Jóʼmi je Niná

Kʼianga mená jchaxkoaan jngo chjota i ʼmilee “jóʼmili”. Tsakuilani chjónangilee je Niná jóʼmi, jókuitsoná.

“Anña Jeobá. Kui jebi jaʼaínna” (Isaías 42:8).

A saje kinoʼyai nga kʼoaʼmi je Niná. Tsakui nichxin mai, nga̱ nʼio nkjín chjota xi síkʼatoya je Biblia xi faʼáxin je jaʼaínle Niná kʼoa kui batíongajaonile xi “SEÑOR” tso. Tonga je jaʼaínle Niná tsʼato 7,000 kʼa faʼaitʼa je xo̱njchá xi kichjitʼa títjon je Énle Niná. Kʼoa nga én hebreo kui nga ño letra jebi koanchjénle YHWH kʼoa tsa JHVH, kʼoa jenkjín siento nó kʼianga én kastía “Jehová” sʼin tífaʼatoya kʼoa nga kao énná “Jeobá” sʼin chji.

Je jaʼaínle Niná faʼaitʼa je xo̱n xi kichji nga én hebreo kʼoa nkjín Biblia xi faʼaitʼa jaʼaín jebi

ÁNNI NGA NʼIO TJÍNNILE KJOANDOSIN JE JAʼAÍNLE NINÁ

Chjí bekon Niná je jaʼaínle. Jesoaa Niná kitsjoajaʼaínle yaole. Je Jeobá itso: “Kui jebi jaʼaínna ngantsjai nichxin, kʼoa kui sikjaʼaitsjenjinnina je chjota ngantsjai nichxin” (Éxodo 3:15). Je jaʼaínle Niná ngisaa nkjín kʼa faʼaitʼa ya Biblia tikʼoajinni je én xi ngisasa tse nganʼio tjínle tso, Nʼai, Señor, kʼoa Niná tso, kʼoati ngisa nkjín kʼa faʼaitʼa tikʼoajinni je jaʼaínle chjota jolani tsʼe Abrahán, Moisés, David kao Jesús. Je Jeobá mele nga kataʼyaa je jaʼaínle. Je Biblia itso: “Katabe chjota nga ji xi Jeobá ʼmili, tojiní xi nʼio ngʼa tijnalai jngo tjíjtsa sonʼnde” (Salmo 83:18).

Chjí tsabekon jaʼaínle Niná je Jesús. Je kjoabʼetsʼoa xi padrenuestro sʼin ʼyale, je Jesús tsakakóyale je chjotatjenngile nga i̱sʼin kʼoetsʼoa: “Kataʼyaxkón jaʼaínli” (Mateo 6:9). Je Jesús i kitso kʼianga tsakʼétsʼoale je Niná: “Nʼaina, chʼa̱sjejeyai jaʼaínli” (Juan 12:28). Je Jesús nʼio kitsjoale kjoandosin nga tsakʼasjejeya je jaʼaínle Niná. I kitso: “Tsakakoyale je jaʼaínli, kʼoa tosi tonda koakoyasa” (Juan 17:26).

Nʼio chjí bekon ʼyani xi jebe jaʼaín jebi. Je choʼndale Niná xi tsakatio kjoatse koanjinle nga je koasenkao kʼoa kʼoasjentjai xi totʼatsʼe josʼin tsoyanile jaʼaínle. Jngo xi i̱ kitso: “Je jaʼaínle Jeobá mangóson jngo xjáo taja. Je chjota xi kixi yaa tokanrʼoe kʼoa makuindaa”. Kʼoa ijngo xi i̱ kitso: “Toʼyani xi sikʼaxki̱ je jaʼaínle Jeobá kuitjontjainí” (Proverbios 18:10; Joel 2:32). Je Biblia kʼoatso nga kao je jaʼaínle Jeobá jchanile je choʼndale. “Ngatsʼi naxinandá yaa kʼoétsomakao nga jngó jngó je jaʼaínle ninále, tonga ñá yaa kuitsomakoaa je jaʼaínle Jeobá je Nináná ngantsjai nichxin” (Miqueas 4:5; Hechos 15:14).

JÓSʼIN TSOYANILE JAʼAÍNLE NINÁ

Tojekjoan Niná xi bakinle jaʼaín jebi. Nkjín chjota xi kotʼayason Biblia xi kʼoatso nga je jaʼaínle Niná isʼin tsoyanile: “Jé xosʼín nga kʼoama”. Jmeni xi kitsole Jeobá je Moisés kʼianga tsakjákao, majinná jósʼin tsoyanile jaʼaínle. I kitso: “An koa̱n jmeni xi mena koa̱n” (Éxodo 3:14). Jebi kui xi tsonile nga je kisinda ngayeje jmeni xi tjín. Kʼoati kui xi tsoyanile nga koa̱n sichjén jme xi kisinda kʼianga kuitjoson jmeni xi tjínndajinle. Ningalani nkjín koya josʼin ʼyale Niná tʼatsʼe je nganʼio xi bakó, kjoatéxomale kʼoa kao xi kjaʼaísanile, tonga tokui jaʼaín xi Jeobá tso xi tsoya jokjoan kʼoa jmeni xi koa̱n sʼin.

Kui bakó nga mandosinle xi tʼatsaan. Josʼin tsoyanile je jaʼaínle Niná kui bakó nga nʼio tsjoake jmeni xi kisinda. Kʼianga kʼoatsoná joʼmi kui xi mele nga kataʼyaa xi tʼatsʼe. Je Niná nʼio kjoatse nga tsakʼéjnatsen je jaʼaínle. Alikui mele nga kʼoasʼin si̱kjaʼaitsjeen nga kjin tíjna kʼoa nga tsín mandosinle xi tʼatsaan, tosaa kui xi mele nga si̱chriantʼalee (Salmo 73:28).

Kʼianga nichjén je jaʼaínle kui bakoá nga mandosinná xi tʼatsʼe. Tikjaʼaitsjenlai tsa ʼyani xi meli nga miyoli koa̱n kʼoa kʼoakʼuínlai nga katanchja̱ jaʼaínli. Tonga tsa tsín kʼoasʼin, jósʼe tokuin. Tochale kʼoasʼin si̱kjaʼaitsjain nga tsín mele nga miyoli koa̱n. Kʼoatisʼinni xi kao je Jeobá, tsoyaná joʼmi kʼoa kui xi mele nga si̱chjén je jaʼaínle. Kʼianga kʼoanʼia, kui bakoá nga mená si̱chriantʼalee. Je Biblia kʼoatso nga Jeobá bení ʼyani xi síkjaʼaitsjenjin je jaʼaínle (Malaquías 3:16).

Nʼio tjínle kjoandosin kʼianga ʼyaa je jaʼaínle Niná. Tonga kʼoati machjén nga jchaxkoaan jókjoan.