Kataʼyaa je kjoanda xi tje̱nkao xáná
1. Jméni xosíkaoná nga sakʼoa nixa̱nnilee xále Niná.
1 Je chjota kʼoasʼin koannda nga “katabe kjoanda xi tje̱nkao jokji nʼio síxá” (Ecl. 2:24). Tonga kʼianga tsín makjainle chjota ninga ʼmiyalee énle Niná tsakui nichxin kjuinroajen tokoán kʼoa tsín titsjoa sʼe̱niná kʼoa si̱xa̱nlee xá xi tinʼia. Jméni xi koasenkaoná nga tosi tonda tsjoa sʼe̱ tokoán nga ʼmiyasoán.
2. Ánni nga kuenta sʼiansíñá nga tsín tongatsʼi chjota nga koa̱nkjainle kʼianga kʼuínyasoán.
2 Kuenta sʼiaan nga tsín tongatsʼi chjota nga koa̱nkjainle. Si̱kjaʼaitsjenla je Jesús, ninga tochoa koanni xi kinrʼoéle, tse kjoanda kisoko kʼianga kʼoasʼin kitsoyason (Juan 17:4). Kʼoa kʼianga tsakʼéjna je choa̱ xi tʼatsʼe jngo chjota xi na̱xi̱n kjojndi kʼoakitso nga nkjín koa̱nni chjota xi tsín jtsaojin énle Niná je ni̱ma̱le (Mat. 13:3-8, 18-22). Ninga kʼoalani, tse kjoanda so̱ko kʼiatsa kʼoénelee yaoná nga kʼuínyasoán.
3. Jósʼin si̱nkjínyaa je énnda chjotse ninga tochoa mani chjota xi nrʼoéná.
3 Si̱nkjínyaa je énnda chjotse. Tojo kitso je Jesús nga tsakʼéjna choa̱ xi tʼatsʼe je chjota xi na̱xi̱n kjojndi, je xi makjainle énle Niná “jébi xi ñaki sínkjínyani” (Mat. 13:23). Kʼianga jebisó trigo kʼoa mangʼa yále, ali tsakuijin yále xi mankjínya, je xi mankjínya kui jotjín to sʼele. Je choa̱ jebi kui xi bakóná nga je xi ninkjínyaa ñá kui je énnda chjotse, ali tsa ñaki kuikjoan tínchja̱ni nga si̱nkjínsaa chjotale Cristo. Kʼoa jebi tse kjoanda tje̱nkao kʼoa tsjoa bʼé tokoán, ni kjuinrʼoéná kʼoa ni tsín kjuinrʼoéná je chjota. Nga̱ jetibʼainganʼioá nga tíbitjotsje jaʼaínle Jeobá (Is. 43:10-12; Mat. 6:9). Jngo kjoanda tjínná nga ya tojngo nixákoaa Niná (1 Cor. 3:9). Kʼoa nga kʼoasʼin ninkjínyaa énnda chjotse nʼio tsjoa sʼele Jeobá (Heb. 13:15, 16).
4. Jmé kjoanda xi sʼe nga kʼoasʼin ʼmiyasoán ninga sakʼoa tsín ʼyaa ñá.
4 Xi ijngosani, tse kjoanda tje̱nkao je xá xi tinʼia ninga tsín ñaki tiʼyañá xkoaan. Kʼianga kitsoya Jesús i̱ Sonʼnde, tsakui nichxin tjínkʼa je chjota xi kinrʼoéle xi skanni koankjainle. Tikʼoasʼinni tsanda ñá, tsakui nichxin likui ndi̱to̱n koa̱nntjejin ni̱ma̱le chjota je énle Niná tonga skanni koa̱nkjainle kʼoa saʼnda tsín jchaa ñá. Tse kjoanda tje̱nkao nga kʼoasʼin ʼmiyasoán. Tosi tonda si̱nkjínyaa énnda chjotse kʼoa koakoá nga chjotale Cristo maa (Juan 15:8).