaʼaitsjen Sheila, tsakui nichxin kʼoati makjainli xi tʼatsʼe Niná tonga tsa sakʼoa chjonangilai yaoli tsa ñaki mandosin kjoaixile xi tʼatsi. Je Job kʼoati kisʼe kon, koankjainle nga tíjna Niná xi tjínle nganʼio kao kjoachjine (Job 2:3; 9:4). Tonga kʼianga nʼio tse kjoañʼai jaʼatojin kʼoa nga jetsínle kjoachoya, itso xi kiskonangile Niná: “Ánni nga bijnaʼmasíninái kʼoa nga kontra ʼyatokonsíninái” (Job 13:24).
Tonga, jótso je Biblia. A je Niná xotísʼín nga kjoañʼai tjín. A mandosinle xi tʼatsaan nga jngó jngoá. Jósʼin jchañá tsa nda bexkonná, tsa majinle jmeni xi maná kʼoa tsa koa̱n koasenkaoná nga kjoa bitjatojiaan.
Ya kjoaʼmiya xi fisani kui jchaa tʼatsʼe josʼin bakó jmeni xi koannda kʼoa jmeni xi tso je Biblia nga mandosinle Niná xi tʼatsaan (Romanos 1:20). Kʼianga jchasaa jotjínni xi tʼatsʼe je Niná xi kisindaná, ngisaa kʼoéjngoaa tokoán nga tsjoakená (1 Juan 2:3; 1 Pedro 5:7).