Sakʼoa machjén nga kuijnyísjee chjota kʼianga kʼuínyalee énle Niná

1. Ya ʼnde jñani nkjín én nokjoa, ánni nga je sʼenesínile je jtín xi kui én male.

¹ Kʼianga jetsakʼaile nganʼiotsjele Niná je chjotale Jesús nga sʼuí Pentecostés nó 33 “tsakʼétsʼiakao nga kjaʼaí én kinchja” ánni koan kitsoyasínile je chjota xi xin naxinandá kichoni nga kisʼejna sʼuí jebi (Hech. 2:4). Kʼoa nga kui énle kinokjoakaoni janla jmi mani xi kisʼenngindá. Ningalani kʼoati male én hebreo kao én griego chjota jebi, je Jeobá kʼoasʼin koanmele nga kui én xi kitsinkao tsakʼinyanile je énnda chjotse. Kuijin kʼoakisʼinni nga ngisa nda nrʼoé chjota nga kui énle nokjoakao. Kuinga ya ʼnde jñani nkjín én nokjoa je sʼenesínile je jtín xi kui én male (chótʼai libro Organizados, pájina 107, párrafo 1, 2). Je grupo xi kjaʼaí én male tojé koasjai chjota xi kui én nchja̱. Kʼoa yaa koasjai ya territoriole jtín jñani kitjoni kʼoa tsa yaje̱ territoriole jtín xi chrian tjío.

2. 1) Jméni xi koa̱n sʼiaan kʼianga kʼoétʼaxoaan jngo chjota xi kjaʼaí én nchja̱ kʼoa kʼiáni nga nʼio machjén. 2) Jósʼin tsjoánganʼiole xínkjín je jtín kʼiatsa nkjín én nokjoa ya ʼnde jñani kjinele. 3) Jméni xi sʼiaan tsa mandosinle énle Niná jngo chjota xi kjaʼaí én nchja̱.

² Ya ʼnde jñani nga tojngo én nokjoa, je xíngiaa tsoyason jotjín niʼya tjín. Tonga ya naxinandá jña nkjín én nokjoa, kʼoati tsʼe ma ʼnde jebi je jtín xi kjaʼaí én male. Tsa kjini jngo chjota xi kjaʼaí én male masjaile, koaan kʼoetʼaxo̱n ánni nga koaisíxatʼasíni je xíngiaa xi kui én tsoyason. Tonga kuenta sʼin nga je xi kjinele xá jebi jéní jtín xi kui én male (chótʼai rekuadro xi tso: “Kʼoainganʼiongañálee xíngiaa”). Je jtín jebi jéní xi xki̱ niʼya básjai chjota kʼoa bʼétʼaxo̱n. Kataʼyala jmeni xi koa̱n sʼiaan.

3. Jméni xi kuitsoni jokji tse kjoásjee je chjota. A tjínnele nga ñaki ngóson sʼin koa̱nxá ʼnde jña kjinele je jtín.

³ Josʼin bijnyisjé chjota. Jokji tse kjoásjee chjota ya ʼnde jñani nga nkjín én nokjoa, kui xi kuitsoni jótjín chjota tjín xi kui én male, jótjín mani ndsʼee xi kui én tsoyason kʼoa jotjín registro jekjio. Alikui tjínnele nga ñaki ngóson sʼin koa̱nxá ʼnde jña kjinele je jtín, koaan tosa ya kjoanla nʼio sixákao jñani nkjín chjota tjín xi kui én male kʼoa jñani tsín nʼio kjin koa̱nle. Tonga nʼio machjén nga nda katasʼendajin josʼin koa̱nxá ánni nga nkjín chjota tjóʼndesínile nga kuinchja̱ni jaʼaínle Jeobá (Rom. 10:13, 14, NM).

4. 1) Jósʼin tjínnele sʼendajin nga kuijnyísjai je chjota. 2) Tikʼaxki̱ kʼai jmé xi síchjén je xíngiaa nga básjai chjota xi kjaʼaí én male.

⁴ Nga tsín jao xá katama, je xi chjotajchínga sʼin tjío koaan kʼoendajin josʼin kuijnyísjai je chjota, tonga xi nʼio kjinele jé xi superintendente xi tsʼe servicio sʼin tíjna (1 Cor. 9:26). Kʼianga jngo grupo xi kjaʼaí én nchja̱ kjinentsja je jtín, je xi chjotajchínga sʼin tjío jé skoéjin jngo xi chjotajchínga sʼin tíjna kʼoa tsa jngo siervo ministerial kʼianga koandiaale josʼin sixá grupo jebi. Nkjín mani jtín xi jebe josʼin básjai chjota. Tsakui nichxin jngo directorio síchjén kʼoa tsamaije̱ ya Internet básjai jaʼaínle chjota xi bele kon nga kui én nchja̱. Xijema, kʼiaa nchja̱le teléfono kʼoa tsamaije̱ fisíxatʼa, kʼoa tsakui én nchja̱ kʼiaa bʼétʼaxo̱n. Kʼoa tsa je xi bele kon je xi chjotajchínga sʼin tjío ya jtín jñani jngo grupo xi kjaʼaí én male kjinentsja koaan tsjoánganʼio sakʼoale je jtín jebi nga koaasjai je chjota (chótʼai rekuadro xi tso “Jméni xi nʼia nga fasjee chjota xi kjaʼaí én male”).

5. 1) Jméni xi kuenta sʼin je xíngiaa xi je básjai chjota xi kjaʼaí én nchja̱. 2) Jméni xi koa̱n kʼuínlee chjota.

⁵ Kʼianga kuijnyísjee chjota machjénní nga títjon kjoanla kataʼyaa jme xá tibijnyisjeñá. Kʼoa nga kui xá tinʼia kʼoasóyoaa josoyoaa kʼianga ʼmiyasoán, nga̱ tojo xále Niná tinʼia. Xi ijngosani, kʼianga kotʼaya je xíngiaa jokuitsole chjota kʼoa nga kui én nchja̱ én xi sʼa tjíokotʼaya ngisa mandayasa josʼin nchja̱ kʼoa sa tsjoa sa tsjoa satíole. Kʼoa jotjín tse bijnyisjé je chjota koaan kʼoéxkiaa je oraná, tonga tsa mapale territorio tibationdaa kʼoa tsa jeje̱ xo̱n xi tjíotʼa jaʼaínle chjota alikui koa̱n kʼoéxkiaa oraná. Kʼianga masjai je chjota xi kui én male, tjínnele kʼuínyale énle Niná. Ni koa̱nndosinle kʼoa ni tsín koa̱nndosinle chjota jebi tojo si̱kʼéjnaʼénle je superintendente xi tsʼe servicio, kʼoa tsamaije̱ je xi tsakánele, ánni nga sichjotseyasíni je registro xi tjíole. Ninga jélani bijnyisjé chjota xi kjaʼaí én male, kʼoati machjén nga si̱tjosoán je xá xi ngikʼa, jolani nga xki̱ niʼya kʼuínyalee chjota, kʼoee estudio kʼoa kjuinchón ijngokʼalee xi sasénle Énle Niná (chótʼai rekuadro xi tso: “Jóbixoán nga bijnyisjé chjota”).

6. Jmé xi sakʼoa ñʼai maná nga fasjee chjota xi tsín nrʼoé.

⁶ Josʼin bijnyisjé chjota xi tsín nrʼoé. Alikui choa ñʼai tíjna xá jebi, nganʼio machjén kʼoa alikui koa̱n si̱tsʼekoaa. Alikui ngotjo ʼyañá ʼyani xi tsín nrʼoé nga tsínkui bakóniná jokjoan najñole, josʼin matsen, kʼoa joʼmi. Xi ijngosani, je xínkjín kao miyole nʼio síkuinda, kʼoa sakʼoa likui jotso tsa bexkonni jngo chjota xi tsín nrʼoé. Je kjoafaʼaitsjen xi fisani koasenkaoná josʼin kjoásjee chjota jebi kʼoa kao xi kjaʼaí én male.

7. 1) Jméni xi koa̱n chjónangiaa kʼiatsa je tifasjee chjota xi tsín nrʼoé. 2) Jméni xi koasenkaoná nga tsín kjaʼaísʼin katasíkjaʼaitsjen je chjota.

⁷ Je jtín xi tsʼe seña kʼoa tsa jngo grupo xi sʼa tísʼetsʼiakao kui kjonangile chjota tsa bexkon kʼa xi tsín nrʼoé. Tsakui nichxin bexkon jngo chjota ndainiʼyale, jngo xi ñatje̱n síxá kʼoa tsa xi ñatje̱n fi skuela xi seña síchjén nga nchja̱, kʼoa tsakui nichxin saʼnda tíjna jngo xínkjín xi tsín nrʼoé. Kʼoa tsabeje̱ jña jngo letrero kjitʼa xi kʼoatso nga tsín nrʼoé xtiʼndí xi ya tjío nga tsín koa̱n toxkia kjoaʼakao karrole je chjota. Tonga nga kʼoaʼmilee chjota sakʼoa likui tso kon nga kʼoatsoná. Tonga tsa ñá xi kao kjoanda, kao kjoaxkóntokon chja̱koaa chjota kʼoa tojngo jao én sichjén nga kʼoakʼuínlee jme xá tibijnyisjeñá chjota jebi alikuijin kjaʼaísʼin sikjaʼaitsjen. Ngisa nda bichótsjoá jmeni xi sʼín kʼa xíngiaa, tjínkʼa xi jngo DVD xi tsʼe Biblia bakóle chjota kʼoa tsa jñasanile xi tojo tsʼe Biblia tínchja̱ni kʼoa kʼiaa kʼoatsole nga kui xá tjíobásjaini je xi tsín nrʼoé nga kui koakoyale jme kjoachoya xi tsjoá je Biblia. Kʼiatsa jngo chjota xi tsín tso kon nga kʼoakuitsoná koaan kʼoailee jaʼaínná kʼoa tsamaije̱ si̱kájnalee jngo xo̱n jñani faʼaitʼa kjoajtín xi satío xi tsʼe seña ánni nga katatsjoásínile je chjota xi tsín nrʼoé.

8. Jósʼin koa̱n tsjoánganʼio je jtín xi ngikʼa nga kuinyakao je jtín xi tsʼe seña.

⁸ Tsa ñandia kʼoa tsa jao kʼa nga jngo nó, je jtín xi tsʼe seña koaan sijéle nganʼio je jtín xi chrian tjío nga katabinyakao nga koasjai chjota xi tsín nrʼoé ya ʼnde jña nʼio nkjín chjota tjín. Kʼoa je kjoajtín xi sʼejna nga mangínkʼinyasoán, jé koandiaa je ndsʼee xi ya tíjnajin jtín xi tsʼe seña, koaan tsjoá kjoafaʼaitsjen josʼin kuijnyísjai chjota xi tsín nrʼoé kʼoa koakochoya jokoa̱n sʼiaan. Kʼoa tsa kjaʼaí kjaʼaí karro koaikao nga jngó jngó grupo koaan jngo koaijin xi male seña kʼoa jngo mapa kʼoa̱ xi sichjén ánni nga skoe̱síni jña sixá.

9. Jméni xi koa̱n sʼiaan nga koa̱nsjainá chjota xi tsín nrʼoé ya jñani maña kʼoa tsa yaje̱ jñani bʼainganʼiole.

⁹ Kʼoati koan koai je xíngiaa ya jñani fikʼétsaojin je chjota xi tsín nrʼoé, tsa ya jñani maña kʼoa tsa yaje̱ jñani bʼainganʼiole. Je ndsʼee kao tichjaa skósonnile jokjoan najño xi sichjén nga koai ʼnde jebi. Kʼoa nga jekuicho ngisa nda nga to jngo jngó chjota katafákao. Kʼoa tsa sasenle chjota jmeni xi tíʼmile koaan tsjoále jaʼaínle xínkjín.

10. Jósʼin koa̱n kjoásjee je chjota xi tsín nrʼoé ya jñani negosio tjín.

¹⁰ Ijngosa xi kʼoati koa̱n sʼiaan kuinga si̱chjén mapa jñani kʼoéchoaa nga jngó jngó negosio. Kʼoa tsen koatioñá je mapale, jolani tsa gasolinería, tintorería, lavandería, restauran, hotel kʼoa xi kjaʼaísa negosio ánni nga kʼia koanngínchonsínilee nga a ngotjole je chjota xi ya tjíosíxá. Kʼianga kʼoasʼin xki̱ negosio sʼechoa̱ jngo mapa, je ndsʼee kao tichjaa ngisa sʼesale kjoafaʼaitsjen josʼin fákao chjota. Tobʼelañá, tsa je chja̱koaa xi tíjnaʼnda hotel koaan jngo kaxa̱ DVD xi tsʼe seña kʼoailee kʼoa kʼoaileje̱ je xo̱n jñani tjítʼa josʼin satío kjoajtín xi tsʼe seña ánni nga koa̱n tsjoásínile je chjota xi tsín nrʼoé xi ya bichókatio ya hotel. Kʼoa jñani negosio tjín, koa̱n chjónangiaa tsa síxá jngo chjota xi to seña síchjén nga nchja̱. Kʼoa tsa jngo skuela xi tsʼe seña kijna ya territorio xi bʼakaoná, kʼoati koa̱n si̱katiolee je DVD xi nichjén ánni nga ya katabatíosíni ya bibliotecale.

11. Ánni nga nʼio chjísínile xá jebi kʼianga mangínkjasjee je chjota.

¹¹ Nʼio chjíle xá jebi. Tsakui nichxin sakʼoa koa̱ntsʼékoaa kʼianga fasjee chjota xi kjaʼaí én male. Xi ijngosani, me tokjitʼa síkʼantjaiya ʼndele jñani fikatio. Kʼoa nga kʼoama machjénní nga si̱chjotseyaa registrole territorioná. Kʼoa sa nkjín sa nkjín ʼnde tísʼe jñani kui xá tinʼia nga mangínkjasjee je chjota xi kjaʼaí én nchja̱. Tʼatsʼe Jeobá tínroani nga ʼmiyasonlee chjota kʼoa je alikui chjota faʼájin (Hech. 10:34). Kui xi “mele nga ngatsʼi chjota kuitjontjai, kʼoa nga kuichonrʼoe xi kjoakixi” (1 Tim. 2:3, 4). Kʼoainganʼiolee je Jeobá kʼoa kao ndsʼee nga kuijnyísjee je chjota xi kjaʼaí én male je “xi tjínle ni̱ma̱ kixi [kʼoa] xi ñaki nda” (Luc. 8:15).

[Rekuadrole pájina 5]

Kʼoainganʼiongañálee xíngiaa

Kʼiatsa jngo jtín kʼoa jngo grupo xi nganʼio machjénle kʼianga koasjai chjota, je superintendente xi tsʼe servicio koaan kʼoakuitsole je xi chjotajchínga sʼin tjío ya jtín xi tjíochrian xi kʼoati kjaʼaí én nchja̱ kʼoa xi ʼyale nga nkjín chjota tjín xi kui én nchja̱ ya territorio. Kʼoa je jtín xi tsjoánganʼio koaan kʼoakuitsole je xi kuitjotsoyason nga katabʼétʼaxo̱n tsa ʼya xi koa̱nsjaile xi kjaʼaí én nchja̱, kʼoa xijekoa̱n kʼiaa tsjoále je superintendente xi tsʼe servicio ánni nga je sikasénsínile je jtín kʼoa tsa grupo xi kasíjé nganʼio. Je xi superintendente xi tsʼe servicio sʼin tjío ya jtín xi tjíotsjoánganʼio skósonnile josʼin koa̱nxá nga sasa kjoeni territoriole kʼoa je chjota xi koa̱nndosinle koaan kʼoakuitsole jñani tíjna jngo jtín xi kui én male.

Xi ijngosani, tsa kʼoati koa̱nsjaile chjota xi kjaʼaísa én male, xi koa̱nndosinle Énle Niná kʼoa tsa jeje̱ chjota xi tsín nrʼoé, koaan kjitʼanangi kʼoenda xo̱n xi Sírvase visitar (S-43-S) ʼmi kʼoa jé tsjoále je xi secretario sʼin tíjna ánni nga kjoan koaikʼinyasínile Énle Niná chjota jebi (chótʼai km-S 5/11 pájina 3).

[Rekuadrole pájina 6]

Jméni xi nʼia nga fasjee chjota xi kjaʼaí én male

• Chjónangilee xi kjaʼaí chjota, jolani je xi ʼmiyalee Biblia, xíngiaa kʼoa tsa jeje̱ xi ñatje̱n nixá.

• Ya directorio kuijnyísjee je jaʼaínle chjota xi bele tokoán nga kui én nchja̱. Kʼoati tjín xo̱n xi faʼaitʼa direcciónle chjota kʼoa kao jaʼaínle, koaan ya kjoásjee ya Internet kʼoa tsa yaje̱ compañía telefónica.

• Chjónangiaa jolani tsa ya biblioteca, ya oficina xi gobierno kjinentsja kʼoa tsa ya ndʼiaskuela.

• Chótʼaa periódiko kʼiatsa jmeni xi síkʼaxki̱ xi tʼatsʼe chjota xi kjaʼaí én male kʼoa tsa jmeni xi sʼe̱.

• Koan koanngián jñani negosio tjín kʼoa tsa tienda jñani bichó chjota xi kjaʼaí én male.

• Koaan koanngián jñani bichó je chjota xi kjaʼaí én male jolani tsa ya jñani negosio tjín, jñani skuelangʼa tjín, jñani fayo je tren kʼoa jñani bitjo karro. Koaan jngo yámixa̱ koasenjnaa xi koatiosoán xo̱n xi kichʼá kʼiatsa katjoʼndená.

• Tsa tsjoáʼnde kjoatéxoma ya naxinandáná, koaan jngo directorio kuindá kʼoa tsamaije̱ kui koa̱nchjén programa xi tjínle Internet xi kui básjaiya ʼnde jñani bichó chjota xi kjaʼaí én nchja̱.

[Rekuadrole ya pájina 7 ]

Jóbixoán nga bijnyisjé chjota

Nga kao kjoaxkóntokon kʼoa kao kjoanda chja̱kaoñá chjota alikuijin kjaʼaísʼin sikjaʼaitsjen. Ngisa nda tsakui kjoanla títjon koakolee jngo xo̱n xi kui tjítʼa én xi tifasjee.

Kʼianga jesi̱tiʼndaa koaan i̱ kʼuínlee: “Je chjota xi én ______ nchja̱ tifjasjaijin, kui tiʼmiyalaijin tʼatsʼe kjoachoya xi tsjoáná Biblia. A tsí ʼyaxkuin ji tsa ʼyani xi kui én male”.

Kʼianga kjoásjee je chjota xi tsín nrʼoé koa̱n i̱ kuixoán: “ʼNdali. A koaan jngo video koakole. [Jngo DVD xi to chʼatontsjaa tichjain nga koakolai jngo testo xi seña faʼaitʼa xi tsʼe Biblia Traducción del Nuevo Mundo.] Bersíkulole Biblianí xi tíbakó ibi. Kʼoa nkjín video tjíonajin xi kui xá kisʼendani nga kʼuínyakjoatjaole Énle Niná je chjota xi tsín nrʼoé. A tsí ʼyaxkon jngui chjota xi tsín nrʼoé kʼoa tsa jeje̱ xi tsín nanda nrʼoé xi seña síchjén nga nchja̱”. Kʼiatsa tsín ni̱to̱n faʼaitsjenle chjota jebi, tikʼaxki̱ kʼalai ʼnde jolani tsa ya jña síxá, tsa ya ndʼiaskuelale kʼoa tsa ndainiʼyale, tsakuini nichxin tsabe jngo.