Jméni xi sʼin je Chjotaxále Niná

JMÉ XI JETÍSʼÍN CHJOTAXÁLE NINÁ

Je kjoaʼmiya xi jejaʼato kui bakóya je choa̱ xi bakó nga jetíbatéxoma je Chjotaxále Niná ya ngʼajmi, kʼoa nga je Jesús xi Rey sʼin tíjna.

Je Biblia kʼoatso jmeni xi kisʼin je Jesús kʼianga jetsakatéxoma. I Sonʼnde tsakʼaonjenngi je Na̱i kao na̱i xi ndajin. Kʼoa nga i̱ Sonʼnde tsakichonjenngi, kuinga kʼoasikji kjoa tísʼeni saʼnda tjen nó 1914 (Apocalipsis 12:7, 9).

Ningalani sa chʼao sa chʼao kjimachon je sonʼnde, je Jesús, xi rey sʼin tíjnale je Chjotaxále Niná tsee kjoanda tíbakóle je chjota. Jé tíbándiaa nga tíʼmiyason je Énle Niná jngo tjíjtsa Sonʼnde, kʼoa millón mani chjota xi tjíobe je kjoafaʼaitsjen xi tsjoá Biblia kʼoa xi tjíosítjoson (Isaías 2:2-4). Tjíobinyakao nga tsín tokui xále ngisa tsjoále kjoandosin, ngisaa nda batio ya yaniʼyale kʼoa alikui kui nʼio tsjoále kjoandosin je tsojmi xi tjín sonʼnde. Kui je kjoafaʼaitsjen xi tsjoá Biblia tjíobinyakao nga ngisa nda tjíobatio kʼoa kʼoasʼin fikao yaole josʼin mele Niná.

JMÉ XI JEME KʼOASʼIN JE CHJOTAXÁLE NINÁ

Ningalani jetíbatéxoma Jesús ya ngʼajmi, je chjota tojo jé tjíobatéxomale xínkjín i̱ Sonʼnde. Je Niná i kitsole je Jesús: “Tatexomajinlai je kontrali” (Salmo 110:2). Je Jesús jeme sikjeson je kontrale kʼoa kjoaʼaxin jmeni xi kjoañʼai síkjaʼá je chjota xi mele sitjosonle Niná.

Nga kʼia kui jebi xi sʼin je Chjotaxále Niná:

• Kjoaʼaxin je religión ndiso. Alikui tisʼe̱ni je religión xi to énndiso tsoya tʼatsʼe Niná kʼoa xi tjíobʼanachale chjota, kʼoa je Biblia yaa síngósonkao joni jngo chjoónchajngi. Tokʼoakoa̱nle je chjota kʼianga ni̱kjeson je religión xi to énndiso tsoya tʼatsʼe Niná (Apocalipsis 17:15, 16).

• Kjoaʼaxin je chjotaxá sonʼnde. Je Chjotaxále Niná kjoaʼaxin je chjotaxá sonʼnde (Apocalipsis 19:15, 17, 18).

• Sikjeson je chjotatsʼen. Jmé xi koa̱nle je chjota xi tosi tonda kui kʼoasʼín xi chʼaotjín kʼoa xi tsín sítjosonle Niná. Je Biblia itso: “Je xi tsʼen tjóxin i̱ sonʼnde” (Proverbios 2:22).

• Sikjeson je Na̱i kao na̱i xi ndajin. Je Na̱i kao na̱i xi ndajin alikui tikʼoanachanile je chjota (Apocalipsis 20:3, 10).

Kʼoa jósʼin koatio je chjota xi mele nga je Chjotaxále Niná koatexomale.

JÓSʼIN KOASENKAO CHJOTA JE CHJOTAXÁLE NINÁ

Yaa tjen ngʼajmi koatexomani je Jesús, kʼoa nʼio ndasʼin koatexoma. Xi ijngosani, jé kuinyakao xi 144,000 mani xi xá kitjoejinni nga ya koatexomakao Jesús ya ngʼajmi (Apocalipsis 5:9, 10; 14:1, 3). Kʼoa jé xosʼin nga kuitjoson i̱ Sonʼnde josʼin mele Niná. Jósʼin koasenkao chjota je Chjotaxále Niná.

• Kjoaʼaxin je chʼin kao kjoabiya. “Nijngojin chjota xi i̱ kuitso: Timʼeña”. Kʼoa “likui tisʼe̱ni kjoabiya” (Isaías 33:24; Apocalipsis 21:4).

• Ndasʼin kuiyoaa kʼoa tsín tixkón kuiyoñá. “Nʼio tse kjoanyʼán sʼe̱le je xtili” kʼoa “nga jngó jngó yaa koationgi xka̱totseele kao yá higole, kʼoa liʼya xi kuinyaxkónle” (Isaías 54:13; Miqueas 4:4).

• Tsjoa koaya tokoán je xá xi sʼiaan. “Je xá xi sʼin je xi an kiskoejian ñaki tsjoa koaya kon. Ali tokjoatjaojin nga sixá” (Isaías 65:22, 23).

• Sindachon ijngokʼani Sonʼnde nga tíbitson. “Ya ʼndekixí kao jñani tokijna tsjotsjo sʼee kjoatsjoa, kʼoa ya ʼndekixí jñani son chon tsjoa koa̱nle kʼoa xóngaa joma je azafrán” (Isaías 35:1).

• Koakoyale jmeni xi sʼin je chjota nga koa̱n koatio ngantsjai nichxin. “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi, kʼoa skoe̱ Jesucristo je xi kinikasáin” (Juan 17:3).

Je Niná mele nga sʼe̱li kjoanichikontʼain jebi (Isaías 48:18). Yaa kjoaʼmiya xi ijngo kuitsoyaná jméni xi sʼiaan nga so̱koná kjoanda jebi.