Tosi tonda tsjoa kʼoé tokoán ninga kʼoantjaiya josʼin tinixálee Niná

1-3. Ánni nga tjíosíkatío kʼani ndsʼee josʼin tjíosíxále Jeobá.

JE Robert kao Mary Jo, xi 21 nó nga misionero koan, kʼiaa tsín tikʼoasʼin kisixáni nga kitjochʼinle je xijchále. Itso: “Tsjoa kisʼe tokuinjin nga kinikuindaijin je xijchánajin. Tonga ba koannajin nga kinikʼéjnaijin ʼnde jñani tinixálaijin Jeobá, nga̱ ñaki jeya ʼndenajin koannajin”.

² Kʼoa je ndsʼee William kao chjoónle xi Terrie ʼmi, itso: “Kʼianga tsín tikoan tsangín ijngokʼanijin jñani tinixálaijin Jeobá nga chʼin tsakʼetʼanajin kichjiʼndáníjin. Nga̱ kui xi nʼio koanmenajin tsakai nga xin naxinandá si̱xálaijin Jeobá”.

³ Je Alexéi itso: “Tongini ʼyaijin nga je chjota xi jtikenajin kʼoechjoa je sucursal ya jñani tijna. Ninga kʼoalani, kʼianga kicho nichxin nga tsakʼéchjoa ñʼai koanna nga kisikʼéjna Betel”.

4. Jmé kjoachjonangi xi chótʼayajiaan i̱ kjoaʼmiya jebi.

⁴ Ali tsa tojejin ndsʼee jebi xi ñʼai kjimale nga tjíobʼantjaiya josʼin tjíosíxále Jeobá. Kʼoati jmi mani betelita kʼoa kao je ndsʼee xi ñaki to xále Niná tjíosʼín xi kʼoakjima.b Tsakui nichxin ñʼai male ndsʼee jebi nga síkatío je xá xi nʼio tsjoake tsakai. Jmé xi kuinyakao. Jósʼin koa̱n kuinyakoaa. Nga jchaa xi tʼatsʼe jebi kʼoati kuinyakaoná kʼiatsa kʼoantjaiya josʼin tinixálee Niná.

JMÉ XI KOASENKAONÁ TSA KʼOANTJAIYA JOSʼIN TINIXÁLEE NINÁ

5. Jósa̱tío tokoán tsa kʼoantjaiya josʼin tinixálee Niná.

⁵ Tsa ñaki to xále Niná tinʼia, ni ya Betel tinixá kʼoa ninga xin, tsjoacha maa je chjota kʼoa kao ʼnde jñani tiyoaa. Kuinga ba satíoni tokoán kʼianga nikatioá josʼin tinixálee Niná. Nikjaoñá je ndsʼee xi kinikatioá, ngisaa tsakui nga kisʼechjoale je xále Niná ya ʼnde jñani tiyoaa tsakai (Mat. 10:23; 2 Cor. 11:28, 29). Xi ijngosani, ñʼai maná nga manga ijngokʼaná josʼin ngale chjota jñani bichoaa, ninga ya bicho ijngokʼá ya ʼndená. Je Robert kao Mary Jo, itso: “Jelikui tifaʼaitsjenninajin josʼin ngale chjota ya ʼndenajin kʼoa ñʼai koannajin nga kao én xi nokjoaijin saʼnda nga ʼndí kjoainjin tsakʼinyason ijngokʼaijin. Kʼoasʼin kinikjaʼaitsjainjin nga tsín tikoa̱nnganinajin”. Xi ijngosani, tsakui nichxin ñʼai koa̱nná tao̱n, kʼoa tsa si̱kʼajenlee tokoán. Jmé xi koasenkaoná tsakui kjoa kuitjátojiaan.

6. Jmé xi koa̱n sʼiaan nga si̱chriantʼalee Jeobá.

⁶ Si̱chriantʼalee je Jeobá (Sant. 4:8). Jngo koya josʼin koa̱n si̱chriantʼalee je Jeobá kʼiaa nga je si̱nʼiotʼaa, nga̱ nrʼoé kʼianga bʼetsʼoalee (Sal. 65:2). Kʼoa ya Salmo 62:8 itso: “Kʼoatʼinlao jotjío jinni̱ma̱no”. Je Biblia itso: “Niná ngisa totse male sʼín ngayije kjoa jo kji xi nijé, josʼin faʼaitsjenná” (Efes. 3:20). Alikui tokui kʼoasʼín jmeni xi nijélee kʼianga bʼetsʼoalee. Saʼnda tsín majinná jmeni xi sʼin kʼianga kʼoendajin je kjoa xi tjínná.

7. 1) Jmé xi koasenkaoná nga si̱chriantʼalee Jeobá. 2) Tojo tso Hebreos 6:10-12, jósʼin kuichomani tsa tosi tonda si̱xálee je Jeobá.

⁷ Xi koasenkaoná nga si̱chriantʼalee Jeobá kʼiaa nga nyaon nyaon kʼoéxkiaa je Biblia kʼoa si̱kjaʼaitsjenjiaan jmeni xi bʼexkiaa. Jngo ndsʼee xi misionero koan, itso: “Tosi tonda kichotʼayajtínjin Énle Niná ya niʼyanajin kʼoa tosi tonda tsakiyondalaijin je kjoajtínná, tojo kinʼiaijin jñani tiyuijin tsakai”. Xi ijngosani, tosi tonda kʼuínyasoán ya jtín jñani bichoaa. Je Jeobá alikui síchajin je xi kao kjoatsjoa síxále, ninga tsín tikʼoakji bichóni nganʼiole joni ngasʼa (tʼexkiai Hebreos 6:10-12).c

8. Jósʼin basenkaoná jmeni xi tso 1 Juan 2:15-17 nga tokatamaniná josʼin tiyoaa.

⁸ Tokatamaniná josʼin tiyoaa. Alikui kʼoaiʼndee nga kui kʼoechjoaná jmeni xi chon sonʼnde nga tosi tonda si̱xálee Niná (Mat. 13:22). Alikui je kuinóʼyalee miyoná, xíngiaa kʼoa tsa kjaʼaísa chjota xi kʼoakuitsoná nga kjoanyiná kjoásjee (tʼexkiai 1 Juan 2:15-17).d Je Jeobá si̱nʼiotʼaa, nga̱ kʼoatso nga tsjoáná ngayeje jmeni xi machjénná nga ndasʼin si̱xálee, nga nda sʼe̱ tokoán kʼoa nga ndasʼin kuiyoaa (Heb. 4:16; 13:5, 6).

9. Tojo tso Proverbios 22:3, 7, ánni nga nʼio tjínnile kjoandosin nga tsín tao̱n kjoéntʼeen yaoná kʼoa jmé xi koasenkaoná nga nda chjoéjiaan jmeni xi sʼiaan.

⁹ Alikui tao̱n kjoéntʼeen yaoná (tʼexkiai Proverbios 22:3, 7).e Kʼianga xin mangínkiyoaa tsee sʼenginá. Nga tsín tao̱n kjoéntʼeen yaoná alikui kui kuindá tsojmi xi tsín machjénná. Tsakui nichxin tao̱n si̱jékiyaa kʼiatsa kjoa kuitjátojiaan, jolani tsa jngo xíngiaa tjóchʼinle xi machjén nga si̱kuindaa, machjén nga chósonnilee jótjín tao̱n si̱jékiyaa. Xi koasenkaoná kuinga je Jeobá kʼoétsʼoalee nga koa̱nná chjoéjiaan jmeni xi sʼiaan. Jé Niná koasenkaoná nga nyʼán sʼe̱ tokoán kao ya jinni̱ma̱ná, kʼoa koasenkaoná nga ndasʼin si̱kjaʼaitsjeen (Filip. 4:6, 7; 1 Ped. 5:7).

10. Jmé xi koasenkaoná nga nda miyo sʼe̱ná.

¹⁰ Nda miyo katasʼená. Kʼoéyanajmílee je miyoná jotjín tokoán kʼoa jmeni xi kjimaná, ngisaa tsa kʼoati kui kjoa tjíofaʼatojin. Nda sa̱tío tokoán tsa kʼoasʼiaan (Ecl. 4:9, 10). Ningalani tjínná miyo ya ʼnde jñani kinixálee Jeobá, machjén nga sʼe̱ná miyo ya jñani tiyoaa ndʼaibi. Tonga tjínnele nga ñá si̱miyoaa. Kʼoéyanajmílee josʼin tísíchikontʼainná je Jeobá ánni nga skoe̱ni nga tsjoa tjín tokoán nga je Jeobá tinixálee. Ningalani tsín ñaki koa̱njin kʼale jokji tsjoa sʼe tokoán nga ñaki to xále Niná nʼia, tjínjinkʼa xi kuinyakao je choa̱ xi tibatioá kʼoa xi miyoná koa̱n. Tonga alikui koa̱n nga toñá nʼio si̱kʼaxkiaa yaoná kʼoa tsínkui nʼio si̱kʼaxkiaa xi tsín ndatjín.

11. Jmé xi koa̱n sʼin xi jechixan nga tosi tonda tsjoa sa̱tío kon.

¹¹ Tsakui kinikʼéjnañá josʼin tinixálee Niná nga kitjochʼinle je chjoónná kʼoa tsa xʼinná, alikui koa̱n kʼoakuixoán nga je tjínle jée. Kʼoa tsa ñá xi chʼin tsakʼetʼaná, alikui koa̱n kʼoasʼin si̱kjaʼaitsjeen nga ñá tjínná jée kʼoa nga totʼatsaan nga tsín tinda sʼe̱ni kon je chjoónná kʼoa tsa xʼinná. Kuenta sʼiaan nga tojngo yao mañá kʼoa nga kʼoatsakixoán nga si̱kuindangañá xíngiaa (Mat. 19:5, 6). Kʼoa tsakuije̱ nga xti sʼe̱ná tsín tikoa̱n ñaki to xále Niná sʼianñá, kʼoakʼuínlee je ʼndíná nga ngisa chjíle je tikʼoajinni josʼin kinixálee Jeobá. Kjitʼa kʼoakʼuínlee nga jngo kjoatjao xi tʼatsʼe Jeobá jaʼaini (Sal. 127:3-5). Kʼoati kʼoéyanajmílee jokji tsjoa kisʼe tokoán nga ñaki to xále Niná kinʼia, kui xi koasenkao nga kʼoati koa̱nmele ñaki to xále Niná sʼin jokinʼia ñá.

JÓSʼIN KOA̱N KʼOAINGANʼIOÁ

12. 1) Jósʼin koa̱n kuinyakoaa je ndsʼee xi ñaki to xále Niná tjíosʼín nga tosi tonda kʼoasʼin katasíxá. 2) Jósʼin kuinyakoaa nga choa ñʼai koa̱nle nga kʼoantjaiya josʼin sixále Niná.

¹² Tjínkʼa je jtín xi binyakao je ndsʼee xi ñaki to xále Niná tjíosʼín nga tosi tonda kʼoasʼin katasíxá. Tobʼelañá, kʼoatsole nga tosi tonda kʼoasʼin katasíxále Niná, tsjoále tao̱n kʼoa tsa jmesa xi machjénle kʼoa binyakao nga síkuinda xínkjín. Bʼailee kjoanda je ndsʼee xi kʼoasʼín (Gál. 6:2). Jósʼin kuinyakoaa tsa ya jtín jñani mangián kuicho tsjoánganʼio je ndsʼee xi ñaki to xále Niná tjíosʼín. Alikui koa̱n kʼoasʼin si̱kjaʼaitsjeen nga kuinga xin kinikasénni nga tsín nda kisixá kʼoa tsakui kʼoakisʼin xi tsín ndatjín.f Tosa kʼoailee kjoanda nga ya jtínná tsjoánganʼio. Nda chjoéyaa kʼoa kʼoakʼuínlee nga nʼio nda kisixále Niná, ningalani tsín tikʼoakji bichóni nganʼiole ndʼaibi. Nda kataʼyaxkoaan. Koasenkaoná jokji kjoankjíntokon tjínle kʼoa jokji kjoafaʼaitsjen tjínle.

13. Jósʼin koa̱n kuisenkoaa je ndsʼee xi bʼantjaiya josʼin síxále Niná.

¹³ Nga tosʼa kjoaʼaí je ndsʼee, tsakui nichxin koa̱n kuinyakoaa nga so̱kole jña kʼoéjnani, jokjoan carro xi skoé tsa jñani koai, jme xá xi sʼin kʼoa tsa jmesani xi kjaʼaínile. Kʼoati koa̱n kʼoéyanajmílee josʼin ngale je chjota xi ya tsʼe, kʼoa tsa jmesani xi ma, jolani tsa jmeni xi machjíntjai. Alikui koa̱n nga tojchamatokoán, je xi ngisa tjínle kjoandosin kuinga si̱jinlee yaoná jotjín kon. Tsakui nichxin chʼin tíbʼetʼale je kʼoa tsa xínkjín. Kʼoa tsa xínkjín kʼienje̱.g Ninga tsín kʼoakuitsoná, tsakui nichxin síkjáo je miyole. Nichxin machjénle nga nda sʼe̱ ijngokʼani kon.

14. Jósʼin tsakinyakao je ndsʼee jngo tichjaa xi xin naxinandá kisixále Jeobá tsakai.

¹⁴ Kʼianga koa̱nngale je ndsʼee, machjén nga kuinyakoaa kʼoa nda choa̱ kʼoéjnalee. Jngo tichjaa xi nʼio nkjín nó nga ñaki to xále Niná kisʼin jñani xin naxinandá, itso: “ʼNde jñani kixinyasoan ngasʼa, nyaon nyaon xinyale Biblia chjota. Tonga jñani tijna ndʼaibi, ñʼai koanna ninga tojngo textole Biblia tsakʼexkia kʼoa tsa video tsakakole je chjota nga xinyasoan. Tonga nga fikoa je ndsʼee kao tichjaa xi tjío jinjtín nga fisíxatʼa ijngokʼa je chjota kʼoa nga tsoyale Biblia, nʼio tsakasenkaona nga tsaʼbe nga je chjota xi ʼmiyale tsjoa tjío kon kʼoa ngotjo síkʼantjaiyani yaole. Koanna josʼin tsakjakaoña Énle Niná je chjota kʼoa tsjoa kisʼe ijngokʼa tokoan”.

TOSI TONDA NDA SI̱XÁLEE NINÁ

15. Jmé xi koasenkaoná nga tsjoa sʼe̱ tokoán tsa kʼoantjaiya josʼin tinixálee Niná.

¹⁵ Koaan nga tsjoa sa̱tío tokoán ninga tsín tikʼoasʼin tinixánilee Niná jokinʼia ngasʼa. Alikui koa̱n kʼoasʼin si̱kjaʼaitsjeen nga tsín nda kinitjosoán jme xá xi tsakʼainá kʼoa tsa ngisa choa chjíle josʼin tinixálee Niná ndʼaibi. Kuenta sʼiaan josʼin tíbasenkaoná Jeobá kʼoa tosi tonda kʼuínyasoán. Chjénngilee chjotale Cristo xi tsakatio kʼianga siglo 1, tojñani tsakatio, tosi tonda “kinchja̱ya je énle Niná” (Hech. 8:1, 4). Tsa tosi tonda kʼuínyasoán ndasʼin kuichomani. Tobʼelañá, tjínkʼa je precursor xi kinikitjo ya naxinandá jñani tjío kʼoa yaa ki ya naxinandá jñani machjén je xi tsoyason je én xi nchja̱. Kʼoa ya ʼnde jñani kicho, to choaa sá jaʼato nga koannkjínya je chjota xi koanmele kiskotʼaya Énle Niná.

16. Jmé xi koasenkaoná nga tsjoa sa̱tío tokoán kʼianga kʼoantjaiya josʼin tinixálee Niná.

¹⁶ Je Nehemías i kitsole chjota judío: “Je nganʼiono kui kjoatsjoale Jeobá” (Neh. 8:10). Ninga nʼio tsjoachaa jñani kinixálee Niná, ali tsakuijin xi tsjoa báya tokoán, je xi tsjoa báya tokoán kui je kjoamiyo xi tjínná kao Jeobá. Kuinga machjénni nga tosi tonda si̱chriantʼalee kʼoa je si̱nʼiotʼaa, nga̱ jé tsjoáná kjoachjine, koandiaaná kʼoa tsjoánganʼioná. Je xi tsjoa tsakáya tokoán nga kinixálee Jeobá jñani xin ʼnde, kuinga koanmená tsakinyakoaa je chjota. Je Jeobá tosi tonda koasenkaoná tsa ñaki ni̱ma̱ná kjuinroajinni nga si̱xálee (Ecl. 7:10).

17. Jmé xi kuenta sʼiaan josʼin tinixálee Jeobá ndʼaibi.

¹⁷ Kuenta sʼiaan nga je Jeobá si̱xálee ngantsjai nichxin, je xi kʼoantjaiya kui josʼin si̱xálee. Ya sonʼnde chjotse, tsakui nichxin tsín tikui xá sʼianñá josʼin tinixálee Jeobá ndʼaibi. Je Alexéi, xi jenása kanikʼaxkiaa, kʼoatso nga nʼio koasenkao nichxin xi nroaján josʼin tísíxále Niná ndʼaibi. Itso: “Kʼoasʼin sikjaʼaitsjen ngantsjai nga ñaki tíjna je Jeobá kʼoa nga sʼe̱jna kjoaixi je sonʼnde chjotse, tonga kʼoasʼin kisikjaʼaitsjen nga sʼasa tse chale nga kʼoakoa̱n. Ndʼaibi ngisaa chrian tijnale Jeobá kʼoa majinna nga tochoasa chale nga kjoaʼaí je sonʼnde chjotse” (Hech. 2:25). Tojme xá xi sʼiaan jinnaxinandále Niná, tosi tonda si̱chriantʼalee Jeobá. Alikuikʼia tsjiónkonná, tosaa koasenkaoná nga tsjoa sa̱tío tokoán nga si̱xálee jokji tjen kuicho nganʼioná tojñani tiyoaa (Is. 41:13).