Chja̱ʼaxian kjoafaʼaitsjen xi kontra tjíole je kjoachjinele Niná

1. Jmé kjoafaʼaitsjen xi kitsjoale pastro Pablo je chjotale Cristo xi ya ngʼajmi tjínle kjoachoya.

JE PASTRO Pablo i kitsole je chjotale Cristo xi tsakatio kʼianga siglo 1: “Ali kʼoajinsʼin mangínkao yaono jo tjín kjoa sonʼndebi” (Rom. 12:2). Ánni nga kui kjoafaʼaitsjen jebi kitsjoanile Pablo je chjotale Cristo xi ya ngʼajmi tjínle kjoachoya (Rom. 1:7).

2, 3. 1) Jméni xi tísʼín je Na̱i nga mele kontra kuiyolee je Jeobá. 2) Jósʼin koa̱n chja̱ʼaxinlee yaoná jmeni xi jenʼio koanngakaole kjoafaʼaitsjenná.

² Je Pablo koankjáojinle nga kui kjoafaʼaitsjen kʼoa kao kjoachjine xi tjín sonʼnde kitjenngi kʼa je chjotale Cristo (Efes. 4:17-19). Tsa tsín si̱kuindaa yaoná kʼoajinti koaan tsanda ñá. Je Na̱i nkjín kjoamaña síchjén nga mele si̱kjinlee je Jeobá. Kʼoa kui síchjén jmeni xi nimetokoán. Tobʼelañá, kjoaxintokon kʼoa tsakui nga mená nʼio kʼoaxkiaa. Kʼoa saʼnda kui síchjén jme kjoa xi kitjatojiaan ngasʼa, josʼin nganá kʼoa jmeni xi kisakoyaná, nga kʼoasʼin si̱kjaʼaitsjeen josʼin mele.

³ A koaan chja̱ʼaxinlee yaoná jmeni xi jenʼio koanngakaole kjoafaʼaitsjenná (2 Cor. 10:4). Je pastro Pablo i kitso: “Nikixoyaijin kjoafaʼaitsjen xi ngʼa tjío kʼoa ngayije kjoa xi ngʼa tjín, xi bisótjen kontrale kjoachjinele Niná. Ndoanʼiuinjin ngayije kjoafaʼaitsjen, jméni nga sitjosonsínile Cristo” (2 Cor. 10:5). Tojosʼin tiʼyaa, jé Jeobá koasenkaoná nga chja̱ʼaxinlee yaoná je kjoafaʼaitsjen xi tsín kixi. Joni je xki nga basenkaoná kʼianga chʼin katʼaná, kʼoatisʼinni je Énle Niná, koasenkaoná nga tsínkui sikiʼaonná je kjoafaʼaitsjen xi tjín sonʼnde.

SI̱NDAYAA JE KJOAFAʼAITSJENNÁ

4. Jósʼin kinikʼantjaiyaa yaoná kʼianga kichotʼayá je Énle Niná.

⁴ Si̱kjaʼaitsjenla josʼin kinikʼantjaiyaa yaoná kʼianga kichotʼayá je Énle Niná kʼoa nga kinixálee je Jeobá. Alikuijin tikui kʼoakinʼiañá xi chʼaotjín (1 Cor. 6:9-11). Bʼailee kjoanda Niná nga tsakasenkaoná kʼianga kinikatioá xi chʼaotjín.

5. Jméni xi jao koya síkʼaxki̱ ya Romanos 12:2 xi tjínnele sʼiaan.

⁵ Alikui koa̱n nga tokʼoéjngoaa tokoán. Ninga jekinikatioá ngayeje xi tsín kixi tíjna xi kinʼia kʼianga kjesa mangínsʼenngindájián, machjén nga tosi tonda kʼoénelee yaoná nga tsínkui kʼoasʼian ijngokʼá jokinʼia ngasʼa. Jmé xi tjínnele sʼiaan. Je Pablo i kitso: “Ali kʼoajinsʼin mangínkao yaono jo tjín kjoa sonʼndebi. Katabʼantjaiyao yaono nga koa̱nchjotseyanda ngijngokʼani kjoafaʼaitsjenno” (Rom. 12:2). Jao koya tjínni jmeni xi tjínnele sʼiaan. Xi títjon, alikui kʼoasʼin kjuinkoaa yaoná jochon sonʼnde. Xi majaoni, si̱chjotseyaa je kjoafaʼaitsjenná.

6. Jméni xi bakóyaná je choa̱ xi tsakʼéjna je Jesús tojo tso Mateo 12:43-45.

⁶ Nga si̱chjotseyaa yaoná kitso Pablo alikui xi kitsonile nga tosonngʼa si̱kʼantjaiyaa yaoná. Machjén nga ñaki si̱kʼantjaiyaa jokjoaan (chótsenlai je recuadro “A ñaki tinindayañá yaoná axo tosonngʼa tíbʼantjaiyaa”). Xi tsonile, nga si̱kʼantjaiyaa jmeni xi nimetokoán, jokjoaan kʼoa jotjín tokoán. Kuinga machjénni nga chjónangilee yaoná jebi: “Jméni xi tisʼian nga mena skenngile je Cristo, a tosonngʼa tisikʼantjaiya yaona. Axo ñaki tíbʼantjaiyaña jokjoan ya jinni̱ma̱na”. Nʼio tjínle kjoandosin nga chjónangilee yaoná jebi. Ya Mateo 12:43-45,b jngo choa̱ faʼaitʼa jmeni xi kitso Jesús xi tjínnele sʼiaan (tʼexkiai). Choa̱ jebi kui bakóyaná nga tsín tokui xi machjén nga chja̱ʼaxinlee yaoná je kjoafaʼaitsjen xi chʼaotjín, tjínnele nga kui si̱kjaʼaitsjeen jmeni xi sasénle Niná.

SI̱CHJOTSEYAA JOTJÍN KJOAFAʼAITSJENNÁ

7. Jósʼin si̱kʼantjaiyaa jokjoaan ya jinni̱ma̱ná.

⁷ A koaan si̱kʼantjaiyaa jokjoaan ya jinni̱ma̱ná. Je Énle Niná itso: “Katamachjotseya jo tjín kjoafaʼaitsjenno. Chjóao je ni̱ma̱no xi chjotse, xi ngoyale Niná kisʼendani kao xi tjínle kjoakixi kʼoa kao xi ñaki tsje” (Efes. 4:23, 24). Tojosʼin tiʼyaa, ninga tsín choa ñʼai tíjna, koaanná si̱kʼantjaiyaa yaoná jokjoaan. Ali tsa tokuijin nga chja̱ʼaxinlee yaoná jme xi chʼaotjín nimetokoán kʼoa jmeni xi nʼia. Nga “katamachjotseya jo tjín kjoafaʼaitsjenno” tso je Biblia, kui xi tsonile nga ñaki si̱kʼantjaiyaa jmeni xi nimetokoán, jmeni xi nʼia kʼoa ánni nga kʼoanʼiañá tsa jmeni. Nga kʼoakoa̱n, machjén nga ntsjaintsjai kʼoénelee yaoná.

8, 9. Jósʼin bakóná je choa̱le jngo ndsʼee nga tjínnele ya jinni̱ma̱ná si̱kʼantjaiyaa jokjoaan.

⁸ Jngola choa̱ kataʼyaa xi tʼatsʼe jngo ndsʼee xi nʼio tsʼen koan, xi xán tsakʼi kʼoa xi tsjoake koan kjoabixkan. Kʼianga kisikʼantjaiya yaole kʼoa nga jekisʼenngindá, nda tsʼaxki̱ ya ʼndele. Tonga ñandia, kʼianga to chriankʼia kisʼenngindá, jngo chjotachʼi̱ kicho ya ndʼiale nga mele kʼoele. Nga títjon tokiskale jme xi tsakʼinle, tonga kʼianga chʼaosʼin kisikʼaxki̱ je jaʼaínle Jeobá chjota jebi kʼiaa koanjtile ndsʼee kʼoa tsakʼéle. Ánni kʼoakisʼinni je ndsʼee. Ningalani tsakasenkao jmeni xi tso je Biblia nga kisikʼéjna kjoatsʼen, tonga kjejinni ñaki síndayajin yaole, xi tsonile, kje síkʼantjaiyajin jotjín ya jinni̱ma̱le.

⁹ Ningalani kʼoakoan alikui kisikinroajen kon (Prov. 24:16). Nga tsakinyakao je xi chjotajchínga sʼin tjío tosi tonda tsakʼénele yaole nga nda kisʼin, kʼoa xi jeki nichxin chjotajchínga sʼin tsakʼejna. Kʼoa ñandia kʼianga ya tíjna ya Ndʼia jña chotʼayá, jngo chjotachʼi̱ kicho xi me tsakʼéle jngo ndsʼee xi chjotajchínga sʼin tíjna. Jmé xi kisʼin je ndsʼee. Ngasin nganda tsakjákao je chjota jebi, kʼoa kisíkʼéjnaa ya niʼyale. Ánni kʼoakisʼinni ndsʼee jebi. Kuinga jekisindaya kjoafaʼaitsjenle kʼoa jokoankjoan. Ndʼé koan kʼoa nangitokon koan. Nga kʼoakisʼin, jé Jeobá kitjongʼa.

10. Jméni xi tjínnele sʼiaan nga si̱kʼantjaiyaa jokjoaan ya jinni̱ma̱ná.

¹⁰ Alikui choa ñʼai tíjna nga nikʼantjaiyaa yaoná. Tsakui nichxin saʼnda nkjín nó kuichomani (2 Ped. 1:5). Ninga jekjoatse nga naxinandále Niná tiyojiaan alikui xi tsonile nga ñaki jekinikʼantjaiyaa yaoná. Machjén nga tosi tonda si̱ndayaa jokjoaan ya jinni̱ma̱ná. Kataʼyala kʼaa jméni xi koasenkaoná.

JÓSʼIN SI̱KʼANTJAIYAA JOTJÍN KJOAFAʼAITSJENNÁ

11. Jósʼin basenkaoná je kjoabʼetsʼoa nga nikʼantjaiyaa je kjoafaʼaitsjenná.

¹¹ Xi títjon sʼiaan kuinga kʼoétsʼoaa. Kʼoati kuixoán jokitso je xi kiski salmo, nga kitso: “Jngo ni̱ma̱ xi tsje sʼin tíjna tʼainái, ji Niná, kʼoa jngo espíritu xi chjotse tʼainái, xi tosi tonda kixi koa̱n” (Sal. 51:10). Alikui koa̱n kʼoasʼin si̱kjaʼaitsjeen nga tsín machjén nga si̱kʼantjaiyaa je kjoafaʼaitsjenná, kʼoa si̱jélee Jeobá nga katabasenkaoná. Ánni nga ñaki kʼoakʼoéñá tokoán nga koasenkaoná. Kataʼyala jmeni xi kitsole je chjota israelita xi xíjin koan nichxin nga tsakʼejna Ezequiel, i kitso: “Kʼoa tojngoo ni̱ma̱ tsjoale, kʼoa jngoo espíritu chjotse tsjoale; [...] kʼoa jngoo ni̱ma̱ xi tsʼe yao tsjoale”, xi tsonile, nga kʼoaʼén kʼianga koandiaale Niná (Ezeq. 11:19). Je én jebi sínʼio tokoán. Je Jeobá koanmele nga tsakasenkao je chjota israelita, kʼoa kʼoati tíjnanda nga koasenkaoná nichxin xi tiyoaa ndʼaibi.

12, 13. 1) Tojo tso Salmo 119:59, jméni xi machjén nga si̱kjaʼaitsjenjiaan. 2) Jméni xi chjónangilee yaoná.

¹² Xi majaoni, nʼio tjínle kjoandosin nga si̱kjaʼaitsjenjiaan. Machjén nga nyaon nyaon kʼoéxkiaa je Biblia kʼoa chʼa̱sjeʼaa nichxin nga si̱kjaʼaitsjenjiaan jñáni machjén nga si̱kʼantjaiyaa yaoná (tʼexkiai Salmo 119:59;c Heb. 4:12; Sant. 1:25). Si̱kjaʼaitsjenjiaan tsakui tjiá jkoaa je kjoachjine xi tjín sonʼnde. Machjén nga kataʼyaa jñáni ñʼai maná nga nikʼantjaiyaa yaoná kʼoa kʼoénelee yaoná nga tsínkui katasíkinjená.

¹³ Je xi koasenkaoná kuinga chjónangilee yaoná jebi: “A xinkonña axo chi̱ni̱ña” (1 Ped. 2:1). “A nʼio ngʼa mana tʼatsʼe jmeni xi kisʼian ngasʼa, josʼin tsakʼinyana, kʼoa tsakui josʼin tijna” (Prov. 16:5). “A kʼoasʼin sikjaʼaitsjen nga nangi tjío xi choa tsojmi tjínle kʼoa tsa jeje̱ xi kjaʼaísʼin tsen yaole” (Sant. 2:2-4). “A kui simekoan tsojmi xi tjín sonʼnde” (1 Juan 2:15-17). “A tsjoake̱ña nga kui bʼetsaojinkoa jmeni xi kjoajndí kʼoa xi kjoatsʼen tjenkao” (Sal. 97:10; 101:3; Amós 5:15). Kʼianga chjónangilee yaoná jebi jchañá jñáni machjén nga si̱kʼantjaiyaa yaoná. Tsa chja̱ʼaxinlee yaoná je kjoafaʼaitsjen xi tsín kixi tíjna nda kuiyoaa ngixko̱n Nʼainá xi tíjna ngʼajmi (Sal. 19:14).

14. Ánni nga chósonnilee ʼyáni xi si̱miyoaa.

¹⁴ Xi majanni, machjén nga chósonnilee ʼyáni xi si̱miyoaa. Bʼakaotʼaná jmeni xi sʼín je chjota xi nimiyoaa (Prov. 13:20). Tsa ya ndʼiaskuela kʼoa tsa ya tʼaxáná, je chjota alikui binyakaoná nga kʼoasʼin nikjaʼaitsjeen joni Jeobá. Tonga ya jinjtín koa̱nsjainá miyo xi kuinyakaoná nga koakoá kjoatsjoacha, kʼoa nga kui xi ndatjín kʼoasʼiaan (Heb. 10:24, 25).

NʼIO KATASʼEJNA KJOAMAKJAINNÁ

15, 16. Jósʼín je Na̱i nga mele sikʼantjaiya je kjoafaʼaitsjenná.

¹⁵ Alikui si̱chajiaan nga kui xi mele je Na̱i nga kʼoasʼin si̱kjaʼaitsjeen joni je. Síchjén tojmeni xi tjín sonʼnde tojoni nga tsín kʼoasʼin si̱kjaʼaitsjeen jotso je Énle Niná.

¹⁶ Je Na̱i tojo kʼoatísʼín ndʼaibi jokisʼin ya ʼndenaxóle Edén, tojo i títso: “A kjoaixi nga kʼoakitso Niná nga...” (Gén. 3:1). Kʼianga je Na̱i kjinentsja sonʼnde ndʼaibi, kui noʼya sakʼoaa jmeni xi to jao bʼé tokoán, jolani je én xi tso: “A kjoaixi nga tsín sasénle Niná nga tixʼin xínkjín kʼoa nga tiyánchjín xínkjín batiokaoni chjota. A kjoaixi nga tsín tsjoáʼndeno Niná nga Navidad chʼasjao kʼoa nga sʼuí nóno chʼasjao. A kjoaixi nga kʼoatso je Nináno nga tsín koa̱n njín xinyáno. A kjoaixi nga je Niná xi tjínle kjoatsjoacha tsín tsjoáʼnde nga tosi tonda je si̱miyo xi jetsakichonsjejin naxinandále”.

17. 1) Jmé xi sʼiaan kʼiatsa ʼya xi kui skónanginá xi to jao kʼoe tokoán. 2) Tojo tso Colosenses 2:6, 7, jósʼin kuichomani tsa kʼoasʼiaan.

¹⁷ Alikui koa̱n nga jao kʼoé tokoán tʼatsʼe jmeni xi makjainná. Kʼianga tsín majinná tsa jmeni xi tsoya je Énle Niná, tsakui nichxin kui xosikaoná nga to jao sʼe̱ tokoán tʼatsʼe jmeni xi makjainná. Jméni xi machjén nga sʼiaan. Je Énle Niná kʼoatso nga tjínnele si̱kʼantjaiyaa je kjoafaʼaitsjenná ánni nga jchasíñá jmeni xi mele Niná “jñale xi nda, xi sasénle, xi ñaki tjíjngo” (Rom. 12:2). Nga kjitʼa chótʼayá kui xi koasenkaoná nga tsín jao sa̱tío tokoán nga ñaki kʼoatjín jmeni xi tso je Biblia. Xi ijngosani, kʼoati tsín jao sa̱tío tokoán nga nʼio nda binyakaoná je kjoatéxomale Jeobá. Tsa kʼoasʼiaan, yaa koa̱nngósoán joni jngo yá xi nʼio nya ja̱ma̱le, kʼoa nʼio sʼe̱jna je kjoamakjainná (tʼexkiai Colosenses 2:6, 7).d

18. Jmé xi koasenkaoná nga tsínkui sikitsón kjoafaʼaitsjenná jme xi chon sonʼnde.

¹⁸ Nga jngó jngóñá nga kʼoénelee yaoná kʼianga nʼio sʼe̱jna je kjoamakjainná. Kuinga machjénsíni nga tosi tonda si̱kʼantjaiyaa yaoná. Kʼoétsʼoalee je Jeobá kʼoa si̱jélee nganʼiotsjele. Si̱kjaʼaitsjenjiaan ngantsjai josʼin nikjaʼaitsjeen kʼoa ánni nga kʼoanʼiañá tsa jmeni. Je si̱miyoaa xi kuinyakaoná nga tosi tonda si̱ndayaa yaoná. Tsa kʼoasʼiaan, alikui kui sikitsón je kjoafaʼaitsjenná jmeni xi chon sonʼnde kʼoa si̱kinjelee “kjoafaʼaitsjen xi ngʼa tjío kʼoa ngayije kjoa xi ngʼa tjín, xi bisótjen kontrale kjoachjinele Niná” (2 Cor. 10:5).