Jmé kjoanda xi so̱koná tsa si̱jé territorio jñani kʼuínyasoán
1. Kʼiatsa nʼio tse ʼnde tjínle jña tsoyason je jtín, jméni xi koa̱n sijé je xíngiaa xi jetsoyason.
1 Jméni xi koa̱n sʼin je xíngiaa tsa nʼio tse ʼnde tjínle je jtín jñani tsoyason. Koaan síjé territorio jñani kuitsoyason jotjín tse, tsakui nichxin jngo xi chrian koa̱nle. Je libro Organizados pájina 103 itso: “Tochale skénndiaali nga si̱jé jngui territorio xi chrian koa̱nli jña tijnai kʼoa tsa yaje̱ jña bele tokuin nga kʼoakoa̱nli, ánsíni nga ngisa tse nichxin kʼuínyasonsíni. Kʼoa saʼnda koaan kʼoakʼuínkʼalai xi kʼoati jetsoyason nga katabitjokaoli”.
2. Kʼiatsa jngo territorio si̱jé jñani kʼuínyasoán, jósʼiaan kʼianga kʼoati kʼoainganʼiolee je gruponá.
2 Kʼoati kʼoainganʼioá ya grupo jñani bʼakaoná ʼmiyasoán. Kʼiatsa si̱jé jngoaa territorio ya chrian jña nixá, tsjoájin koa̱n kʼuínyasoán kʼianga bitjokichaa nga nyisen kʼoa tsakʼiaje̱ nga jebitjoaa xáná. Tochale koa̱n ñatje̱n kʼuínyasoán kao jngo xíngiaa xi ya chrian síxá. Kʼoa tsa si̱jé jngoaa territorio ya chrian niʼyaná, ñá kʼoa kao familianá tsjoájin koa̱n kʼuínyasoán nga koa̱nxon, jochon koa̱nʼaná. Tonga machjénní nga kʼoétsʼoalee Jeobá kʼiatsa tsín ya koanngián jña bitjoni je gruponá (Filip. 4:6). Tonga alikui koa̱n tsa ñaki toya kʼuínyasonʼndee ya territorio xi kanijé, kʼoati machjén nga kʼoainganʼioá ya grupo jña bʼakaoná. Kʼoa ngisa nga xoto kao nga taingo kʼianga ngisa nkjín bitjotsoyason koaan ya kuitjokoaa je gruponá.
3. Jmé kjoanda xi tje̱nkao nga nijé jngoaa territorio jña nga ʼmiyasoán.
3 Kjoanda xi tje̱nkao. Kʼiatsa jngo territorio si̱jé, koaan kʼoasʼin kʼuínyasoán josʼin nga koa̱nʼaná. Kʼoa ngisa tse nichxin kʼuínyasoán nga̱ tsín tsa tikjin koanngínñá. Kʼoa makjoanni nga tiya tjíochrianni je chjota xi mandosinle je énle Niná ngisa choa ñʼai koa̱nná nga koangínnixatʼaa nga kʼuínyalee. Kʼianga kʼoasʼin ma nijé je territorio jñani ʼmiyasoán, tochale tjíokʼa xíngiaa xi kʼoakoa̱nle nga precursor auxiliar kʼoa tsa precursor regular sʼin síxá. Je xíngiaa xi síjé territorio kʼoatso nga ngisa nda bexkon je chjota xijemani, kʼoa ngisa tsa nkjín kʼa kuitsoyason nga kjesa tsjoájinni. Tojosísʼin tiʼyaa nʼio tse kjoanda tje̱nkao nga nijé territorio jñani kʼuínyasoán. Tsa kʼoasʼiaan, ngisa nda kuitjosonná je xá xi kitsjoaná je Niná, ñá kʼoa kao yaniʼyaná (2 Tim. 4:5).