Si̱chjén kjoatéxomale Niná kao kjoafaʼaitsjen xi tsjoá nga si̱chjinee je kjoafaʼaitsjenná

1. Jméni xi tsín mangósoán kao je cho̱.

ÑÁ XI chjotaa alikui mangósoán kao je cho̱, nga̱ je Jeobá kitsjoaná je kjoafaʼaitsjen, xi kʼoati tokoán ʼmilee. Je Adán kao Eva kisʼele kjoafaʼaitsjen. Kʼianga jejaʼatone kjoatéxomale Niná tsakatioʼma, kʼoa jebi kui bakó nga tsín tinda kisationi kjoafaʼaitsjenle.

2. Jósʼin mangóson je kjoafaʼaitsjenná kao jngo volantele barco (chótsenlai sén xi faʼaitʼa ibi).

² Je kjoafaʼaitsjenná bándiaaná josʼin kjuinkoaa yaoná kʼoa kʼoatsoná jmeni xi ndatjín kʼoa jmeni xi chʼaotjín. Tobʼelañá, kʼianga tsín nda bándiaaná je kjoafaʼaitsjenná yaa mangóson kao jngo barco xi tsín nda síxá je volantele. Kʼiatsa tsín sʼe̱ndaya je volantele barco jebi alikui nda sixá nga jeya tjenjin ndáchikon. Tonga tsa jngo volante xi nda síxá, je chjota xi síxákao je barco ngisaa choa ñʼai koa̱nle nga nda kuicho jñani tífi. Tikʼoasʼinni, kʼiatsa nda bándiaaná je kjoafaʼaitsjenná koasenkaoná nga jchaa jmeni xi ndatjín kao jmeni xi chʼaotjín. Tonga kʼianga nda koandiaaná je kjoafaʼaitsjenná tjínnele nga si̱chjinee.

3. Jósʼin bichómani kʼianga tsín nda bándiaaná je kjoafaʼaitsjenná.

³ Kʼianga tsín nda bándiaaná je kjoafaʼaitsjenná alikui ʼyaa tsa chʼaotjín jmeni xi tinʼia (1 Tim. 4:1, 2). Kʼoa saʼnda kʼoajinsʼin si̱kjaʼaitsjeen nga “ndatjín je xi chʼaotjín” (Is. 5:20). Je Jesús i kitsole je chjotatjenngile: “Kjoaʼaí ora kʼia nga toʼyani xi sikʼenno sikjaʼaitsjen nga kʼoasʼin sixále Niná” (Juan 16:2). Kui kjoafaʼaitsjen jebi kisʼele je chjota xi kisikʼien Esteban, kʼoa kʼoatisʼin síkjaʼaitsjen je chjota xi kʼoasʼín ndʼaibi (Hech. 6:8, 12; 7:54-60). Je chjota xi relijión tjínle xi kʼoasʼin síkjeson xínkjín kʼoa xi kʼoatso nga Niná síxále, tjíofaʼatoneni je kjoatéxomale Niná (Éx. 20:13). Nga kʼoasʼín, alikui nda bándiaale je kjoafaʼaitsjenle.

4. Jósʼiaan nga tsín je kjoafaʼaitsjenná katabʼanachaná.

⁴ Jósʼiaan nga tsín je kjoafaʼaitsjenná katabʼanachaná. Je kjoatéxomale Niná kʼoa kao kjoafaʼaitsjen xi tsjoáná basenkaoná “nga bakóyaná, nga nchja̱tikaoná, nga sichoyandaná, nga sikinyáyandiaaná xi kjoakixi” (2 Tim. 3:16). Kʼianga nda koandiaaná je kjoafaʼaitsjenná machjén nga kʼoasʼin si̱kjaʼaitsjeen josʼin síkjaʼaitsjen Niná, tjínnele chótʼayá je Biblia, si̱kjaʼaitsjenjiaan kʼoa si̱tjosoán jmeni xi tso. Kuila kataʼyaa jósʼin basenkaoná je kjoatéxomale Niná kʼoa kao kjoafaʼaitsjen xi tsjoá nga koa̱n si̱chjinee je kjoafaʼaitsjenná.

SI̱TJOSOÁN JE KJOATÉXOMALE NINÁ

5, 6. Jósʼin basenkaoná nga nitjosoán je kjoatéxomale Niná.

⁵ Kʼianga koasenkaoná je kjoatéxomale Niná ali tokuijin xi machjén nga kʼoéxkiaa kʼoa nga kataʼyaa jmeni xi tso. Tjínnele nga tsjoacha koaan kʼoa si̱tjosoán. Je Énle Niná itso: “Jticha katamao xi chʼaotjín, kʼoa tsjoacha katamao xi ndatjín” (Amós 5:15). Je xi koa̱n sʼiaan kuinga kʼoasʼin jchatokoán tsa jmeni josʼin bekon je Jeobá. Tobʼelañá, tsa tsín nda tísʼefé kʼoa je chjinexki kʼoakuitsoná josʼin tjínnele kuichaa, jme ejercicio xi sʼiaan kʼoa tsa jmesani xi kjaʼaínile. Tsa koasenkaoná nga kjuintjenngiaa jmeni xi kuitsoná je chjinexki, ndajin sʼe̱ tokoán kʼoa chjíjin jchatokoán je kjoafaʼaitsjen xi tsjoáná.

⁶ Kʼoatisʼinni, je Niná tsjoáná je kjoatéxomale xi basenkaoná nga tsín jme kjoa ska̱jiaan kʼoa nga ndasʼin kuiyoaa. Tobʼelañá, je Biblia tsjoáná kjoafaʼaitsjen xi tʼatsʼe josʼin tjínnele jchatokoán je énndiso, kjoachʼanacha, kjoaché, kjoachajngi, kjoatsʼen kʼoa kao kjoabʼenda (tʼexkiai Proverbios 6:16-19;a Apoc. 21:8). Kʼianga mangíntjenngiaa je kjoatéxomale Jeobá, ngisaa tsjoacha maa kʼoa ngisaa chjí ʼyatokoán.

7. Jósʼin basenkaoná nga bʼexkiaa je choa̱ xi faʼaitʼa Biblia kʼoa nga nikjaʼaitsjenjiaan.

⁷ Alikuikjoan machjén nga kjoa kuitjátojiaan kʼianga koa̱njinná nga tsín ndasʼin bichómani kʼianga tsín nitjosonlee Niná. Kʼianga kʼoéxkiaa je Biblia jchañá jñani tsín nda kisʼin kʼa je chjota kʼoa koaan si̱kjaʼaitsjenjiaan nga tsín kʼoati kui kjoa katatsaojiaan tsanda ñá. Ya Proverbios 1:5 itso: “Je xi chjine nrʼoé kʼoa sʼesale kjoafaʼaitsjen”. Tʼatsʼe Niná nroani kjoafaʼaitsjen jebi kʼoa nʼio ndasʼin basenkaoná. Tobʼelañá, je David nʼio tse kjoa tsakʼejnajin nga tsín kisitjosonle Niná kʼoa nga kisichajngi kao Bat-seba (2 Sam. 12:7-14). Kʼianga chótʼayajiaan xi tʼatsʼe David, koaan si̱kjaʼaitsjenjiaan kjoachjonangi jebi: “Jméni xi tjínnele kisʼin tsakai je David nga tsínkui kjoa jaʼatojin. Jméni xi sʼian tsa kʼoati kui kjoa kjoaʼatojian. A je choa̱le José kjuítjenngia axo je choa̱le David” (Gén. 39:11-15). Tsa si̱kjaʼaitsjenjiaan josʼin kuichomani jmeni xi sʼiaan, ngisajin jticha koaan xi chʼaotjín.

8, 9. 1) Jósʼin basenkaoná je kjoafaʼaitsjenná. 2) Jósʼin basenkao je kjoafaʼaitsjenná jmeni xi tso Niná.

⁸ Alikui kui kʼoanʼia jmeni xi ʼyaa nga jtike Niná. Tonga jónʼia tʼatsʼe jmeni xi tsín tsoyakixi je Biblia. Jómani ʼyaa jmeni xi mele Jeobá nga sʼiaan. Kʼiatsa kao kjoatéxomale Niná tinichjineñá je kjoafaʼaitsjenná, kuijin xi ndatjín chjoéjiaan.

⁹ Je Jeobá tsjoakená, kuinga tsjoániná je kjoafaʼaitsjen xi bándiaaná. Itsoná: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai” (Is. 48:17, 18). Kʼianga bichókajin ni̱ma̱ná je kjoafaʼaitsjen xi tsjoá je Biblia, basenkaoná nga nindayasaa je kjoafaʼaitsjenná kʼoa nga kui xi ndatjín chjoéjiaan.

SI̱CHJÉN KJOAFAʼAITSJEN XI TSJOÁNÁ NINÁ

10. 1) Jósʼin basenkaoná je kjoafaʼaitsjen xi tsjoáná Niná. 2) Jósʼin kisichjén Jesús je kjoafaʼaitsjen xi tsjoá je Niná.

¹⁰ Je kjoafaʼaitsjen xi tsjoáná Niná basenkaoná nga kui xi ndatjín kʼoanʼia. Kʼianga majinná je kjoafaʼaitsjen xi tsjoá je Biblia basenkaoná nga ʼyaa josʼin síkjaʼaitsjen je Jeobá, kʼoa ánni nga kui kjoatéxoma kitsjoaniná. Kʼianga tsakʼejna Jesús i̱ Sonʼnde, kui kitsoyale je chjotatjenngile nga katamajinle josʼin bichómani tsa jmeni xi nʼia. Tobʼelañá, kʼoakitsole nga kjoabixkan bichómani kʼianga bʼengijtiaa tokoán kʼoa nga kjoachajngi bichómani kʼianga chʼaotjín xi nikjaʼaitsjeen (Mat. 5:21, 22, 27, 28). Kʼiatsa kʼoaiʼndee nga kui koandiaaná je kjoafaʼaitsjen xi tsjoá je Biblia, tinichjineñá je kjoafaʼaitsjenná kʼoa kuijin chjoéjiaan jmeni xi sasénle Niná (1 Cor. 10:31).

11. Ánni nga tsín mangósonni josʼin nikjaʼaitsjeen nga jngó jngoá.

¹¹ A kui xi tsonile nga tongóson sʼin chjoéjiaan ngatsʼiaa jmeni xi nʼia. Mai. Ningalani kui mangíntjenngiaa ngatsʼiaa je kjoafaʼaitsjen xi faʼaitʼa Biblia, alikui mangóson josʼin chjoéjiaan jmeni xi nʼia nga jngó jngoá. Tobʼelañá, tʼatsʼe xi ʼyo. Je Biblia alikui bʼéchjoa nga koa̱n sʼioaa je xán, tonga kʼoatso nga tsín tjínnele si̱kʼatoné choa̱le (Prov. 20:1; 1 Tim. 3:8). Kʼianga kui sʼioaa xi xán tjínle, a tokui kjuinñá jokji tjínnele sʼioaa. Kʼianga nyʼán sʼe̱ je kjoafaʼaitsjenná kʼoati tjínnele kuenta sʼiaan je kjoafaʼaitsjenle xi ngikʼa.

12. Jósʼin basenkaoná Romanos 14:21 nga tsín kjoafaʼaitsjenle xi ngikʼa si̱katéngiaa.

¹² Je Pablo kʼoakitsole je chjotale Cristo nga kuenta katasʼín je kjoafaʼaitsjenle xi ngikʼa, i kitso: “Nda tjín nga tsín tsa yao chinai, ni ʼyojin xán, kʼoa nijmejin xi nʼiai xi sa̱téngi ndsʼai, xi sikajngi jée, axo xi siʼindajin nga je” (Rom. 14:21). Kʼiatsa jngo ndsʼee xi tsín tsjoáʼndele kjoafaʼaitsjenle nga ʼbi, alikuijin xán sʼioaa ngixko̱n ánni nga tsín kjoafaʼaitsjenle si̱katéngisíñá. Tjínkʼa ndsʼee xi nʼio tsakʼi nga kjesa kotʼayajin je Énle Niná, tonga ndʼaibi kʼoatjío kon nga tsín tixán skuíni. Alikui mená nga kui kjoa katatsaojin ijngokʼa je ndsʼee (1 Cor. 6:9, 10). Tsa koa̱nkaile je ndsʼee nga xán kʼoailee, alikuijin tibakolee kjoatsjoacha tsa kjoanʼio kʼoénelee nga kataʼbi.

13. Jméni xi kisʼin Timoteo nga koan kitsoyasonle je xi kjaʼaí chjota.

¹³ Kataʼyala je choa̱le Timoteo, kʼianga kichole 20 nó kitsjoaʼnde nga tsakichandai je yaole, ninga tsín choa ñʼai koanle nga kʼoakinikao, kʼoakisʼin nga tsín sikaténgi je chjota judío xi kitsoyasonle. Nga kʼoakisʼin, kui choa̱le pastro Pablo kitjenngi (Hech. 16:3; 1 Cor. 9:19-23). Kʼoa ñá jónʼia. A tiyondañá nga tsínkui kʼoasʼiaan jmeni xi sikaténgi xi ngikʼa ninga ñʼai koa̱n sakʼoaná.

TOSI TONDA KATASʼENÁ KJOAFAʼAITSJEN

14, 15. 1) Jmé xi tsoyanile nga jesʼená kjoafaʼaitsjen. 2) Jósʼin mangóson nga jetjínná kjoafaʼaitsjen kʼoa kao nga bakoá kjoatsjoacha.

¹⁴ Ngatsʼiaa xi chjotale Cristo maa, nga jetsaʼyaa xi tochoa ñʼai tjín xi faʼaitʼa Biblia jengisa tísʼená kjoafaʼaitsjen ndʼaibi (Heb. 6:1). Jebi alikui xi tsonile nga tosasa sʼe̱niná kjoafaʼaitsjen, tjínnele nga ntsjaintsjai chótʼayá. Kʼianga jengisa sʼe̱ná kjoafaʼaitsjen, chjine koaan kʼoa ngisaa jchaa jme xi sʼiaan. Kuinga nyaon nyaon kʼoéxkiasíñá je Biblia (Sal. 1:1-3). A kʼoasʼin tjínndajinná nga nyaon nyaon bʼexkiaa. Kʼiatsa kʼoanʼia koasenkaoná nga ngisa koa̱njinná je kjoatéxomale Niná kao kjoafaʼaitsjen xi tsjoá.

¹⁵ Je kjoatéxoma xi ngisa tjínle kjoandosin kui kjoatsjoacha. Je Jesús i kitsole je chjotatjenngile: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Je Santiago, xi ndsʼe̱jon koanni je Jesús, “kjoatéxoma xi ngʼa” tíjna kitsole (Sant. 2:8). Je Pablo i kitso: “Je xi síjngo kjoatéxoma, jé xi kjoatjaocha” (Rom. 13:10). Je Biblia kʼoatso nga “kjoatjaocha” je Niná (1 Juan 4:8). Je Jeobá ñaki bakó je kjoatsjoachale. Je Juan itso xi kiski: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe” (1 Juan 4:9). Kʼianga bakoá nga tsjoachaa je Jeobá kao Jesús, je ndsʼee kʼoa kao xi kjaʼaí chjota, kʼoasʼin bakoñá nga jetísʼená kjoafaʼaitsjen (Mat. 22:37-39).

16. Kʼianga jengisa sʼená kjoafaʼaitsjen, ánni nga ngisa chjí ʼyatokonñá je kjoafaʼaitsjen xi tsjoá je Biblia.

¹⁶ Je kjoatéxoma to sakʼoaa machjén, tonga je kjoafaʼaitsjen xi tsjoá je Biblia machjénntsjainá. Kʼianga jengisa sʼená kjoafaʼaitsjen, ngisaa chjí ʼyatokoán je kjoafaʼaitsjen xi tsjoá je Biblia. Tobʼelañá, kʼianga sʼa ʼndí kjoan je xtiʼndí, alikui majinle jokji xkón tíjna tsa je simiyo chjota xi tsín nda sʼín, kʼoa je xijchále kʼoatsole nga tsín je katasímiyo (1 Cor. 15:33). Tonga kʼianga jemajchínga je xti, tobijbi majinle jotso je kjoafaʼaitsjen xi tsjoá je Biblia kʼoa male nda kjoéjin je xi miyole koa̱n (tʼexkiai 1 Corintios 13:11;b 14:20c). Tikʼoasʼinni, kʼianga nikjaʼaitsjenjiaan je kjoafaʼaitsjen xi tsjoáná Niná, chaan kʼoatisʼin nikjaʼaitsjeen josʼin síkjaʼaitsjen je Niná kʼoa kui xi ngisa nda bándiaaná.

17. Ánni kʼoabixónsíñá nga tjínná jmeni xi koasenkaoná kʼianga kui chjoéjiaan xi ndatjín.

¹⁷ Nkjín koya tjínná jmeni xi koasenkaoná kʼianga kui chjoéjiaan jmeni xi sasénle Jeobá. Ya Biblia faʼaitʼa je kjoatéxoma kao kjoafaʼaitsjen xi tsʼe Niná xi basenkaoná nga sʼejngo tokoán kʼoa nga kui kʼoanʼia je xi ndatjín (2 Tim. 3:16, 17). Kʼianga jchasaa jmeni xi mele je Jeobá tjínnele nga tosi tonda kʼoénelee yaoná (Efes. 5:17). Koaan si̱chjén jmeni xi títsjoáná je naxinandále Niná, jolani je Índice de las publicaciones Watch Tower, Xo̱n xi síchjén je testigole Jeobá nga jme xi básjaiya, je Watchtower Library, je BIBLIOTECA Watchtower kʼoa kao aplicación JW Library. Jebi nʼio nda basenkaoná kʼianga chotʼayá nga toñá kʼoa tsa kao familianá.

KJOANDA XI TJENKAO NGA BIBLIA BÁNDIAALE KJOAFAʼAITSJENNÁ

18. Jmé kjoanda xi so̱koná kʼiatsa kʼoasʼin kjuinkoaa yaoná jotso je kjoatéxomale Niná kʼoa kao kjoafaʼaitsjen xi tsjoáná.

¹⁸ Kʼiatsa si̱tjosoán je kjoatéxomale Jeobá kʼoa kao kjoafaʼaitsjen xi tsjoáná, nʼio tse kjoanda so̱koná. Ya Salmo 119:97-100 itso: “¡Nʼio tsjoake̱ je kjoatéxomali! Kui sikjaʼaitsjenjian bʼajnda nichxin. Je kjoatéxomali ngisaa síchjinena tikʼoajinni je chjotakontrana, nga̱ yaa tjen tíjnakaona ngantsjai nichxin. Ngisaa tse kjoachjine tjínna tikʼoajinni ngatsʼi maestrona, nga̱ kui nʼio sikjaʼaitsjenjian je kjoatéxomali. Ngisaa machoyana josʼian tikʼoajinni je chjota xi jejchínga, nga̱ sitjosonña je kjoatéxomali”. Kʼianga si̱kʼayalee nichxin nga si̱kjaʼaitsjenjiaan je kjoatéxomale Niná kʼoa kao kjoafaʼaitsjen xi tsjoáná, ngisaa chjine koaan, ngisaa koa̱njinná kʼoa jchañá jmeni xi sʼiaan. Kʼiatsa kʼoénelee yaoná nga kʼoasʼin kjoándiaalee je kjoafaʼaitsjenná “kʼoa koa̱n kjoaan jo kjoan Cristo” (Efes. 4:13).