Kʼianga bʼanachale xínkjín xi jechixan

“Kʼianga kʼoakitsona je xʼinna nga kjaʼaí chjoón kʼoéjnakao xi ngisasa xti tikʼoajinni an, nʼio aon kisʼe tokoan. Alikui ndatjín jmeni xi kisʼin. Nga̱ nʼio tse jmeni xi kisʼian xi tʼatsʼe...” (María, España).

“Toxijña kisikʼéjnana je chjoónna. Nga kʼia nʼio kinroajen tokoan. Toxitsjoani ngayeje jmeni xi tsakʼendajinjin. Sakʼoaa kʼoasʼin kisikjaʼaitsjen nga tsín tiba sʼe̱nina, tonga toxijña tifaʼajenngáni tokoan” (Bill, España).

NGA bʼanachale xínkjín xi jechixan, bixoya je kjoabixanle. Tjínkʼa chjota xi kʼoamanile jmeni xi kasʼín kʼoa síchatʼale xínkjín.a Ninga batiokao ijngokʼani xínkjín kʼoa ninga mai, je xi tsín jme jée kasʼele nʼio aon sʼe kon. Jméni xi koasenkao nga nda sʼe̱ kon.

TEXTOLE BIBLIA XI KOASENKAOLI

Ningalani nʼio aon tjío kon je xi tsín jme jée kisʼele, nkjín mani xi tjíosínʼio kon jmeni xi tso je Biblia. Kʼianga tjíobʼéxkia je Biblia tjíobení nga je Niná majinle jotjío kon (Malaquías 2:13-16).

“Kʼianga nʼio kisikjáojian, ji kininʼiojin tokoan kʼoa kinikinjenyʼánjin ni̱ma̱na” (Salmo 94:19).

Je Bill itso: “Kʼianga tsakʼexkia versículo jebi, ñaki yaa tíjnakaona je Jeobá koanna nga títsjoánganʼiona, tojo sʼín jngo nʼai xi nʼio tsjoake je ʼndíle”.

“Kixi koai̱n kao je chjota xi kixi” (Salmo 18:25).

Je xʼinle Carmen nkjín sá nga tsakʼanachale. Je Carmen itso: “Je xʼinna tsakʼanachana, ninga kʼoalani ñaki kʼoatsakʼe tokoan nga je Jeobá tsínkʼia tsjiónkonna”.

“Ali kʼoajin mano. Tojmenibe xi machjénno, tijélao Niná, tʼetsʼoalao [...]. Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota” (Filipenses 4:6, 7).

Je Sasha itso: “Nkjín kʼa tsakʼexkia texto jebi. Kʼoa kjitʼaa tsakʼetsʼoale Niná, kitsjoana je kjoanyʼánle”.

Je chjota xi jekanikʼaxkiaa sakʼoaa kʼoasʼin kisikjaʼaitsjen nga tsín ska̱le je kjoa xi tjíofaʼatojin, tonga jé Jeobá kisinʼiotʼa yaole kʼoa kitsjoanganʼiole jmeni xi tso je Biblia. Je Bill i kitso: “Je kjoamakjain xi kisʼena nʼio tsakasenkaona ningalani kʼoasʼin koantsen nga tsín tijme xi koan kisʼinña. Ningalani ya tsakʼamje ya konga jña nʼio njio chon, je Niná alikuikʼia kitsjionkonna” (Salmo 23:4).

a Tsa mesali jchai xi tʼatsʼe josʼin tíjna nga síchatʼale xínkjín xi jechixan kʼiatsa jngo xi kabʼanachale xínkjín, chótʼai je revista ¡Despertad! xi tsʼe 22 de abril de 1999 jñani “Cuando el cónyuge es infiel” tso ya página 3-4, 5-8 kao 9-11.

Jmeni xi tjíosʼín kʼa je chjota

Kui síkjaʼaitsjenjin jme xi tso Biblia

Je Bill itso: “Kui librole Job tsakʼexkia kʼoa xijekoan kui tsʼe Salmos tsakʼexkia, tsakandiaangile je texto jñani síkʼaxki̱ je chjota xi kʼoati kisatio kon jotjín tokoan”.

Canción nrʼoéle

Je Carmen itso: “Kʼianga tsín kisʼefe, canción kinrʼoele, kʼoa kui xi tsakasenkaona”. Je Daniel itso: “Koanna kisikjane guitarra kʼoa kui xi tsakasenkaona nga nyʼán kisʼe tokoan”.

Kui nchja̱ni jotjío kon

Je Daniel itso: “Ningalani tsín ngana nga kʼoaxian jotjín tokoan, tonga nkjín miyo kisʼena kʼoa sakʼoaa kjile nga xinyale jotjín tokoan kʼoa sakʼoaa ñaki fakaonajmía. Kui jebi xi nʼio tsakasenkaona”. Je Sasha itso: “Nʼio tsakasenkaona josʼin kitsjoanganʼiona je familiana. Je mana kitsjoanganʼiona ngantsjai, kʼoa je pana kʼoati tsakasenkaona kʼoa tobijbi kitjonganʼio ijngokʼanina”.

Kjitʼa kʼoétsʼoaa

Je Carmen itso: “Ngantsjai nga tsakʼetsʼoa. Ñaki kʼoakisʼe tokoan joni tsa ya tíjnakaona je Niná nga títsjoánganʼiona kʼoa nga tínrʼoéna. Kʼianga kui kjoa jaʼatojian ngisaa koanchriantʼale je Niná”.