Jósʼiain tsa tsín maʼali nga bʼailai estudio chjota

1. Ánni nga tjíokʼasíni xíngiaa xi tsín kʼoatsole chjota tsa mele skótʼaya Biblia.

¹ Tjínkʼa xíngiaa xi tsín kʼoatsole chjota tsa mele skótʼaya Biblia, kʼoa kuinga kʼoasʼínni nga tsínle nichxin nga kuitsoyale. Kjoaixi nga tse nichxin machjén kʼianga jngo chjota ʼmiyalee Biblia, nga tongini biyondaa, nga mangínkʼinyalee kʼoa nga binyakoaa tsa jme kjoa tjíofaʼatojin. Je pastro Pablo kʼoakitso nga saʼnda kitsjoa ni̱ma̱le jokji tsakʼénele yaole nga kitsoyale énle Niná je chjota xi Tesalónica tsʼe (1 Tes. 2:7, 8). Jmé xi sʼiaan nga koa̱n kʼoailee estudio chjota ninga tsín nanda maʼaná.

2. Kʼianga tsjoachaa je Jeobá, jósʼin si̱chjén je nichxinná.

² Nichxin machjén nga nixálee Jeobá. Nichxin machjén nga ntsjaintsjai mangián kjoajtínná, nga mangínkʼinyasoán, nga bʼexkiaa Biblia kʼoa nga bʼetsʼoaa. Tokuila si̱kjaʼaitsjeen josʼín jngo chjota xi jechixan, ninga nʼio tse xá tjínle, kao kjoatsjoa bʼasjeʼale nichxin je chjoónle kʼoa tsa xʼinle. A tsí ngisa machjén nga si̱kʼayalee nichxinná je Jeobá nga̱ nʼio tsjoachaa (Efes. 5:15-17; 1 Juan 5:3). Je Jesús kʼoakitso nga jngo koya josʼin ʼyaxkoán je Niná kuinga chjotale Cristo nikoaa je chjota (Mat. 28:19, 20). Tsa nda si̱kjaʼaitsjenjiaan én jebi yaa kjuinroani nga kʼoénelee yaoná nga kjoásjee chjota xi koa̱n kʼoailee estudio.

3. Jósʼiaan nga kʼoailee estudio chjota kʼiatsa sakʼoa tsín kʼoamaná.

³ Tonga jósʼiaan tsa kuinga tsín kʼoamaniná nga bʼailee estudio chjota nga chʼin tiyokoaa, nga tinixá kʼoa tsakuije̱ nga kjaʼaísa xá tjínná xi tsʼe Niná. Je xíngiaa xi chʼin tjíokao sakʼoa kʼoatsole je chjota xi tsoyale nga tosa ya niʼyale katabichókonle ánni nga ya kuitsoyasínile. Kʼoa je xíngiaa xi tse matsín xi totʼatsʼe xále sakʼoa teléfono kʼoa tsa computadora síchjén nga tsjoále estudio je chjota. Kʼoa tjíoje̱ ndsʼee kao tichjaa xi bʼéndajin kao je xíngiaa xi be nga sítjoson nga je katafitsjoále estudio je chjota xi tjíotsoyale kʼianga tsín maʼale je.

4. Jmé kjoanda xi sʼe̱ná kʼiatsa sʼe̱ná je chjota xi kʼoailee estudio.

⁴ Nʼio tse kjoatsjoa kisokole je pastro Pablo nga kisikʼaya nichxinle kʼoa kisikjejin nganʼiole nga tsakinyakao chjota nga katabe jokjoantjínni énle Niná (Hech. 20:35). Kʼoa kʼianga kisikjaʼaitsjenjin jotjín koanni chjota xi koankjainle ya Tesalónica nʼio kitsjoale kjoanda je Jeobá (1 Tes. 1:2). Kʼoati nʼio tsjoa sʼe̱ tokoán tsanda ñá nga kʼoasʼiaan xále Niná kʼiatsa kʼoénelee yaoná nga kjoásjee je chjota xi koa̱n kʼoailee estudio ningalani nʼio tse xá tjínná kʼoa me tsín nanda maʼaná.