Je Jeobá bakó kjoatsjoacha kao kjoatéxomakixi nga kui xi chʼaotjín kʼoama (kjoaʼmiya xi majanni xi nkjín tjíokjao)

1-3. 1) Tojo tso Salmo 5:4-6, jósʼin bekon Jeobá je xi chʼaotjín. 2) Ánni kʼoabixónsíñá nga kontra tíjnale “je kjoatéxomale Cristo” nga xtiʼndí ʼyataon.

JE Jeobá jtikee ngayeje kjoatsʼen (tʼexkiai Salmo 5:4-6).b Kʼoa je xi ngisasa nʼio chʼaosʼin be kuinga xtiʼndí ʼyataon. Joni je Jeobá, ñá xi choʼndale maa kʼoati nʼio jtichaa nga xtiʼndí ʼyataon kʼoa alikui koa̱n kʼoaiʼndee nga kʼoakatama ya jinjtín (Rom. 12:9; Heb. 12:15, 16).

² Nga xtiʼndí ʼyataon kontra tíjnale “je kjoatéxomale Cristo” (Gál. 6:2). Tojosʼin tsaʼyaa ya kjoaʼmiya xi jaʼato, ngayeje jmeni xi kitsoya kʼoa jmeni xi kisʼin je Jesús, kui yʼangini je kjoatsjoacha kao kjoatéxomakixi. Kʼoa nga chjotale Cristo maa, kui kjoatéxoma mangíntjenngiaa, tjao ʼyaa je ʼndíxti kʼoa kui xi mená nga nda katasatío kon. Tonga je xi xtiʼndí betaon nʼio chʼao kjoan kʼoa to yaole fini, kʼoa nga kʼoamatʼain je ʼndíxti alikui tinda satíoni kon kʼoa kʼoasʼin síkjaʼaitsjen nga tsín ʼya xi tsjoake.

³ Nga xtiʼndí ʼyataon kʼoakjima jngo tjíjtsa Sonʼnde, kʼoa xi tokʼoamaná kuinga kʼoati jekjima jinnaxinandále Niná. Ánni. Nga̱ nichxin xi tiyoaa ndʼaibi nʼio tjín chjotatsʼen kao “xi bʼanacha”, kʼoa tjínkʼa xi kjimamele tjíofaʼasʼenjin naxinandále Niná (2 Tim. 3:13). Xi ijngosani, tjínkʼa xi kʼoatso nga choʼndale Niná ma, xi tsjoáʼndele yaole nga kui símekon xi chʼaotjín nga xtiʼndí betaon. Chótʼayajinla ánni nga nʼio tseni jée nga xtiʼndí ʼyataon. Xijekoa̱n, kui chótʼayajiaan jósʼin bʼéndajin je xi chjotajchínga sʼin tjío kʼianga ʼya xi ai jée bajngi, jolani nga xtiʼndí ʼyataon, kʼoa jósʼin sikuinda ʼndíxtile je xi xijchá ma.c

JNGO JÉE XI NʼIO AI TÍJNA

4, 5. Jósʼin miʼaon je ʼndíxti xi ʼyataon.

⁴ Je xi ʼyataon nkjín nó nga kjoaba batiojin. Tonga ali tsa tojejin xi tsín nda satío kon. Kʼoati aon satío kon je xínkjín kao je ndsʼee xi tjío jinjtín. Jngoo jée xi nʼio ai tíjna kʼianga xtiʼndí ʼyataon.

⁵ Jée xi bajngi chjota xi xtiʼndí betaon.d Jée tjenkao kʼianga nikiʼoaan kʼoa nga kjoañʼai nikjaʼá xi ngikʼa. Kʼoa tojosʼin jchaa ya kjoaʼmiya xi ijngo, je xi xtiʼndí síkaotaon tsee kjoañʼai síkjaʼá. Je xtiʼndí xi kʼoamatʼain alikui tiʼya xi sínʼiotʼani kʼoa jeto tsokjón. Tjínnele si̱kuindaa je xtiʼndí nga tsín kʼoakatamatʼain. Kʼoa tjínnele nga si̱nʼioá kon kʼoa kuinyakoaa je xi kui kjoa jaʼatojin (1 Tes. 5:14).

6, 7. Ánni nga jée bajngini ngixko̱n jtín kao ngixko̱n chjotaxá je xi xtiʼndí betaon.

⁶ Bajngijée ngixko̱n jtín. Je xi xtiʼndí betaon chʼaosʼin síkʼéjna je jtín (Mat. 5:16; 1 Ped. 2:12). Tonga alikui kixi tíjna nga totʼatsʼe jngo chjota chʼaosʼin kʼoaxki̱ je ndsʼee xi millón mani, xi tjíobʼénele yaole nga tosi tonda tjíosíxále Niná (Jud. 3). Alikui bʼaiʼndee nga tosi tonda naxinandále Niná kʼoéjnajin je xi tsín kʼoamanile nga kui xi chʼaotjín kʼoasʼín. Nga jngo chjotale Cristo xi kʼoasʼín alikui nda bʼaxki̱ je jtín.

⁷ Bajngijée ngixko̱n chjotaxá. Je chjotale Cristo tjínnele sitjosonle je chjotaxá (Rom. 13:1). Nitjosonlee je chjotaxá kʼianga mangíntjenngiaa je kjoatéxoma xi tjín ya naxinandá jñani tinijchá yaoná. Tsa ʼyani xi ya jtín tíjnajin kjoaʼatone kjoatéxoma, jolani tsa xtiʼndí skoe̱taon, bajngijée ngixko̱n chjotaxá (tingósonkoai Hechos 25:8). Ningalani tsín je kjinele xi chjotajchínga sʼin tjío nga kuitjoson jotso je kjoatéxoma, alikui je basenkao je xi xtiʼndí betaon nga tsín jme kjoañʼai kʼoaile (Rom. 13:4). Tijé bajnginile kjoañʼai yaole je xi jée bajngi (Gál. 6:7).

8. Jósʼin bekon Niná kʼianga kjaʼaí xi síkiʼaon je chjota nga bajngijée.

⁸ Bajngijée ngixko̱n Jeobá (Sal. 51:4). Kʼianga kjaʼaí xi síkiʼaon je chjota nga bajngijée, kʼoati bajngijée ngixko̱n Niná. Jngola choa̱ kataʼyaa xi ya faʼaitʼa je kjoatéxoma xi kitsjoale Jeobá naxinandá Israel. Je kjoatéxoma jebi kʼoatso nga ʼyani xi kisichéle xínkjín tsakajngijée ngixko̱n Jeobá (Lev. 6:2-4). Tsa jngo xi ya jtín tíjnajin xi xtiʼndí skoe̱taon, joxi tísíchénile jmeni xi tjínle tiʼndí kʼoa tsa tsotiʼndí, nga̱ tsínjin tinda sʼe̱ni kon, kʼoa je chjota xi kʼoasʼín síjndí jaʼaínle Niná kʼoa bajngijée ngixko̱n. Kuinga nʼio chʼaosʼin ʼyatokonñá nga xtiʼndí ʼyataon, nga̱ je chjota xi kʼoasʼín bajngijée ngixko̱n Niná.

9. Jmé xo̱n xi tíbʼasje je naxinandále Jeobá xi ya Biblia yʼangini jokji tífaʼato nó, kʼoa ánni.

⁹ Jokji jetífaʼato nó, je naxinandále Jeobá nʼio nkjín xo̱n tíbʼasje xi ya Biblia yʼangini xi kui nchja̱ni nga ʼyataon je xtiʼndí. Tobʼelañá, je Xo̱n xi Bájinkonná kao ¡Despertad! faʼaitʼa kjoaʼmiya xi kui nchja̱ni jméni xi koa̱n sʼin nga nda sa̱tío kon je xi tsaʼyataon, jósʼin koa̱n kuinyakao kʼoa tsjoánganʼiole xi ngikʼa, kʼoa jméni xi koa̱n sʼin xi xijchá ma nga sikuinda je ʼndíxtile. Je xi chjotajchínga sʼin tjío kʼoati bʼaile kjoafaʼaitsjen xi ya Biblia yʼangini jméni xi koa̱n sʼin kʼiatsa ʼya xi xtiʼndí skoe̱taon. Je naxinandále Niná ntsjaintsjai kotʼajin je xo̱n xi nikasénle je xi chjotajchínga sʼin tjío jósʼin koa̱n kʼoendajin nga kui kjoa sʼe. Nga kʼoasʼin bʼéndajin jngo kjoa je xi chjotajchínga sʼin tjío jotso je naxinandále Niná yaa bakóni nga kui kjoatéxomale Cristo fitjenngi.

JMÉ XI KOA̱N SʼIN JE XI CHJOTAJCHÍNGA SʼIN TJÍO KʼIANGA ʼYA XI AI JÉE BAJNGI

10-12. 1) Kʼianga jngo kjoa bʼéndajin je xi chjotajchínga sʼin tjío, jméni xi kuenta sʼín kʼoa jmé xi ngisa mandosinle. 2) Tojo tso Santiago 5:14, 15, jméni xi sʼín je xi chjotajchínga sʼin tjío.

¹⁰ Kʼianga ʼya xi ai jée bajngi, je xi chjotajchínga sʼin tjío majinle nga kʼoatso je kjoatéxomale Cristo nga tjínnele koako kjoatsjoacha kʼoa nga kʼoasʼin kʼoendajin je kjoa josʼin mele Niná. Nkjín koya jmeni xi kuenta sʼín. Tonga xi ngisasa nʼio mandosinle kuinga katabitjotsje je jaʼaínle Niná (Lev. 22:31, 32; Mat. 6:9). Kʼoati nʼio mandosinle josʼin tjío ngixko̱n Niná je ndsʼee ya jinjtín kʼoa binyakao tsa ʼyani xi jée kajin.

¹¹ Xi ijngosani, tsa kʼoakoa̱nnile je xi jée kabajngi, je xi chjotajchínga sʼin tjío binyakao nga nda katabʼejna ngindiani ngixko̱n Jeobá (tʼexkiai Santiago 5:14, 15).e Kʼianga tsín tinda tíjnani ngixko̱n Niná jngo chjotale Cristo yaa nroani nga kui kʼoasʼín xi chʼaotjín kʼoa nga ai jée bajngi.f Joni jngo chjinexki nga síxkile je xi tímʼe, kʼoatisʼinni je xi chjotajchínga sʼin tjío, binyakao je xi kabajngijée nga nda katabʼejna ijngokʼani ngixko̱n Niná. Je kjoafaʼaitsjen xi tsjoále xi ya Biblia yʼangini koaan kuinyakao je xi kabajngijée nga ndasʼin kʼoéjna ngindiani ngixko̱n Jeobá. Tonga tokʼiaa tsa kʼoakoa̱n kjoaixinile je jéele (Hech. 3:19; 2 Cor. 2:5-10).

¹² Tsee xá kjinele je xi chjotajchínga sʼin tjío. Mandosinle xi tʼatsʼe je ndsʼee xi je kjinele, nga̱ jé Jeobá xi kui xá tjíotsjoále (1 Ped. 5:1-3). Kui xi mele nga nda katasatío kon je ndsʼee ya jinjtín. Kuinga kjitʼanangi bʼéndajinni je kjoa kʼianga sʼejinle tsa ʼyani xi bajngijée, tobʼelañá, tsa ʼyani xi xtiʼndí kabetaon. Jméni xi sʼín. Kuila chótʼayajiaan je kjoachjonangi xi faʼaitʼa ya párrafo 13, 15 kao 17.

13, 14. A sítjoson je xi chjotajchínga sʼin tjío tsa kʼoatso je kjoatéxoma nga tjínnele kjoájétʼain je xi xtiʼndí betaon. Tʼeyanajmí.

¹³ A sítjoson je xi chjotajchínga sʼin tjío je kjoatéxomale chjotaxá. Jaon. Ya naxinandá jñani kʼoatso je kjoatéxoma nga tjínnele sʼe̱jinkon je chjotaxá kʼianga xtiʼndí ʼyataon, je xi chjotajchínga sʼin tjío sítjoson kjoatéxoma (Rom. 13:1). Je kjoatéxoma jebi alikui kontra tíjnale je kjoatéxomale Niná (Hech. 5:28, 29). Kʼianga sʼejinle je xi chjotajchínga sʼin tjío nga ʼya xi xtiʼndí kabetaon, kjitʼanangi nchja̱ ya sucursal nga síjé kjoafaʼaitsjen jméni xi koa̱n sʼin nga kuitjoson jotjínni je kjoatéxoma ngixko̱n chjotaxá.

¹⁴ Je xi chjotajchínga sʼin tjío kʼoatsole je xi kaʼyataon, je xijchále kʼoa tsa ʼyasani xi kjaʼaí xi tjínjinle jme xi kama, nga tjínle ʼnde nga koa̱n kjoájétʼain je xi xtiʼndí kabetaon. Kʼoa tsa ya jinjtín tíjnajin je xi kui jée kabajngi, kʼoa tsa nkjín xi sʼe̱jinle, a chʼaosʼin sikʼéjna jaʼaínle Niná je chjotale Cristo xi fajétʼain xi jée kabajngi. Mai. Alikui koa̱n nga kʼoasʼin sikjaʼaitsjen, nga̱ jé xi xtiʼndí kabetaon xi kasíjndí je jaʼaínle Niná.

15, 16. 1) Tojo tso 1 Timoteo 5:19, ánni nga jao kʼoa tsa jan testigo machjénsíni nga koa̱n jngo comité judicial sʼe̱nda. 2) Jméni xi sʼín je xi chjotajchínga sʼin tjío tsa ya jtín tíjnajin je xi kui jée sʼene nga xtiʼndí kabetaon.

¹⁵ Ya jinjtín, ánni nga jao kʼoa tsa jan testigo machjénsíni nga koa̱n jngo comité judicial sʼe̱nda. Kuinga kʼoatso je Biblia nga tjínnele kʼoakoa̱n ánni nga kao kjoatéxomakixi sʼe̱ndajinni jngo kjoa. Kʼianga je xi kabajngijée likui bʼéjnatsen je jéele, tjínnele jao testigo machjén xi be jmeni xi kama kʼoa kʼiaa bʼénda jngo comité judicial je xi chjotajchínga sʼin tjío (Deut. 19:15; Mat. 18:16; tʼexkiai 1 Timoteo 5:19g). A kui xi tsonile jebi nga kjoanʼio jao testigo machjén nga koa̱n sójétʼain ngixko̱n chjotaxá je xi xtiʼndí kabetaon. Mai. Alikui tikui kjoatéxoma jebi fitjenngini je xi chjotajchínga sʼin tjío kʼoa tsa kjaʼaísa chjota xi koa̱nmele nga kjoájétʼain je xi xtiʼndí kabetaon.

¹⁶ Tsa ya jtín tíjnajin je xi tiʼndí kʼoa tsa tsotiʼndí kabetaon, jao koya tjínni jmeni xi sʼín je xi chjotajchínga sʼin tjío. Xi títjon, sítjoson je kjoatéxoma xi kʼoatso nga koa̱n sójétʼain je xi xtiʼndí betaon. Kʼoa xijema, kʼiaa básjaiya jméni xi tso je Biblia ánni nga skoe̱ni jokjoantjínni je kjoa kʼoa tsa machjén nga jngo comité judicial sʼe̱nda. Kʼoa tsa kʼoakuitso nga tsín jme jée tsakajngi je xi jée tísʼene, je xi chjotajchínga sʼin tjío nrʼoéle jmeni xi tso je testigo. Kʼiaa sʼenda jngo comité judicial tsa jao kʼoa tsa jan mani testigo xi kʼoakatso nga kabajngijée je chjota, jngo xi testigo ma jé xi kʼoatso títjonle je xi chjotajchínga sʼin tjío jme xi kama, kʼoa xi ijngo testigo jé xi kʼoatso nga kʼoati be nga kʼoakisʼin kjoaixi je chjota xi jée tísʼene kʼoa tsa jesa nkjín xtiʼndí tsabetaon.h Tsa tojngo mani testigo xi kʼoakuitso alikui kui xi tsonile tsa énndiso tínchja̱. Ninga tsín jao mani testigo xi kʼoakuitso jme xi kama, je xi chjotajchínga sʼin tjío majinle nga ai jée kasokó kʼoa nga kamiʼaon xi ngikʼa. Je xi chjotajchínga sʼin tjío tosi tonda tsjoánganʼiole je xi kamiʼaon, kʼoa tjenyatokon batio nga nda síkuinda je jtín, ánni nga tsín tiʼya xtiʼndí kataʼyataonni (Hech. 20:28).

17, 18. Tʼeyanajmí jmé xá xi kjinele je comité judicial.

¹⁷ Jmé xá xi kjinele je comité judicial. Je xi chjotajchínga sʼin tjío xi batiojin je comité judicial jé xi tsoni tsa tosi tonda kʼoéjnajin naxinandále Niná je xi jée kabajngi. Je én xi judicial tso alikui xi tsonile tsa je kʼoakuitso tsa kjoañʼai kʼoaile kʼoa tsa mai ngixko̱n chjotaxá je xi kabajngijée. Je xi chjotajchínga sʼin tjío alikui je fayojin jotjínni kjoatéxoma, nga̱ majinle nga je chjotaxá kjinele tsjoále kjoañʼai je chjota xi faʼatone kjoatéxoma (Rom. 13:2-4; Tito 3:1).

¹⁸ Je xá xi kjinele je xi chjotajchínga sʼin tjío xi jngo comité judicial batiojin, kui bʼéndajin kjoa xi bajngi je chjota nga kjoatéxomale Niná faʼatone. Yaa Biblia bʼangini nga kʼoatso tsa kʼoamanile jéele kʼoa tsa mai je chjota xi kabajngijée. Tsa tsín kʼoamanile jéele, bichonsjejin naxinandále Niná kʼoa sʼejinkon je jtín nga tsín titestigole Jeobá mani (1 Cor. 5:11-13). Tonga tsa kʼoamanile je jéele, koaan tosi tonda kʼoéjnajin naxinandále Niná. Je xi chjotajchínga sʼin tjío, koajinkon nga tjínnele nʼio nkjín nó kjoaʼato nga koa̱n kʼoai ijngokʼanile xá jinnaxinandále Niná, kʼoa tsakui nichxinje̱ tsín tikʼia jme xá kʼoainile. Xi ijngosani, nga mandosinle nga nda koatio je ʼndíxti, je xi chjotajchínga sʼin tjío tsakui nichxin toʼma kʼoakuitsole je xi xijchá ma nga katasíkuinda je ʼndíxtile nga tsín ya nʼio katasíchrianle je chjota xi xtiʼndí tsabetaon. Xi tjínnele kuenta sʼin, kuinga tsínkui kʼoeyanajmí ʼyani xi tsaʼyataon.

JÓSʼIN SIKUINDA XI XIJCHÁ MA JE ʼNDÍXTILE

19-22. Jósʼin sikuinda xi xijchá ma je ʼndíxtile (chótsenlai sén xi faʼaitʼa ya portada).

¹⁹ Je xi xijchá ma tjínnele sikuinda je ʼndíxtile nga tsín jme xi katamale.i Je ʼndíxtino jngoo “kjoatjao xi tʼatsʼe Jeobá tínroani” (Sal. 127:3). Xi xijchá mao, jon tíbáneno Jeobá nga si̱kuindao kjoatjao jebi. Jósʼin si̱kuindao je ʼndíxtino nga tsín ʼya xi skoe̱taon.

²⁰ Xi títjon, tjasjaiyao jotjínni tʼatsʼe nga xtiʼndí ʼyataon. Kataʼyao ʼyá chjotani xi xtiʼndí betaon kʼoa jósʼin bʼanachale. Tjenyatokon tiyo nga si̱kuindao je ʼndíxtino nga tsínkui kjoa katatsaojin (Prov. 22:3; 24:3). Tikjaʼaitsjaon nga je xi ngisa betaon xtiʼndí, jé chjota xi bexkon kʼoa xi sínʼiotʼa.

²¹ Xi majaoni, nda chja̱kaonajmío je ʼndíxtino (Deut. 6:6, 7). Nda tinyañolao jme xi tsono (Sant. 1:19). Tikjaʼaitsjaon nga ñʼai male bʼéyanajmí je ʼndíxti jme xi matʼain. Tsakui nichxin kʼoasʼin síkjaʼaitsjen nga tsín koa̱nkjainno jme xi kuitso. Kʼoa tsakui nichxinje̱ je chjota xi tsabetaon tsakinyáxkónle nga tsín jokatatso. Tsa tsen mano nga tjín xi kjimale je ʼndíxtino, ngasin nganda chjónangilao kʼoa nda tinóʼyalao jme xi kuitso.

²² Xi majanni, tʼinyalao ʼndíxtino. Koaan kʼuínyalao tʼatsʼe jotjínni nga xínkjín fayokao je chjota, kʼoa josʼin kʼuínyale xi tʼatsʼe jebi kui xi kuitsoni jotjín nóle. Tʼinyalao jmé xi koa̱n sʼin kʼoa jmé xi koa̱n kuitso tsa ʼyani xi skájon. Tichjáon jmeni xi títsjoáná naxinandále Niná tʼatsʼe jósʼin koa̱n koa̱nkuinda je ʼndíxti (chótsenlai je recuadro “Xi kuinyakao je xijchá kao ʼndíxti”).

23. Jósʼin ʼyatokoán kʼianga xtiʼndí ʼyataon, kʼoa jméni xi chótʼayajiaan ya kjoaʼmiya xi ijngo.

²³ Ñá xi testigole Jeobá maa, nʼio chʼaosʼin ʼyatokoán kʼianga xtiʼndí ʼyataon. Kʼoa je jtín xi tjío jngo tjíjtsa Sonʼnde, nga kui kjoatéxomale Cristo fitjenngi, alikui je binyakao jngo chjota xi xtiʼndí betaon kʼoa alikui bʼéchjoa nga kjoañʼai kʼoaile je chjota xi kʼoasʼín. Tonga jósʼin koa̱n kuinyakoaa je xi tsaʼyataon. Yaa kjoaʼmiya xi ijngo chótʼayajiaan xi tʼatsʼe jebi.