Jmé xi tsoyanile nga kʼoasʼin nikjaʼaitsjeen josʼin síkjaʼaitsjen Niná

1, 2. 1) Jótso kʼa chjotale Cristo tʼatsʼe nga kʼoasʼin nikjaʼaitsjen josʼin síkjaʼaitsjen Niná. 2) Jméni xi chótʼayajiaan i̱ kjoaʼmiya jebi.

JNGO tichjaa xi Canadá tsʼe itso: “Kʼianga kʼoasʼin sikjaʼaitsjen josʼin síkjaʼaitsjen Niná kui xi ngisa tsjoa tíbʼé tokoan kʼoa tíchókjoajinna je kjoa xi tifaʼatojian nga nyaon nyaon”. Jngo ndsʼee xi Brasil tsʼe, itso: “Jekanjan nó tjínnajin nga chixainjin kʼoa nʼio tsjoa tjíonajin kao ʼndíchjoónna nga kʼoasʼin nikjaʼaitsjainjin josʼin síkjaʼaitsjen Niná”. Kʼoa ijngo ndsʼee xi Filipinas tsʼe kʼoatso nga nyʼán tjín kon kʼoa nga ndasʼin fikao ngatsʼi ndsʼee.

² Tojosʼin tiʼyaa, nga kʼoasʼin nikjaʼaitsjeen josʼin síkjaʼaitsjen Niná nʼio tse kjoanda sokóná. Ngatsʼiñá nga mená sʼe̱ná kjoanda jebi. Kataʼyala jméni xi sʼiaan. Tonga machjén nga títjon koa̱njinná jmeni xi tsoya Biblia josʼín je chjota xi kʼoasʼin síkjaʼaitsjen josʼin síkjaʼaitsjen Niná. I̱ kjoaʼmiya jebi, jan koya tjínni xi chótʼayajiaan. Xi títjon, jósʼin jchanile jngo chjota xi kʼoasʼin síkjaʼaitsjen josʼin síkjaʼaitsjen Niná. Xi majaoni, jmé choa̱ xi koasenkaoná. Kʼoa xi majanni, jósʼin basenkaoná nga sʼená je “kjoafaʼaitsjen xi tsʼe Cristo”.

JÓSʼÍN JE CHJOTA XI KʼOASʼIN SÍKJAʼAITSJEN JOSʼIN SÍKJAʼAITSJEN NINÁ

3. Tojo tso je Biblia, jméni xi tsín mangóson je chjota xi tsínle kjoafaʼaitsjenle Niná kao chjota xi kʼoasʼin síkjaʼaitsjen josʼin síkjaʼaitsjen Niná.

³ Je pastro Pablo kʼoakitso nga tsín mangóson je chjota xi tjínle kjoafaʼaitsjenle Niná kʼoa kao xi tsínle (1 Cor. 2:14-16, TNM; 3:1-3). Kʼoakitso nga je chjota xi tsínle kjoafaʼaitsjenle Niná, “tokjoaská male” kʼoa tsín machoyale. Tonga je chjota xi kʼoasʼin síkjaʼaitsjen josʼin síkjaʼaitsjen Niná bʼejnatsʼinya ngayeje kjoa kʼoa sʼele “kjoafaʼaitsjen xi tsʼe Cristo”. Kuinga kʼoakitsoni Pablo nga tjínnele kjoásjaiyaa xi tʼatsʼe Niná. Jmésani xi tsín mangóson chjota jebi.

4, 5. Jósʼín je chjota xi tsínle kjoafaʼaitsjenle Niná.

⁴ Kuila títjon kataʼyaa josʼin síkjaʼaitsjen je chjota xi tsínle kjoafaʼaitsjenle Niná. Tokui fini jmeni xi símekon kʼoa jmeni xi mele yaole. Je Pablo kʼoakitso nga kui tjínle “je nganʼio xi tjíosíxákao ndʼaibi je chjota xi tsín sítjoson” (Efes. 2:2, TNM). Je nganʼio jebi kui xosíkao chjota nga tokui kjenngi jmeni xi sʼín xi ngikʼa. Kʼoa kuinga tokui kʼoasʼínni jmeni xi ndatjín male kʼoa tsín bʼénele yaole nga sítjoson je kjoatéxomale Niná. Ngatsʼi chjota jebi tokui fini nga tsín chʼaosʼin katabʼaxki̱, tokui fitjenngi jmeni xi tjín sonʼnde kʼoa tokui sítoánntjai jmeni xi ndatjín male.

⁵ Je chjota xi tsínle kjoafaʼaitsjenle Niná kui kʼoasʼín je “kjoa xi sʼín yaoná” (Gál. 5:19-21). Je karta xi títjon kiskile Pablo je naxinandá Corinto kʼoakitso jmesani xi sʼín chjota jebi. Tobʼelañá, fayojin je kjoa xi tsín je bʼakaole, síjaoya chjota, xíjin, fajétʼain xínkjín, likui fikʼále kjoaxkóntokon je chjota xi xá tjínle kʼoa tokui fini nga ʼbi kʼoa nga kjen. Xi ijngosani, alikui bʼéchjoale yaole jmeni xi jée tjenkao (Prov. 7:21, 22). Je Judas kʼoakitso nga saʼnda tjínkʼa xi tsín timandosinnile xi tʼatsʼe Niná (Jud. 18, 19).

6. Jósʼín je chjota xi kʼoasʼin síkjaʼaitsjen josʼin síkjaʼaitsjen Niná.

⁶ Je chjota xi kʼoasʼin síkjaʼaitsjen josʼin síkjaʼaitsjen Niná nʼio mandosinle josʼin tíjna ngixko̱n Niná kʼoa kjenngile (Efes. 5:1). Jebi kui xi tsonile nga kui fitjenngi josʼin síkjaʼaitsjen je Jeobá. Chjota jebi makjainle nga ñaki tíjna je Niná kʼoa kuenta sʼín je kjoatéxomale (Sal. 119:33; 143:10). Kʼoati sʼele je kjoanda xi tsjoáná je nganʼiotsje kʼoa tsínkui kʼoasʼín je “kjoa xi sʼín yaoná” (Gál. 5:22, 23). Je choa̱ xi fisani kui bakóyaná josʼin tsoyanile jebi. Tobʼelañá, jngo chjota xi negosio sʼín ñaki tokui kjoale negosio títso tínchja̱le. Tikʼoasʼinni, je chjota xi kʼoasʼin síkjaʼaitsjen josʼin síkjaʼaitsjen Niná, nʼio mandosinle xi tʼatsʼe Niná.

7. Jméni xi tso je Biblia tʼatsʼe chjota xi kʼoasʼin síkjaʼaitsjen josʼin síkjaʼaitsjen Niná.

⁷ Je Jesús kʼoakitso nga tsjoa tjío kon je chjota xi kʼoasʼin síkjaʼaitsjen josʼin síkjaʼaitsjen Niná. Ya Lucas 11:28, itso: “Ngisa toxkón ndani je xi nrʼoé énle Niná, kʼoa xi sítjoson”. Kʼoa ya Romanos 8:6 itso: “Je xi sísinle kjoale yaoná, tjínle kjoabiya, tonga je xi sísinle kjoa xi tsʼe Espíritu Santo, tjínle kjoabijnachon kao kjoanyʼántakon”. Tsa kuenta sʼiaan xi tʼatsʼe Niná tínroani, nyʼán kuiyoaa ngixko̱n, nyʼán sʼe̱ tokoán kʼoa nichxin xi nroaján koaan kuiyoaa ngantsjai nichxin.

8. Ánni nga kʼoénenilee yaoná nga tosi tonda kʼoasʼin si̱kjaʼaitsjeen josʼin síkjaʼaitsjen Niná.

⁸ Tjínnele si̱kuindaa josʼin tiyoaa ngixko̱n Niná. Nga̱ je chjota xi tiyojinlee, alikui sítjosonle je Niná, kuinga tjínnenile si̱kuindaa je kjoafaʼaitsjenná. Kʼianga jngo chjota tsín tikʼoasʼin síkjaʼaitsjenni josʼin síkjaʼaitsjen Niná, ñaki tokui sʼejnajin kjoafaʼaitsjenle jmeni xi tjín sonʼnde kʼoa to yaole fini. Jméni xi koasenkaoná nga tsín kʼoakatamaa. Kʼoa jméni xi sʼiaan nga tosi tonda kʼoasʼin si̱kjaʼaitsjeen josʼin síkjaʼaitsjen Niná.

CHJÉNNGIAA CHOA̱ XI TSAKATÍO JE CHOʼNDALE NINÁ

9. 1) Jméni xi koasenkaoná nga ngisa nʼio sʼe̱jna je kjoamakjainná. 2) ʼYá tʼatsʼe choa̱ xi chótʼayajiaan.

⁹ Tojo sʼín je xtiʼndí nga ya manile xi ndatjín nga xijchále kjenngile. Kʼoatisʼinni, kʼianga ya chjenngilee je xi taja tjío kjoamakjainle kʼoati ngisa nʼio sʼejna je kjoamakjainná. Xi ijngosani, kui bakóyaná nga tsín ya chjénngilee je xi tsín nda choa̱ batío (1 Cor. 3:1-4). Ya Biblia faʼaitʼa choa̱le chjota xi nda kisʼin kao xi chʼao kisʼin. I̱ kjoaʼmiya jebi, kui chótʼayajiaan je xi nda choa̱ tsakatío jolani je Jacob, María kʼoa kao Jesús. Jebi koasenkaoná nga kʼoasʼin si̱kjaʼaitsjeen josʼin síkjaʼaitsjen Niná.

10. Jósʼin tsakakó je Jacob nga kʼoasʼin kisikjaʼaitsjen josʼin síkjaʼaitsjen Niná.

¹⁰ Kuila títjon kataʼyaa je choa̱le Jacob. Nʼio tse kjoa jaʼatojin, tojo maa ndʼaibi. Je Esaú xi ndsʼe̱ koanni koanmele kisikʼien. Saʼnda je nʼaichále koanmele nga tsakʼanachale. Tonga je Jacob kʼoasʼin kisikjaʼaitsjen josʼin síkjaʼaitsjen Niná ninga je chjota xi tsakʼejnajinle tsín kʼoakisʼin. Koankjainle nga sitjoson Niná jmeni xi kitsole je Abrahán, kisikuinda ngantsjai je familiale nga̱ yaa kjuinroani jmeni xi tsakʼéndajin Niná (Gén. 28:10-15). Jmeni xi kitso kʼoa jokisʼin tsakakó nga tsabechjí je kjoatéxomale Niná kʼoa jmeni xi mele. Tobʼelañá, tsakʼétsʼoale Niná kʼianga kʼoasʼin kisikjaʼaitsjen nga je Esaú mele sikʼien. I kitso: “Kʼoa ji i tisi: Xi kjoaixi nda skoekonle, kʼoa je ntje̱li kʼoakoa̱nchon jochon je tsomí xi tjín ya ndai ndáchikon xi tsín ʼya xi maxki̱le nga nʼio nkjín mani” (Gén. 32:6-12). Josʼin kisijchá yaole je Jacob tsakakó nga koankjainle jmeni xi kitsole Jeobá kʼoa jotsakʼinle je chjotajchíngale.

11. Jósʼin tsakakó María nga nʼio kisʼele kjoamakjain.

¹¹ Kuila kataʼyaa ndʼaibi je choa̱le María. Ánni nga je kiskoejinni Jeobá nga na̱le Jesús koan. Kuinga nʼio kisʼele kjoamakjain. Kʼoasʼin ʼyañá jokitso nga tsakʼasjengʼa Jeobá kʼianga kikonle je Zacarías kao Elisabet, xi xínkjín koanni (tʼexkiai Lucas 1:46-49).a Jmeni xi kitso je María tsakakóní nga nʼio tsjoake koan je Énle Niná kʼoa nga nʼio nda tsabe jotso je Escrituras Hebreas (Gén. 30:13; 1 Sam. 2:1-10; Mal. 3:12). Kʼoa kʼianga jechixankao José, alikui xínkjín tsakjayokao saʼnda nga jekitsin Jesús. Jebi kui bakó nga ngisa chjí tsabe jmeni xi mele Jeobá tikʼoajinni nga to yaole koaini (Mat. 1:25). Jokji jaʼato nó, je María nʼio kuenta kisʼin ngayeje jmeni xi kitso kʼoa jmeni xi kisʼin je Jesús, kʼoa “tsakʼéjinkon ni̱ma̱le ngayije je kjoabi” (Luc. 2:51). Nʼio koanndosinle jmeni xi tongini kitso Niná xi tʼatsʼe Mesías. Nʼio ndatjín nga si̱kjaʼaitsjenjiaan josʼin koa̱n chjénngiaa je choa̱ xi tsakʼéjnaná María kʼoa nga kui títjon si̱kʼéjnaa jmeni xi mele Jeobá.

12. 1) Jméni xi mangóson Jesús kao je Nʼaile. 2) Jósʼin koa̱n chjénngiaa je choa̱le Jesús (chótsenlai sén xi fitsʼiani kjoaʼmiya jebi).

¹² Kuila kataʼyaa ndʼaibi je choa̱le Jesús. Kʼianga jaʼai i̱ Sonʼnde tsakakó nga nʼio koanndosinle xi tʼatsʼe Niná. Jokjitse kitsoyason, jé Jeobá kiskenngile. Josʼin kisikjaʼaitsjen kʼoa jmeni xi kisʼin tsakakó nga kui kitjenngi je kjoatéxomale Jeobá kʼoa kao jmeni xi mele (Juan 8:29; 14:9; 15:10). Tobʼelañá, je Isaías i kitso xi tʼatsʼe je kjoamatokonle Jeobá: “Jokjitse nga kjoaʼaon tsakatiojin kʼoati aon koanle tsanda je. Kʼoa je xi síkasén nga fikao énle kʼoasʼin tsakʼasjentjai naxinandále. Kʼoa nga kʼoasikji kjoatsjoacha kao kjoamatokon tjínle, kʼoasʼin tsakatseyani, tsakʼasjentjai kʼoa kisikuindaa jokji nichxin jaʼato” (Isaías 63:9). Kʼoa je Marcos kʼoakitso nga je Jesús kʼoati tsakakó kjoamatokon (tʼexkiai Marcos 6:34).b A chjenngilee Jesús kʼoa a bakolee kjoamatokon je chjota xi nganʼio machjénle. A kʼoati nʼio mandosinná nga ʼmiyasoán kʼoa nga bakoyaa xi tʼatsʼe Chjotaxále Niná (Luc. 4:43). Kʼiatsa kʼoanʼia bakoñá nga kʼoati nʼio mandosinná xi tʼatsʼe Niná.

13, 14. 1) Jósʼin koa̱n chjénngiaa jotjíosʼín je ndsʼee xi choa̱le Jesús tjíofitjenngi. 2) Tʼeyanajmí jngui choa̱.

¹³ Nichxin xi tiyoaa ndʼaibi, nʼio nkjín xi tjíokjenngi je choa̱le Jesús. Ndsʼee jebi kao kjoatsjoa tjíotsoyason, nda kjoeya xi kjaʼaí, bakó kjoamatokon kʼoa kao xi kjaʼaísanile. Kʼoati tjíokjántʼakao je jée xi kichʼá ngatsʼiaa tojoni nga kʼoakoa̱nkjoan josʼin mele je Jeobá. Jngo tichjaa xi Rachel ʼmi xi Brasil tsʼe, itso: “Ngasʼa kui najño sichjén jokjoan xi sʼa bʼatsen chjotse kʼoa tsín nʼio ndakjoan. Tonga kʼianga jekiskotʼaya je Énle Niná, tsakʼenele yaona nga kui kitjenngia jmeni xi tso. Alikui choa ñʼai koanna nga kʼoakisʼian, tonga nʼio tsjoa kisʼe tokoan kʼoa tsaʼbeña jme xá tijnaña”.

¹⁴ Jngo tichjaa xi Filipinas tsʼe xi Reylene ʼmi, kjaʼaí kjoa jaʼatojin. Ninga jetestigole Jeobá ma, kui nʼio kitjenngi nga jngo carrera sʼe̱le kʼoa nga nda xá sʼe̱le. Itso: “Alikui tikoanndosinnina je xále Niná. Tonga ndi̱toon tsaʼbe nga tjín xi chana, ninga nda je xá xi kisʼena. Kuinga kui títjon kisikʼéjna ijngokʼaña je xále Jeobá”. Je tichjaa Reylene tíbakó nga tjínle kjoamakjain nga kuitjoson jmeni xi tso je Énle Niná, tojosʼin faʼaitʼa ya Mateo 6:33, 34. Ñaki kʼoatjín kon tichjaa nga je Jeobá sikuinda. Tsakui nichxin kʼoati tjío ndsʼee je xi kʼoatjíosʼín ya jtín jña tiyoaa. Kʼianga ʼyaa josʼin tjíokjenngile Jesús, kʼoati mená chjénngiaa je choa̱le (1 Cor. 11:1; 2 Tes. 3:7).

KATASʼENÁ “KJOAFAʼAITSJEN XI TSʼE CRISTO”

15, 16. 1) Jmé xi tjínnele sʼiaan nga kʼoakoa̱nkjoaan jokoankjoan je Cristo. 2) Jókoa̱nni jchaa josʼin síkjaʼaitsjen je Jesús.

¹⁵ Jósʼin koa̱n chjénngilee je Cristo. Ya 1 Corintios 2:16 kʼoatso nga tjínnele katasʼená je “kjoafaʼaitsjen xi tsʼe Cristo”. Kʼoa ya Romanos 15:5 kʼoatso “nga tojngo kjoafaʼaitsjen [katasʼená], josʼin kitso Cristo Jesús”. Kʼianga koa̱n chjénngilee, machjén nga kataʼyaa jokjoan, josʼin síkjaʼaitsjen kʼoa josʼín. Je xi ngisa koanndosinle kui josʼin tsakʼejna ngixko̱n Niná. Kʼianga kʼoakoa̱nkjoaan jokjoan je Jesús, ngisaa koa̱nchriantʼasalee je Jeobá. Kuinga nʼio tjínnile kjoandosin nga katasʼená je kjoafaʼaitsjenle Cristo.

¹⁶ Jmé xi koasenkaoná nga kʼoasʼin si̱kjaʼaitsjeen. Je chjotatjenngile Jesús tsabee je kjoaxkón xi tsakatío, je kjoanokjoaya xi kitsjoa, josʼin tsabekon je chjota kʼoa josʼin kisichjén je kjoafaʼaitsjen xi tsjoá Niná. I kitso je chjotatjenngile: “Testigo níjin ngayije jmebe kjoa xi kʼoakisʼin” (Hech. 10:39). Ninga tsínlani koa̱n jchaa Jesús ndʼaibi. Tonga je Jeobá yaa tsakʼétʼaxo̱n je libro xi tsʼe Mateo, Marcos, Lucas kao Juan jokoankjoan je Jesús. Kʼiatsa kʼoéxkiaa kʼoa si̱kjaʼaitsjenjiaan nʼio tse xi koakoyaná tʼatsʼe josʼin kisikjaʼaitsjen je Jesús. Tsa kʼoasʼiaan, jé Jesús tichjenngilee kʼoa kʼoati kui kjoafaʼaitsjen tísʼená je kjoafaʼaitsjen xi kisʼele je Jesús (1 Ped. 2:21; 4:1).

17. Jósʼin basenkaoná nga kʼoasʼin nikjaʼaitsjeen josʼin síkjaʼaitsjen je Jesús.

¹⁷ Jósʼin koasenkaoná nga kʼoatisʼin si̱kjaʼaitsjeen josʼin síkjaʼaitsjen je Jesús. Nga koa̱njinná kuila si̱ngósonkoaa choa̱ jebi. Tobʼelañá, kʼianga kui chinee je tsojmi xi ndakjoan, tsjoánganʼioná. Kʼoatisʼinni, kʼianga kui binyaa kjoafaʼaitsjenná je kjoafaʼaitsjen xi tsʼe Cristo ngisaa nʼio sʼejna kjoamakjainná. Nga kʼoanʼia, majinná josʼin tsa jelani Jesús xi kui kjoa tífaʼatojin je kjoa xi bitjatojiaan. Jebi basenkaoná nga kui chjoéjiaan xi nyʼán kʼoe kjoafaʼaitsjenná kʼoa xi sasénle Niná. Kuinga nʼio tjínnile kjoandosin nga kjuintjenngiaa kjoafaʼaitsjen jebi: “[Kʼoakatamakjoaan] jo kjoan Nainá Jesucristo” (Rom. 13:14).

18. Jméni xi kaʼyaa i̱ kjoaʼmiya jebi tʼatsʼe josʼín jngo chjota xi kʼoasʼin síkjaʼaitsjen josʼin síkjaʼaitsjen Niná.

¹⁸ I̱ kjoaʼmiya jebi kui kaʼyaa josʼín jngo chjota xi kʼoasʼin síkjaʼaitsjen josʼin síkjaʼaitsjen Niná. Kʼoati kaʼyaa nga nʼio basenkaoná je choa̱le chjota xi kisʼele kjoamakjain. Kʼoa kaʼyañá nga nʼio sʼejna kjoamakjainná kʼianga sʼená je “kjoafaʼaitsjen xi tsʼe Cristo”. Tonga chasa nga chótʼayajiaan xi tʼatsʼe jebi. Tobʼelañá, jókoa̱nni jchaa tsa nʼio tíjna kjoamakjainná. Jméni xi koa̱n sʼiaan nga tosi tonda kʼoasʼin si̱kjaʼaitsjeen josʼin síkjaʼaitsjen Niná. Jósʼin koasenkaoná tsa kʼoasʼiaan. Yaa kjoaʼmiya xi ijngo chótʼayajiaan xi tʼatsʼe jebi.