Chjénngilee je profetale Niná: Jonás
1. Jókoankjoan je Jonás.
1 Jósʼin nikjaʼaitsjeen xi tʼatsʼe Jonás. Tjínkʼa xi kʼoatso nga tokitsokjon kʼoa nga tsín kisʼele kjoamatokon. Tonga ʼyale nga nangitokon koan, nga nʼiojin koan kʼoa nga likui to yaole kini. Jósʼin koa̱n chjénngilee je choa̱ xi tsakʼéjna (Sant. 5:10).
2. Jósʼin chjénngilee je Jonás nga nangitokon koan.
2 Nangitokon koan. Kʼianga kʼoakitsole Jeobá je Jonás nga ya katafi ya naxinandá Nínive, tosa toxin ʼnde tsakanga. Tochale kui kʼoakisʼinni, nga̱ je chjota asirio nʼio chjotatsʼen koan. Tobʼelañá, je naxinandá Nínive isʼin tsaʼyale: “Naxinandá xi kʼoasikji njín tíbʼéjten” (Nah. 3:1-3). Je Jeobá tsakatekjáyale Jonás kʼoa kʼoakitso ijngokʼale nga katafi ya Nínive, kʼoa je Jonás tsakakó kjoanangitokon kʼoa kisitjoson (Prov. 24:32; Jon. 3:1-3). Ninga tsín kisitjoson nga títjon, tonga kisitjoson xijekoanni kʼoa kʼoakisʼin jokitsole Niná (Mat. 21:28-31). Kʼoa ñá, a tosi tonda kʼuínyasoán kʼiatsa katikjáyaná ya jinjtín kʼoa tsa nʼio tsʼenje̱ chjota ya jña ʼmiyasoán.
3. Ánni nga tjínnesínile nga nʼiojin koaan kʼoa nga likui to yaoná kjuinñá kʼianga ʼmiyasoán.
3 Nʼiojin koan kʼoa likui to yaole kini. Kʼianga jekoanchoyale Jonás nga totʼatsʼe nga xkón tsakatio je chjota xi síxá ya yachitso, kitsjoaʼnde nga tsakichonngindá ya jinndáchikon (Jon. 1:3, 4, 12). Kʼoa xijekoanni, kʼianga jeki ya Nínive jokitsole Niná, yaa ki saʼnda ngabasenle naxinandá. Tochale kui nga ya kini nga ngisa nkjín chjota kjuinrʼoéle kʼianga kuinchja̱ je én xi kitsole Jeobá. Kʼiatsa tsínlani nʼiojin koan, alikuijin kʼoakisʼin (Jon. 3:3, 4). Jebi kui xi bakóyaná nga tjínnele si̱jélee Niná kjoanʼiojin nga tosi tonda kʼuínyasoán je énle, nga̱ kʼoati nʼio tsʼen je chjota xi tjín ndʼaibi (Hech. 4:29, 31). Kʼoati machjén nga kao kjoatsjoa si̱kʼayaa nichxinná kʼoa nga si̱chjén jme xi tjínná nga kʼuínyasoán (Hech. 20:24).
4. Ánni nga ndatjínsíni nga si̱kjaʼaitsjenjiaan je choa̱ xi tsakatío je profetale Niná.
4 Kʼianga kʼoéxkiaa ya Biblia tʼatsʼe je profetale Niná ndatjín nga si̱kjaʼaitsjenjiaan jókinʼia tsa ñálañá. Koaan chjónangilee yaoná: “Jókisʼian tsa anlaña. Jósʼin koa̱n skenngile jokoankjoan profeta jebi” (Heb. 6:11, 12). Je xo̱n jebi Xá xi nʼia tʼatsʼe Niná skan kjoaʼaítʼasa xi tʼatsʼe profetale Niná xi tsakatio nichxin kjoatse.